Read Chol Ezequiel 5 Bible Online

Ezequiel 5 - Chol bible

Ezequiel 5

¹Jixcu jatet i yalobil winic, yom ma' ch'ʌm junts'ijt espada wen jay bʌ i yej. Yom ma' c'ʌn cha'an ma' jujchin a jol yic'ot a tsucti'. Che' jini yom ma' t'ox i tsutsel a jol ti uxsejt.

²Yom ma' wʌc' jump'is ya' ti yojlil i planojlel Jerusalén. Ya'i mi caj a pul che' ujtemix a wubin jini wocol. Yambʌ jump'is mi caj a tsep yic'ot espada ya' ti' joytʌlel i planojlel tejclum. Yambʌ jump'is mi caj a puc ti ic', i wentajlel c tejclumob mu' bʌ caj cajñesan yic'ot espada.

³Yom ma' ch'ʌm ti a c'ʌb ts'ita' i tsutsel a jol cha'an ma' cʌch ti' ti' a bujc.

⁴Ti wi'il mi caj a loc'san ts'ita' ba' cʌchbil cha'an ma' pul ti' yojlil c'ajc. Jini c'ajc mi caj i pam ñumel i jisan israelob.

⁵Lac Yum Dios woli' yʌl: Jiñʌch i yejtal chuqui mi caj i yujtel ti Jerusalén, come tsi' q'uextayob c mandar cha'an mi' socob i bʌ che' bajche' yambʌ tejclumob. Ñumen jontol tsi' meleyob bajche' yaño' bʌ año' bʌ ti' joytʌlel. Ma'anic tsi' subeyoñob wocolix cʌlʌ.

⁸Jini cha'an woli' yʌl lac Yum Dios: Wʌle mi caj j contrajiñetla. Mi caj cʌq'ueñet la' toj la' mul ti' wut pejtelel pañimil.

⁹Cha'an leco jax la' melbal mi caj cʌq'ueñetla ñuc bʌ wocol max to bʌ anic tsa' la' wis ubi c'ʌlʌl wajali. Ma'anic mi caj c cha' aq'ueñetla wocol che' bajche' jini.

¹⁰Jini tatʌlob mi caj i c'uxob i yalobilob. Jini ch'itoñob mi caj i c'uxob i tatob. Mi caj c pam puc ti pejtelel pañimil jini cuxulob to bʌ.

¹¹Mic subeñetla ti isujm, mi caj c jisañetla cha'an tsa' la bib'esa jini Templo yic'ot pejtel chuqui ts'a'lebil c cha'an. Ma'anix mi caj c chʌn ñusan la' mul. Ma'anic mi caj c p'untañetla.

¹²Junmojt mi caj i chʌmel cha'an jontol bʌ c'amʌjel yic'ot wi'ñal. Yambʌ junmojt mi caj i jisʌntel yic'ot espada. Yambʌ junmojt mi caj c pam puc ti pejtelel pañimil ba' mi caj c jisañob ti espada.

¹³Che' jini mi caj c pʌsbeñob c mich'lel. Che' ñumeñix mi caj i ña'tañob i Yumon. Bʌxon cha'an mic ts'ʌctesan c t'an.

¹⁴Mi caj j cʌyetla cha'an mi' ts'a'leñetla pejtel xñumelob loq'uemo' bʌ ti yan tac bʌ tejclum ti la' joytilel.

¹⁵Mi caj i tse'tañetla. Mi caj i tajob i cʌntesʌntel cha'an ti' caj la' wocol. Mi caj i ña'tañob wen bʌc'ñʌbilon che' mich'on. Bʌbʌq'uen mi' jilelob cha'an i mul che' mi cʌq'ueñob i toj.

¹⁶Che' mic choc tilel wi'ñal i wenta i te'el c jalʌjb ti la' tojlel, jal mi caj la' wubin wi'ñal yic'ot wocol jinto mi' jilel pejtelel i bʌl la' ñʌc'.

¹⁷Mach cojic jach wi'ñal pero yic'ot jontol tac bʌ bʌte'el ja'el mu' bʌ caj i jisañetla, mi caj c chocbeñetla tilel yic'ot jontol bʌ c'amʌjel, yic'ot guerra. Mi caj la' tsʌnsʌntel ti espada. Joñon la' Yumon. Tsa'ix cʌc'ʌ c t'an, che'en lac Yum.