Read Chol Daniel 1 Bible Online

Daniel 1 - Chol bible

Daniel 1

¹Che' ti' yuxp'ejlel jab che' woli ti yumʌntel Joacim rey bʌ ti Judá, tsa' c'oti jini rey Nabucodonosor loq'uem bʌ ti Babilonia yic'ot i soldadojob. Tsi' joy mʌctayob Jerusalén.

²Lac Yum tsi' yʌc'ʌ jini rey Joacim ti' c'ʌb Nabucodonosor yic'ot cabʌl latu yic'ot poc' am bʌ ti' yotot Dios. Nabucodonosor tsi' pʌyʌ majlel pejtel jini xcʌjchelob ti Babilonia yic'ot i cuch tsa' bʌ i loc'sa ti' yotot Dios ti Jerusalén. Tsi' laj otsa ti' yotot i dios ba' lotol pejtelel i yonlel i chubʌ'an ti' tojlel i dios.

³Jini rey tsi' sube Aspenaz am bʌ ñuc bʌ i ye'tel ti' tojlel i winicob rey cha'an mi' yajcan ch'iton winicob ti' tojlel israelob tsa' bʌ pʌjyiyob tilel: Yom c'oc'o' bʌ mach bʌ asiyemic i bʌc'tal, i p'olbalob rey, ch'itoñob año' bʌ i ña'tʌbal, yujilo' bʌ jun. Yom ch'itoñob i t'ojol jax bʌ ti q'uelol, chajpʌbilo' bʌ cha'an mi' colelob ti' yotot jini rey, cha'an mi' ñopob i t'an yic'ot i jun tac caldeojob, che'en.

⁵Jini rey tsi' yʌc'ʌ i t'an cha'an mi' c'uxob we'elʌl lajal bajche' mi' c'ux rey, yic'ot cha'an mi' japob jini jach bʌ vino mu' bʌ i jap jini rey. Uxp'ejl jab mi caj i cʌntesʌntelob. Ti wi'il mi caj i yochelob ti x'e'tel i cha'an rey.

⁶I winic rey tsi' yajca chʌntiquil ch'iton winicob ch'oyolo' bʌ ti Judá i c'aba'ob Daniel, Ananías, Misael yic'ot Azarías. Tsi' yajca yaño' bʌ ja'el.

⁷Pero jini yumʌl am bʌ ti' wenta cha'an mi' q'uel jini ch'itoñob tsi' q'uextʌbeyob i c'aba'. Daniel tsa' otsʌbenti i c'aba' Beltsasar. Ananías tsa' otsʌbenti i c'aba' Sadrac. Misael tsa' otsʌbenti i c'aba' Mesac. Azarías tsa' otsʌbenti i c'aba' Abednego.

⁸Daniel tsi' ña'ta ti' pusic'al ma'anic mi caj i c'ux we'elʌl mu' bʌ i c'ux jini rey. Ma'anic mi caj i japben i vino. Tsi' c'ajtibe ti wocol t'an jini yumʌl cha'an mach yomic i c'ux i jap.

⁹Lac Yum tsi' ñijcʌbe i pusic'al jini yumʌl cha'an mi' jac' ti uts'at.

¹⁰Pero jini yumʌl tsi' sube Daniel: Com c mel bajche' ma' wʌl, pero mic bʌc'ñan c yum jini c rey, come tsi' subeyon cha'an mi cʌq'ueñet la' c'ux we'elʌl, cha'an mi la' jap vino. Mi tsi' q'uele yajyajetla ti' tojlel la' pi'ʌlob cha'an wi'ñayetla, che' jini mi caj i tsictiyel an c mul. Bʌbʌq'uen mi' yʌc'on ti chʌmel jini rey, che'en.

¹¹Jini cha'an Daniel tsi' pejca jini x'e'tel wa'chocobil bʌ cha'an mi' yʌq'ueñob i bʌl i ñʌc' Daniel, Ananías, Misael yic'ot Azarías.

¹²Tsi' sube: Awocolic la' c cha'len lojon we'el uch'el lujump'ejl q'uin che' bajche' com lojon. Aq'ueñon lojon j c'ux pejtel chuqui mi' colel ti pʌc'ʌbʌl. La' c jap lojon ja'.

¹³Ti wi'il yom ma' p'ison lojon yic'ot c pi'ʌlob woli bʌ i c'uxob we'elʌl woli bʌ i japob vino. Che' bʌ tsa'ix a cʌñʌ bajche' añon lojon, subeñon lojon bajche' a wom mic mel lojon, che'en Daniel.

¹⁴Jini winic tsi' jac'ʌ. Jini cha'an tsi' melbeyob che' bajche' tsi' ña'tayob.

¹⁵Tsa' ñumi lujump'ejl q'uin. Tsa' caji i q'uel bajche' añob. C'oc'ob, wen ch'ejlob i wut, mach lajalobic bajche' i pi'ʌlob tsa' bʌ i c'uxuyob we'elʌl.

¹⁶Jini cha'an jini x'e'tel ma'anic tsi' subeyob cha'an mi' c'uxob we'elʌl mi' japob vino. Tsa' jach i c'uxuyob i wut pʌc'ʌbʌl.

¹⁷Dios tsi' yʌq'ueyob i ña'tʌbal ili chʌntiquilob cha'an mi' ch'ʌmbeñob isujm chuqui tac ts'ijbubil ti jun yic'ot pejtel yan tac bʌ i cʌntesʌntel. Daniel tsi' taja i c'ʌjñibal cha'an mi' ña'tan i sujmlel jini ñajal tac.

¹⁸Tsa' ñumi jini uxp'ejl jab. Jini yumʌl cha'an x'e'telob ti' yotot rey tsi' pʌyʌ majlel jini ch'itoñob ba'an Nabucodonosor cha'an mi' q'uelob. Jini rey tsi' cha'le t'an yic'otob. Ma'anic tsi' taja yambʌ am bʌ i ña'tʌbal che' bajche' Daniel, Ananías, Misael yic'ot Azarías. Jini cha'an tsa' pʌjyiyob cha'an mi' yajñelob ti' tojlel rey cha'an mi' subeñob bajche' yom melol i ye'tel.

²⁰Jini rey tsi' cha'le c'ajtiya tac ti' tojlelob. Tsi' q'uele cabʌlob i pusic'al yic'ot i ña'tʌbal lujunyajl i ñumel bajche' xwujtob yic'ot xch'ʌcojelob yic'ot yaño' bʌ año' bʌ i ña'tʌbal ti' yumʌntel.

²¹Daniel tsa' chʌn ajni ti' yotot rey c'ʌlʌl ti' tejchibal i yumʌntel Ciro.