Read Chol Ezequiel 38 Bible Online

Ezequiel 38 - Chol bible

Ezequiel 38

¹Lac Yum tsi' cha' subeyon: I yalobil winic, sutq'uin a wut cha'an ma' suben jini wocol ti' contra Gog, jini yumʌl ya' ti Mesec yic'ot ti Tubal. Suben Gog: “Lac Yum Dios woli' yʌl: Awilan añon ti a contra.

⁴Joñon mi caj cʌq'ueñet wocol. Mi caj c joc'chocon tsucu taq'uin ti a xʌc'ti'. Mi caj c tempan a soldadojob. Mi caj c pʌyetla tilel che' wen chajpʌbiletla yic'ot la' we'tʌjib cha'an guerra.

⁵Mux i tilelob ja'el la' wic'ot jini Persia yic'ot Fut. Ti pejtelelob mi caj i tilel yic'ot i mʌctijibob.

⁶Che' ja'el Gomer, yic'ot pejtel i soldadojob, yic'ot i soldadojob Togarma año' bʌ ti ñajtʌl ya' ti norte, yic'ot cabʌl yaño' bʌ winicob.

⁷Jini cha'an, Gog, yom ma' chajpan a bʌ. Yom yʌxʌl a wo yic'ot a winicob año' bʌ ti a joytʌlel. Wa'chocon a bʌ ti' yum.

⁸Che' ñumeñix cabʌl q'uin mi caj a loq'uel tilel. Che' ti' yujtibal cabʌl jabil mi caj a tilel yic'ot a soldadojob cha'an ma' wochel ti' lumal Israel baqui ñʌch'ʌl añob, ba' cha' tempʌbilob ti' lumal ti cabʌl tejclum.

⁹Mi caj a tilel yic'ot cabʌl soldadojob mu' bʌ caj i coltañet. Che' bajche' p'ʌtʌl bʌ ic' mi caj a tilel a mʌctan jini lum che' bajche' tocal mu' bʌ i jubel ti pañimil. Bajc'ʌletla yic'ot a soldadojob yic'ot yaño' bʌ a waj coltayajob ch'oyolo' bʌ ti yan tac bʌ lum.

¹⁰Ti jim bʌ ora mi caj i tejchel jontol bʌ a pensar. Mi caj a ña'tan a mel jontolil.

¹¹Mi caj a lon al: Mux c majlel c jisan jini tejclum mach bʌ mejlic i coltan i bʌ, ba' ñʌch'ʌl añob, ba' ma'anic ts'ajc ti' joytʌlel ba' ma'anic tsucu taq'uin ti' puerta tac.

¹²Uts'at mic ch'ʌm pejtel chuqui tac an i cha'an, cha'an mi cochel ti' yum jini lum, come wʌ' chumulob jini israelob tsa' bʌ loq'uiyob tilel ti yambʌ colem tejclum tac. Wen chumulob cha'an cabʌlob i wacax yic'ot i chubʌ'añob ti' yojlil pañimil ba' joyolob ti yambʌ tejclum tac.

¹³Jini Saba yic'ot Dedán, yic'ot pejtel jini xchoñoñelob ti Tarsis, yic'ot x'e'telob i cha'an mi caj i c'ajtibeñet: ¿Tsa' ba tili a ch'ʌm pejtel jini chubʌ'añʌl? ¿Tsa' ba a tempa cabʌl a winicob cha'an ma' lu' ch'ʌm majlel, yic'ot plata, yic'ot oro, yic'ot wacax? che'ob.

¹⁴Jini cha'an, i yalobil winic, suben Gog ili t'an: Lac Yum Dios woli' yʌl: Ti jim bʌ ora che' ñʌch'ʌl woli' chumtʌl c tejclum Israel, mi caj a lon chajpan a bʌ.

¹⁵Mi caj a loq'uel tilel ya' ti norte yic'ot bajc'ʌl a soldadojob. Cabʌl c'ʌchʌlo' bʌ mi caj i tilelob yic'ot cabʌl soldadojob ti guerra.

¹⁶Che' jini mi caj a lon tilel ti' contra c tejclum Israel che' bajche' tocal mu' bʌ i mʌc pañimil. Ti jini cojix bʌ q'uin tac mi caj c pʌyet tilel tic tejclum. Che' jini mi caj i cʌñoñob yambʌ tejclumob ti pañimil che' mi' q'uelob bajche' mic jisañet. Mi caj i ña'tañob ch'ujulon.

¹⁷Lac Yum Dios woli' yʌl: Ti oñiyi tsac tajayet tic t'an. Tsac sube jini x'alt'añob c cha'an, mi caj c pʌyet tilel ti' contra c tejclum Israel che' ñumeñix cabʌl jabil.

¹⁸Ti jimbʌ q'uin che' mi' tilel Gog i jisan i lumal Israel, mi caj i tejchel i tsʌytsʌyñʌyel c pusic'al yic'ot cabʌl c mich'lel, che'en lac Yum Dios.

¹⁹Come tic mich'lel yic'ot ti' tsʌytsʌyñʌyel c pusic'al mi caj c ñijcan i lumal Israel ti jim bʌ q'uin.

²⁰Pejtelel i chʌñil colem ja', yic'ot xwejlel mut, yic'ot bʌte'el, yic'ot pejtelel lucum, yic'ot pejtelel año' bʌ ti pañimil, mi' cajelob ti tsiltsilñʌyel tic tojlel. Mi caj i jejmel jubel jini wits. Pejtelel jini panch'en mi caj i yajlel jubel yic'ot jini chan tac bʌ ts'ajc. Mi caj i yajlel jubel ti lum.

²¹Mi caj c pʌy tilel pejtel pañimil ti a contra ya' ti' lumal Israel. Mi caj la' wʌlʌc contrajin la' bʌ, jujuntiquil ti' contra i yeran, che'en lac Yum Dios.

²²Joñon mi caj j contrajiñetla yic'ot espada, yic'ot jontol tac bʌ c'amʌjel, yic'ot but'ja'lel, yic'ot tuñija' lajal bʌ bajche' alʌ xajlel, yic'ot c'ajc, yic'ot azufre.

²³Che'ʌch mi caj c pʌs c ñuclel come ch'ujulon. Mi caj cʌc' ti c'uxbintel j C'aba' ti' tojlel cabʌl tejclum tac. Mi caj i ña'tañob Yumʌlon”. Che' yom ma' suben Gog, che'en Dios.