Read Chol Daniel 10 Bible Online

Daniel 10 - Chol bible

Daniel 10

¹Ti' yuxp'ejlel jab che' woli ti yumʌntel Ciro ch'oyol bʌ ti Persia, an chuqui tsa' cha' pʌsbenti Daniel. Isujm chuqui tsi' q'uele. Tsi' q'uele tal cabʌl wocol ti pañimil, yic'ot guerra, yic'ot ch'ijiyem bʌ pusic'al. Tsi' wen ch'ʌmʌ ti wenta chuqui tsi' q'uele. Dios tsi' yʌq'ue i ch'ʌmben isujm.

²Joñon Danielon. Uxp'ejl semana wen ch'ijiyemon.

³Ma'anic tsaj c'uxu we'elʌl, ma'anic tsac japʌ vino. Mach sumuquic i bʌl c ñʌc'. Uxp'ejl semana ma'anic tsac boño c jol.

⁴Che' ti' tejchibal abril ti jini jach bʌ jab, ya' añon ti' ti' jini colem ja' i c'aba' Tigris.

⁵Tsaj q'uele juntiquil winic xojol bʌ i pislel melbil bʌ ti lino yic'ot i cajchiñʌc' melbil bʌ ti oro. Che' yilal i bʌc'tal che' bajche' i t'ojol jax bʌ xajlel i c'aba' topacio. Lemlaw i wut bajche' i xu'il chajc. Lajal i bʌc' i wut che' bajche' xutunte' woli bʌ ti lejmel. Che' yilal i c'ʌb i yoc bajche' wen juc'bil bʌ bronce. Ju'ucña i t'an che' bajche' i t'an cabʌl winicob.

⁷Joñon jach tsaj q'uele. Ma'anic chuqui tsi' q'ueleyob jini winicob ya' bʌ añob quic'ot, pero tsa' cajiyob ti puts'el cha'an bʌq'uen. Tsi' mujcuyob i bʌ.

⁸C bajñel jach che' bʌ tsaj q'uele ili bʌbʌq'uen tac bʌ. Tsa' c'uñ'ayon. Tsa' sʌc'a c wut cha'an bʌq'uen.

⁹Che' bʌ tsa cubi i t'an, tsa' ñuc yajliyon. Tsa' juquin chʌmiyon.

¹⁰Pero tsi' techeyon ti' c'ʌb cha'an mij cotchocon c bʌ ti lum.

¹¹Tsi' subeyon: Daniel, c'uxbibilet i cha'an Dios, ch'ojyen. Ubin chuqui mi caj c subeñet, come Dios tsi' chocoyon tilel ba' añet, che'en. Che' bʌ tsi' pejcajon, tsiltsilñayon tsa' wa'leyon.

¹²Tsi' subeyon: Daniel, mach a cha'len bʌq'uen. Ubibil a woración ti Dios c'ʌlʌl che' bʌ tsa' caji a wʌc' a pusic'al cha'an ma' ch'ʌmben isujm, che' bʌ tsa' peq'uesa a bʌ ti' tojlel a Dios. Jini cha'an tsa' tiliyon cha'an tsi' jac'ʌ Dios.

¹³Pero jini Jontol bʌ Espíritu mu' bʌ i cha'len yumʌl ti Persia tsi' mʌctayon jump'ejl i cha'c'al (21) q'uin. Awilan tsa' tili i coltañon Miguel jini ñuc bʌ yumʌl ti' tojlel ángelob. Jini cha'an tsa' mejliyon ti ñumel ba'an i yumob Persia.

¹⁴Tsa' tili c tsictesʌbeñet chuqui mi caj i yujtel ti' tojlel a pi'ʌlob ti wi'il bʌ ora. Jini mu' bʌ caj c pʌsbeñet mi caj i yujtel ti yanto bʌ ora, che'en.

¹⁵Che' woli to i pejcañon, ñuculon ti lum, ñʌch'ʌlon. Ma'anic chuqui tsa cʌlʌ.

¹⁶Pero juntiquil lajal bʌ bajche' winic tsi' tʌlbeyon c ti'. Che' jini tsa' cajiyon ti t'an. Tsac sube jini tilem bʌ ti panchan: C Yum, woliyon ti bajq'uel cha'an ili tsa' bʌ j q'uele. Ma'anix c p'ʌtʌlel.

¹⁷¿Bajche' mi mejlel c pejcañet? come ma'anix c p'ʌtʌlel. Wocol mic jap ic', cho'on.

¹⁸Jini lajal bʌ bajche' winic tsi' cha' tʌlʌyon. Tsi' yʌq'ueyon c p'ʌtʌlel.

¹⁹Tsi' subeyon: Dios mi' wen c'uxbiñet. Mach a cha'len bʌq'uen, mach a mel a pusic'al. P'ʌtesan a bʌ. La' ch'ejl'ac a pusic'al, che'en. Che' woli to i pejcañon, tsa' p'ʌtayon. Tsac sube: Cha' pejcañon, c Yum, come tsa'ix a p'ʌtesayon, cho'on.

²⁰Jini tsi' subeyon: ¿A wujil ba chucoch tsa' tiliyon ba' añet? Wʌ' añon cha'an mic subeñet chuqui mi' caj ti ujtel ti wi'il bʌ ora. Isujm che' bajche' ts'ijbubil ti' juñilel Dios. Mi caj c majlel ti ora. Mi caj j contrajin jini yumʌl ti Persia woli bʌ i mʌctañon tic bijlel. Ti wi'il mi caj j contrajin jini yumʌl ti Grecia. C bajñel jach mi caj j contrajiñob. Cojach jini ángel Miguel mi caj i coltañon.