Read Chol Ezequiel 8 Bible Online

Ezequiel 8 - Chol bible

Ezequiel 8

¹Che' ti agosto ti jini wʌcp'ejlel jab, che' buchulon ti cotot yic'ot jini xñoxob ti Judá, ya' tsa' c'oti i p'ʌtʌlel lac Yum Dios tic tojlel.

²Tsaj q'uele juntiquil lajal bʌ bajche' Winic. Ti' yebal i cajchiñʌc' che' yilal bajche' c'ajc. Ti' chañelal i cajchiñʌc' che'ʌch yilal bajche' chʌcxowan bʌ c'ajc. Lajalʌch ti q'uelol bajche' c'ʌntsʌñan bʌ c'ʌnc'ʌn taq'uin.

³Jini Winic tsi' sʌts'ʌ i c'ʌb cha'an mi' wats chuc i tsutsel c jol. Che' jini, jini Espíritu tsi' pʌyʌyon letsel ti' chañelal pañimil yubil. Tsi' pʌyʌyon majlel ti Jerusalén ya' ti' ti' am bʌ ti norte ba' buchchocobil jini dioste' tsa' bʌ i techbe i mich'ajel lac Yum.

⁴Awilan ya'i tsaj q'uelbe i ñuclel i Dios Israel che' bajche' tsaj q'uele ti ñaxan ya' ti joctʌl.

⁵Lac Yum tsi' subeyon: I yalobil winic, letsan a wut ti' tojel jini norte, che'en. Tsac letsa c wut che' bajche' tsi' subeyon. Awilan ya' tsaj q'uele jini dioste' lʌc'ʌl ti' ti' ba'an pulʌntib.

⁶Lac Yum tsi' subeyon: I yalobil winic, ¿mach ba wolic a q'uel ñajtix añon tic Templo cha'an ti' caj i mul pejtelel jini israelob? Mu' to c pʌsbeñet ñumen leco bʌ mu' bʌ i melob, che'en.

⁷Tsi' pʌyʌyon majlel ba' mi' yochelob ti patio. Tsaj q'uele ya' tocol jini ts'ajc.

⁸Tsi' subeyon: I yalobil winic, t'obo i ñʌc' ts'ajc, che'en. Che' bʌ tsac t'obo, tsaj q'uele ya'an i ti'.

⁹Tsi' subeyon: Ochen ti' mal cha'an ma' q'uel pejtelel jini leco tac bʌ i melbalob, che'en.

¹⁰Che' jini tsa' ochiyon ti mal. Tsaj q'uele ya' ti' ñʌc' jini ts'ajc i yejtal jini cotol tac bʌ yic'ot jʌlʌcña bʌ mi' cha'len xʌmbal yic'ot bibi' tac bʌ i chʌñil pañimil, yic'ot pejtelel i diosob jini israelob ya' ti' ñʌc' jini ts'ajc.

¹¹Ya' wa'alob ti' tojel ts'ajc tsaj q'uele lujuntiquil i chʌnc'al (70) winicob año' bʌ i ye'tel ti Israel yic'ot Jaazanías (i yalobil Safán). Ti jujuntiquil chucbil i cha'an i yajñib pom ba' woli' letsel i buts'il.

¹²Lac Yum tsi' subeyon: I yalobil winic, ¿tsa'ix ba a q'uele jini mu' bʌ i mucul melob jini año' bʌ i ye'tel ti Israel, jujuntiquil ti mal i tsalʌl ba' cʌntʌbil i yejtal tac i dios? Mi' lon alob: “Ma'anic mi' q'uelonla lac Yum, come lac Yum tsa'ix i cʌyʌ jini pañimil”, lon che'ob.

¹³Tsi' cha' subeyon: Mi caj a q'uel ñumen bi'ilts'altacax bʌ i melbalob, che'en.

¹⁴Ti wi'il tsi' pʌyʌyon majlel ti' ti' Templo am bʌ ti' tojel jini norte. Tsaj q'uele buchulob x'ixicob, woli' yuc'tañob i dios i c'aba' Tamuz.

¹⁵Tsi' cha' subeyon: ¿Tsa'ix ba a q'uele iliyi? Mu' to caj a q'uel ñumen leco tac bʌ bajche' iliyi, che'en.

¹⁶Che' jini tsi' pʌyʌyon ochel ti' patiojlel i yotot lac Yum. Ya' ti' yochibal Templo ti' tojel jini pulʌntib tsaj q'uele jo'tiquil i cha'c'al winicob laj wa'alob, sujtemob i pat ti' tojel i Templo lac Yum, sujtemob i wut ti' tojel i pasibal q'uin. Woli' ch'ujutesañob jini q'uin.

¹⁷Lac Yum tsi' subeyon: I yalobil winic, ¿woli' ba a q'uelob? ¿Mach ba ñuquic i mul Judá? Che' woli' bib'esañob ili lum yic'ot i diosob. Che'ʌch woli' cʌntesañob i pi'ʌlob cha'an mi' contrajiñoñob cha'an mi' yutsi techbeñoñob c mich'ajel.

¹⁸Jini cha'an tic mich'lel mi caj cʌq'ueñob i toj i mul. Ma'anic mi caj c p'untañob, ma'anic mi caj j coltañob. Che' mi' cha'leñob oñel yic'ot c'am bʌ t'an, ma'anic mi caj c ñich'tañob. Che' tsi' yʌlʌ lac Yum.