Read Chol Ezequiel 46 Bible Online

Ezequiel 46 - Chol bible

Ezequiel 46

¹Lac Yum Dios woli' yʌl: Ñup'ul yom i ti' jini ts'ajc am bʌ ti' tojel ba' mi' pasel q'uin c'ʌlʌl ti wʌcp'ejl q'uin che' mi la' cha'len e'tel. Cojach yom jambil ti' yorajlel c'aj o yic'ot ti' yorajlel tsiji' bʌ uw.

²Jini yumʌl mi caj ti ochel ti corredor am bʌ ti jumpat cha'an mi' majlel ti' ts'ajquil am bʌ ti mal. Che'ʌch yom mi' mel ba' ora jini motomaj woli' pulbeñob c majtan yic'ot majtañʌl cha'an mi' subeñon wocolix cʌlʌ. Mi caj i ch'ujutesañon ya' ti' mal corredor. Che' jini mi caj i cha' loq'uel ba' tsa' ochi. Ma'anic mi' bʌc' ñujp'ejl i ti' jinto mi' bʌjlel q'uin.

³Jini winicob x'ixicob mi caj i ch'ujutesañon ya' ti' tojel jini corredor che' ti' yorajlel c'aj o yic'ot ti q'uin cha'an tsiji' bʌ uw.

⁴Jini yumʌl yom mi' tsʌnsan wʌccojt alʌ tat tiñʌme' cha'an mi' pulbeñon c majtan ti' yorajlel c'aj o yic'ot juncojt tat tiñʌme' mach bʌ wis asiyemic.

⁵Mi caj i yʌc' juncujch i ñujp bʌ ti ac'ol jini tat tiñʌme', juch'bil bʌ harina yic'ot che' bajche' c'amel yom ti' pusic'al cha'an jujuncojt alʌ tat tiñʌme'. Yom wʌcp'ejl litro aceite cha'an jujuncujch harina.

⁶Che' ti' yorajlel q'uin cha'an tsiji' bʌ uw mi caj i pʌy tilel wen uts'at bʌ alʌ tat wacax, yic'ot wʌccojt alʌ tat tiñʌme', yic'ot juncojt tat tiñʌme' mach bʌ anic i c'amʌjel mi i lojwel.

⁷Che' mi' pʌy tilel jini alʌ tat wacax, yom mi' ch'ʌm tilel juncujch harina, come jiñʌch i ñujp ti ac'ol. Che' mi' pʌy tilel jini tat tiñʌme' yom mi' ch'ʌm tilel juncujch harina. Che' mi' pʌy tilel alʌ tat tiñʌme' yom mi' yʌc' che' bajche' yom ti' pusic'al. Mi caj i ch'ʌm tilel wʌcp'ejl litro olivo aceite cha'an jujuncujch harina.

⁸Jini yumʌl yom mi' yochel yom mi' loq'uel ti jini jach bʌ corredor.

⁹Pero ba' ora mi' yochelob winicob x'ixicob ti corredor am bʌ ti norte cha'an mi' yʌc'ob majtañʌl tac che' ti' yorajlel q'uin, yom mi' loq'uelob ti corredor am bʌ ti sur. Jini mu' bʌ i yochelob ti sur yom mi' loq'uelob ti norte. Mach yomic mi' chʌn loq'uelob ya' ba' mi' yochelob.

¹⁰Che' ti' yorajlel ili q'uin tac jini yumʌl mi' mejlel ti ochel ti loq'uel yic'ot jini winicob x'ixicob.

¹¹Che' ti' yorajlel ch'ujul bʌ q'uin tac yom juncujch harina cha'an i ñujp ti ac'ol jini alʌ tat wacax. Yom juncujch cha'an tat tiñʌme'. Che' mi' yʌjq'uel jujuncojt alʌ tat tiñʌme' yom i ñujp ti ac'ol che' bajche' c'amel yom mi' yʌc' jini yumʌl. Yom wʌcp'ejl litro aceite yic'ot jujuncujch.

