Read Chol Ezequiel 31 Bible Online

Ezequiel 31 - Chol bible

Ezequiel 31

¹Che' ti mayo che' añix junlujump'ejl jab tsa' cʌjchi majlel Joaquín, awilan tsa' tili i t'an lac Yum ba' añon:

²I yalobil winic, suben Faraón i rey egiptojob yic'ot i tejclum tac: “Lajalet wʌle bajche' Asiria ti yambʌ ora. Wen p'ʌtʌl jini tejclum, lajal bajche' colem ch'ujte' ti Líbano. Wen i t'ojol jax i c'ʌb, wen yʌx pejtelel i yopol. Wen chan jini te', tsa' c'oti i ñi' ti tocal.

⁴Jini ja'al tsi' yʌc'ʌ ti wen colel. Tsa' tam'a majlel i wi' ti lum ba' tsi' taja ja'. Uts'atax tsa' coli. Tsi' melbe alʌ pa' yan tac bʌ te' am bʌ ti' joytʌlel.

⁵Ñumen chan che' bajche' yan tac bʌ te'. Cabʌl tsa' p'ojli i c'ʌb yic'ot i yopol cha'an cabʌl tsi' taja ja' i wi'.

⁶Ya' ti' c'ʌb tac tsi' mele i c'u' jini te'lemut. Ya' ti yebal tsa' tojp'i tac bʌte'el. Tsa' ajñi colem tejclum tac ti' yʌxñʌlel.

⁷Jini cha'an wen i t'ojol jax tsa' coli pejtelel i c'ʌb, come i wi' tsa' tam ochi ti lum ba' tsi' taja ja'.

⁸Ñumen chan che' bajche' jini ch'ujte' tsa' bʌ i pʌc'ʌ Dios. Ma'anic yambʌ te' lajal bʌ i yopol yic'ot i c'ʌb. Mi junchajpic jini te' am bʌ ti' pʌc'ʌb Dios tsa' mejli i taj i t'ojlʌwel.

⁹Cha'an ti' caj i t'ojlʌwel tsʌytsʌyña i pusic'al pejtel jini te' tac ya' ti Edén pʌc'bil bʌ i cha'an Dios.

¹⁰Jini cha'an lac Yum Dios woli' yʌl: Cha'an ti' caj tsi' chañ'esa i bʌ Egipto, ñumen chan tsi' q'uele i bʌ bajche' yan tac bʌ tejclum tac.

¹¹Jini cha'an mi caj cʌq'uen i toj i mul ti' c'ʌb jini p'ʌtʌl bʌ colem tejclum Babilonia, come chocbilix c cha'an.

¹²Jini bʌc'ñʌbilo' bʌ soldadojob tilemo' bʌ ti Babilonia yic'ot i p'ʌtʌlel mi caj i sec'ob jubel. Mi caj i jisañob. Pejtelel i c'ʌb mi caj i yajlel jubel ti pam wits yic'ot ti joctʌl, yic'ot ti pa' tac. Mi caj i lu' c'ʌscujel. Pejtel winicob tsa' bʌ ajñiyob ti' yʌxñʌlel mi caj i cʌyob.

¹³Ya' ba' yajlem mi caj i tempʌyel xwejlel mut. Mi caj i yajñel jini bʌte'el ti' yebal i c'ʌb.

¹⁴Mach mi' lon chañ'esan i bʌ yambʌ colem tejclum anquese cabʌl i p'ʌtʌlel, anquese an i chanlel bajche' tocal. Come ti pejtelelob p'isbil jach i yorajlel, mi caj i chʌmelob. Mi caj i yajñelob ti' yajñib chʌmeño' bʌ yic'ot pejtelel winicob mu' bʌ i chañ'esañob i bʌ.

¹⁵Lac Yum Dios woli' yʌl: Ti jim bʌ q'uin che' bʌ tsa' jubi majlel ti mucoñibʌl, tsa cotsʌbe i ch'ijiyemlel pañimil. Jini colem ja' tsi' yuc'ta. Tsac tic'be i ya'al. Tsa cotsa Líbano ti ic'yoch'an bʌ pañimil. Jini colem te' tac tsi' lijiyob i bʌ yilal.

¹⁶Che' wen c'am tsa' yajli ti lum, tsa cotsʌbe i bʌq'uen jini colem tejclum tac, come tsac choco ochel ti' yajñib chʌmeño' bʌ. Pejtelel jini ñuco' bʌ año' bʌ ti' yajñib chʌmeño' bʌ woli' ñuq'uesʌbentelob i pusic'al cha'an tsa' c'oti egiptojob.

¹⁷Ya' añob ja'el jini tsa' bʌ i coltayob ti guerra. Tsa' laj c'otiyob ti' yajñib chʌmeño' bʌ pejtel tsa' bʌ ajniyob ti' yʌxñʌlel.

¹⁸Egipto, cabʌl a ñuclel ti' tojlel yambʌ colem tejclum tac pero mi caj a c'otel ti' yajñib chʌmeño' bʌ yic'ot pejtelel jini yaño' bʌ. Mi caj a wajñel ti' tojlel jini ts'a'lebilo' bʌ ma' q'uel. Mi caj a jisʌntel ti espada. Che'i mi caj i jilel Faraón yic'ot pejtelel i winicob”, che'en lac Yum Dios.