Read Chol Ezequiel 39 Bible Online

Ezequiel 39 - Chol bible

Ezequiel 39

¹I yalobil winic, tsictesan ili wocol ti' contra Gog. Suben Gog, jini ñuc bʌ yumʌl ti Mesec yic'ot ti Tubal: “Lac Yum woli' yʌl: Awilan, a contrajon.

²Mi caj c sʌc jisañet yic'ot wocol. Mi caj c wersa wets'et loq'uel ti norte. Mi caj c pʌyet tilel ti' wits tac Israel.

³Mi caj c chilbeñet a we'tʌjib ti guerra. Mi caj c jisan i yonlel a soldadojob.

⁴Ya' ti' wits tac Israel mi caj a jisʌntel yic'ot a soldadojob yic'ot a waj coltayajob ch'oyolo' bʌ ti cabʌl lum. Mi caj cʌq'uet i wenta i bʌl i ñʌc' jini jontol tac bʌ bʌte'el yic'ot te'lemut ti chajp ti chajp ya' ti mate'el.

⁵Ma'anic mi caj a wochel ti tejclum ya' ti lum. Mi caj a jisʌntel, come joñon tsac cha'le t'an, che'en lac Yum Dios.

⁶Mi caj c choc tilel c'ajc ti Magog, yic'ot ti' ti'il jini ñoja' ba' ñʌch'ʌlob. Che' jini mi caj i ña'tañob Yumʌlon”, che'en.

⁷Mi caj cʌc' ti tsictiyel jini ch'ujul bʌ j C'aba' ti' tojlel c tejclum Israel. Ma'anix mi caj c chʌn ñusʌbeñob i mul jini mu' bʌ i p'ajob. Che' jini mi caj i ña'tañob ti pejtelel pañimil Yumʌlon, Ch'ujulon Bʌ i cha'an Israel.

⁸Tal i yorajlel mi caj i ts'ʌctʌyel pejtel iliyi. Come jiñʌch ili q'uin tsa' bʌ cʌlʌ, che'en lac Yum.

⁹Pejtel jini chumulo' bʌ ti Israel mi caj i loq'uelob ti tejclum cha'an mi' pulob i juloñib yic'ot i mʌctijib, yic'ot i jalʌjb, yic'ot i yespada, yic'ot i lanza. Wucp'ejl jab mi caj i si'iñob.

¹⁰Ma'anix mi caj i chʌn motob tilel i si' ti mate'el, cojach i ye'tijib mi caj i pulob. Che' jini mi caj i jisʌbeñob i chubʌ'an i contrajob tsa' bʌ i tic'layob. Mi caj i cha' chilbeñob chuqui tsi' xujch'ibeyob ti ñaxan.

¹¹Ti jim bʌ ora mi caj c chajpʌben Gog ba' mi' cajel ti mujquel yic'ot i pi'ʌlob ti' lumal Israel, ya' ti' bijlel wits ti' tojel i pasibal q'uin ya' ti' ti' jini Chʌmen bʌ Ñajb. Mi caj i mʌctañob jini yomo' bʌ c'axel ya'i, come ya'i mi caj i mujquel Gog yic'ot pejtel i winicob. Mi caj i yotsʌbentel i c'aba' jini lum Jini Joctʌl i cha'an i Soldadojob Gog.

¹²Wucp'ejl uw jini israelob mi caj i mucob jini ch'ujlelʌl tac cha'an mi' sʌq'uesʌntel jini lum.

¹³Pejtel jini año' bʌ ti Israel mi caj i mucob. Jiñʌch jump'ejl q'uin c'ax tijicña bʌ che' mi' q'uejlelob ti ñuc c winicob ti' tojlel pejtel pañimil che' ñuc mic pʌs c bʌ, che'en lac Yum Dios.

¹⁴Che' ñumeñix wucp'ejl uw mi caj i wa'chocoñob winicob cha'an mi majlelob i sʌclan i bʌquel i contrajob tsa' bʌ cʌleyob ti pañimil, cha'an mi' mucob, cha'an mi' sʌq'uesañob jini lum.

