Read Chol Daniel 12 Bible Online

Daniel 12 - Chol bible

Daniel 12

¹Ti ora mi cajel i tsictiyel Miguel, jini ñuc bʌ ángel mu' bʌ i cʌntan a pi'ʌlob ti Israel. I tejchibalix i yorajlel cabʌl wocol. Ti oñiyi c'ʌlʌl wʌle ma'anic ba' ora tsi' yubiyob ñuc bʌ wocol che' bajche' iliyi. Ti jimbʌ ora mi caj i coltʌntelob pejtel a pi'ʌlob ts'ijbubilo' bʌ i c'aba' ti' jun Dios.

²Cabʌl jini chʌmeño' bʌ mi caj i ch'ojyelob cha'an mi' tajob i cuxtilel mach bʌ anic mi' jilel. Yaño' bʌ mi caj i ch'ojyelob cha'an mi' yubiñob quisin mach bʌ anic mi' lajmel ti pejtelel ora.

³Jini año' bʌ i ña'tʌbal i cha'año' bʌ Dios, tsa' bʌ i toj'esayob cabʌl winicob, ts'ʌylawob mi caj i yajñelob che' bajche' i c'ʌc'al panchan, che' bajche' i c'ʌc'al ec'.

⁴Pero jatet Daniel, mach yomic ma' tsictesan ili t'an. Yom ma' wotsʌben i sellojlel jini jun c'ʌlʌl ti jini cojix bʌ ora. Winicob mi' cajelob ti cabʌl xʌmbal. Mi caj i p'ojlel i ña'tʌbal winicob ti pañimil. Tsa' ujti ti t'an Gabriel.

⁵Joñon Danielon. Tsaj q'uele wa'alob cha'tiquil winicob juntiquil ti' ti' jini ñoja', yambʌ ya' ti junwejl.

⁶Jini lʌc'ʌl bʌ an tsi' pejca jini yambʌ xojbil bʌ i bujc melbil bʌ ti lino wa'al bʌ ya' ti' pam jini ja'. Tsi' c'ajtibe: ¿Baqui ora mi caj i yujtel jini bʌbʌq'uen tac bʌ? che'en.

⁷Jini winic xojbil bʌ i pislel ti lino, wa'al bʌ ti pam jini ñoja', tsi' letsa cha'ts'ijt i c'ʌb ti' tojel panchan. Tsi' yʌc'ʌ i t'an ti' c'aba' jini Cuxul bʌ Dios. Tsi' yʌlʌ: Mach ujtic jinto mi' ñumel ojlil i chʌmp'ejl jab, jinto mi' jisʌntel i p'ʌtʌlel jini mu' bʌ i jisan i cha'año' bʌ Dios. Che jini mi' caj ti ujtel, che'en.

⁸Joñon tsa cubi, pero ma'anic tsac ch'ʌmbe isujm. Jini cha'an tsaj c'ajtibe: C Yum, ¿chuqui mi caj i yujtel ti wi'il bʌ ora che' mi' yujtel pejtel iliyi? cho'on.

⁹Jini tsi' jac'beyon: Cojix jini, Daniel. Cucux, come mucul to mi caj i cʌytʌl ili t'an jinto mi' c'otel i yorajlel che' mi' cajel ti ujtel.

¹⁰Cabʌl winicob x'ixicob mi caj i ñusañob wocol cha'an mi' sʌq'uesʌntelob. Mi caj i melob i bʌ ti uts'at. Pero jini jontolo' bʌ mi caj i chʌn cha'leñob jontolil. Ma'anic mi caj i ch'ʌmbeñob isujm. Pero jini winicob año' bʌ i ña'tʌbal mi caj i ch'ʌmbeñob isujm.

¹¹Che' baqui ora mi' tijq'uelob mu' bʌ i yʌq'ueñob Dios pulbil bʌ i majtan ti jujump'ejl q'uin, c'ʌlʌl jinto ba' ora mi' wa'chocontel jini sts'a'leya mu' bʌ i jisan i Templo lac Yum, mi caj i ñumel uxbajc' yic'ot lujump'ejl i jo'c'al (1,290) q'uin.

¹²Tijicña jini xuc'ul bʌ ti pijt c'ʌlʌl mi' ñumel jo'c'al i chʌmbajc' yic'ot jo'lujump'ejl i cha'c'al (1,335) q'uin.

¹³Pero jatet Daniel, chʌn cha'len a we'tel che' bajche' woli a mel c'ʌlʌl ba' ora ma' chʌmel. C'aja a wo. Ti cojix bʌ q'uin mi caj a tejchel cha'an ma' ch'ʌm a chobejtʌbal, che'en lac Yum.