¹²Baqui jach bʌ ora mi' yʌc' yambʌ majtañʌl jini yumʌl cha'an pulbil bʌ c majtan o mi cha'an mi' subeñon wocolix cʌlʌ, yom mi' poj jajmel jini puerta am bʌ ti' pasibal q'uin cha'an mi' yochel i yʌc' jini majtañʌl tac che' bajche' ti' yorajlel c'aj o. Che' loq'uemix mi caj i cha' ñujp'ejl i puertajlel.

¹³Ti jujump'ejl sʌc'ajel yom mi' tsʌnsʌntel juncojt tat tiñʌme' am bʌ jump'ejl i jabilel. Yom mi la' pulbeñon cha'an c majtan.

¹⁴Yom i ñujp ti ac'ol ti jujump'ejl sʌc'ajel, jiñʌch jump'is harina loq'uem bʌ ti wʌcp'is xʌbʌl yic'ot cha'p'ejl litro aceite. Che'ʌch yom ti pejtelel ora: Jini alʌ tat tiñʌme', yic'ot majtañʌl melbil bʌ ti harina, yic'ot olivo aceite. Yom cha'an majtañʌl ti jujump'ejl sʌc'ajel.

¹⁶Lac Yum Dios woli' yʌl: Mi jini yumʌl tsi' yʌq'ue i yalobil jumpejt lum, i cha'añʌch ti pejtelel ora.

¹⁷Pero mi tsi' yʌq'ue i winic, poj i cha'añʌch jinto ti' yorajlel c'aj o ti wucp'ejl jab che' mi' loq'uel ti libre. Che' jini mi' cha' ch'ʌm i lum jini yumʌl. Cojach mu' bʌ i yʌq'uentelob i yalobilob i cha'añʌch ti pejtelel ora.

¹⁸Jini yumʌl mach mejlic i wersa chilben i lum mi juntiquilic winic. Mi tsi' yʌq'ue i lum i yalobilob, wersa mi' yʌq'uen i bajñel lum, come mach yomic mi' chilbentelob i lum c tejclumob. Mach yomic mi' majlelob ti yambʌ lum, che'en lac Yum.

¹⁹Ti wi'il jini winic tsi' pʌyʌyon ochel ti' ñʌc' ts'ajc am bʌ ti' t'ejl jini colem corredor. Tsi' pʌyʌyon ochel ba'an jini ch'ujul bʌ tsalʌl tac an tac bʌ i ti' ti' tojel norte. Ya' ti' tojel i bʌjlibal q'uin tsaj q'uele jini tsa' bʌ i subeyon jini winic. Jiñʌch ba' mi' ch'ʌxob we'elʌl jini motomajob loq'uem bʌ ti majtañʌl cha'an i ñusʌntel mulil. Ya'i ja'el mi' c'ʌñob jini harina cha'an mi' pojpoñob waj. Mi' melob iliyi cha'an mach wersajic mi' cuchob ñumel jini majtañʌl tac ya' ti patio am bʌ ti norte ame mi' sʌq'uesañob jini winicob x'ixicob ti' wut Dios.

²¹Che' jini tsi' cha' pʌyʌyon majlel ya' ti patio am bʌ ti jumpat. Tsi' pʌyʌyon ba'an jujump'ejl i xujc jini patio. Tsaj q'uele ti jujump'ejl i xujc an tsalʌl junc'al i tamlel yic'ot jo'lujump'ejl metro i xujc, joy mʌcbil ti' ts'ajquil tac.

²³Ti' joytʌlel i ts'ajquil tac am bʌ ti mal an tac colem p'ejt melbil bʌ ti ladrillo cha'an mi' ch'ʌxob we'elʌl. Ti yebal an horno tac.

²⁴Tsi' subeyon cha'an jini levíjob mi' c'ʌñob ili tsalʌl tac cha'an mi' ch'ʌxob we'elʌl mu' bʌ i yʌc'ob winicob x'ixicob cha'an majtañʌl tac.