¹⁵Mi caj i c'axelob jini mu' bʌ i sʌclañob majlel. Ya' ba' mi' tajbeñob i bʌquel chʌmen bʌ mi caj i yʌq'uen seña jini talo' bʌ ti wi'ipat cha'an mi' mucob ya' ti joctʌl am bʌ i c'aba' Jini Joctʌl i cha'an i Soldadojob Gog.

¹⁶Ya'an tejclum i c'aba' Bajc'ʌlob. Che' jini mi caj i sʌq'uesʌntel jini lum.

¹⁷Jixcu jatet, i yalobil winic, yom ma' suben tilel pejtel te'lemut yic'ot bʌte'el tac ti chajp ti chajp cha'an mi' much'quiñob i bʌ ya' ba' tsac chajpʌbeyob i buc'bal. Jiñʌch on bʌ i bʌl i ñʌc' tsa' bʌ c chajpbeyob ya' ti wits ti Israel. Ya'i mi caj la' c'ux we'elʌl, mi caj la' jap ch'ich'.

¹⁸Mi caj la' c'uxbeñob i bʌc'tal jini p'ʌtʌlo' bʌ. Mi caj la' japbeñob i ch'ich'el jini ñuco' bʌ i ye'tel ti pañimil. I wentajobʌch tiñʌme' tac yic'ot i yal, yic'ot tat chivo, yic'ot tat wacax laj jujp'esʌbil bʌ ya' ti Basán.

¹⁹Mi caj la' c'ux i bʌc'tal tac jinto mi la' ñaj'an. Mi caj la' jap ch'ich' jinto mi la' yʌc'an, come jiñʌch i bʌl la' ñʌc' tsa' bʌ c chajpʌbeyetla.

²⁰Ya' tic mesa mi caj la' wen ñaj'an, yic'ot i bʌc'tal tac caballo, yic'ot i yumob, yic'ot i bʌc'tal winicob mu' bʌ i cha'leñob guerra, che'en lac Yum Dios.

²¹Mi caj c pʌsbeñob c ñuclel jini tejclumob ti pejtelel pañimil. Ti pejtelelob mi caj i ña'tañob cujil meloñel che' mic jisan Gog.

²²Ti jim bʌ ora pejtel jini israelob mi caj i ña'tañob i Yumon i Dioson.

²³Pejtel winicob mi caj i ña'tañob tsa' cʌjchiyob majlel jini israelob cha'an i mul, cha'an tsi' cʌyʌyoñob che' bʌ tsi' chañ'esayob i bʌ tic tojlel. Jini cha'an tsac mʌyʌ c wut ti' tojlelob. Tsa cʌc'ʌyob ti jisʌntel ti' wenta i contrajob. Tsa' lu' chʌmiyob ti espada.

²⁴Che'ʌch tsac melbeyob ti' caj i mul cha'an tsi' ñusayob c t'an. Tsac mʌybeyob c wut.

²⁵Pero lac Yum Dios woli' yʌl: “Wʌle mi caj c cha' coltan jini tsa' bʌ cʌjchiyob. Mi caj c cha' pʌsbeñob i yutslel c pusic'al pejtel israelob i p'olbalo' bʌ Jacob. Mi caj cʌc' ti cʌjñel ch'ujul bʌ j C'aba'.

²⁶Che' jini quisintic mi caj i yubiñob cha'an tsi' cʌyʌyoñob che' bʌ tsi' chañ'esayob i bʌ tic tojlel. Ñʌch'ʌlix mi caj i chumtʌlob tic tojlel. Ma'anix majch mi caj i chʌn bʌc'tesañob

²⁷che' mic loc'sañob ba'an i contrajob cha'an mic cha' much'quiñob tilel ti' lumal. Mi caj c tsictesʌbeñob jini ch'ujul bʌ j C'aba' ti' wut pejtel tejclum tac.

²⁸Che' jini mi caj i ña'tañob i Yumon i Dioson tsa' bʌ c chocoyob majlel ti cʌjchel ti ñajt bʌ tejclum tac, come ti pejtelelob mi caj c cha' pʌyob tilel ti' lumal.

²⁹Ma'anix mi caj c chʌn mʌy c wut ti' tojlelob, come jini quEspíritu mi caj i yajñel ti' tojlel Israel”, che'en lac Yum Dios.