Read Chol Daniel 2 Bible Online

Daniel 2 - Chol bible

Daniel 2

¹Che' ti cha'p'ejlel jab che' woli ti yumʌntel Nabucodonosor, tsi' cha'le ñajal. Bʌbʌq'uen jax chuqui tsi' ñajle. Ma'anix tsa' chʌn ochi i wʌyel come tsi' wen mele i pusic'al.

²Che' bʌ tsa' sʌc'a mach chʌn c'ajalix i cha'an i ñajal. Jini cha'an tsi' pʌyʌ tilel pejtel i winicob año' bʌ cabʌl i ña'tʌbal, yic'ot mu' bʌ i subob chuqui mi' caj ti ujtel, yic'ot xch'ʌcojelob, yic'ot xq'uel ec'ob. Tsi' subeyob cha'an mi' tsictesʌbeñob i sujmlel i ñajal. Tsa' tiliyob ti' tojlel jini rey. Jini rey tsi' subeyob: Tsac cha'le ñajal, pero mach c'ajalix c cha'an c ñajal, che'en.

⁴Jini año' bʌ i ña'tʌbal tsi' yʌlʌyob: Yom cuxulet ti pejtelel ora, c rey lojon. Ñaxan tsictesʌbeñon lojon a ñajal. Che' jini mi caj c subeñet lojon i sujmlel, che'ob.

⁵Jini rey tsi' yʌlʌ: Tsa'ix ñajʌyi c cha'an. Mi ma'anic mi la' c'ajtesʌbeñon, mi ma'anic mi la' subeñon i sujmlel c ñajal, mi caj la' bic'ti tsejpel. Mi caj i jisʌntel la' wotot.

⁶Pero mi la' wujil la' c'ajtesʌbeñon jini c ñajal, mi uts'at mi la' subeñon i sujmlel, mi caj cʌq'ueñetla la' majtan yic'ot la' ñuclel. Jini cha'an wʌle c'ajtesʌbeñonla chuqui tsac ñajle. Subeñonla i sujmlel, che'en jini rey.

⁷Tsi' cha' subeyob: Tsictesʌbeñon lojon a ñajal. Che' jini mux c subeñet lojon i sujmlel, che'ob.

⁸Jini rey tsi' yʌlʌ: La' wujil mi caj c tsʌnsañetla. Jini cha'an la' wom la' jalʌtesan la' bʌ jinto mi' tajon jini wocol tsa' bʌ c ñajle. Tsa'ix la' como la' t'an cha'an mi la' lotiñon. C'ajtesʌbeñonla c ñajal. Che' jini mi caj c ñop isujm chuqui woli la' subeñon, che'en.

⁹

¹⁰Jini año' bʌ i ña'tʌbal tsi' yʌlʌyob: Ma'anic mi juntiquilic lac pi'ʌl mi xwujt mi xch'ʌcojel mu' bʌ mejlel i subeñet chuqui tsa' ñajle. Ma'anic yambʌ rey ti pejtelel pañimil mu' bʌ i wersa c'ajtibeñob i winicob che' bajche' iliyi.

¹¹Wen wocol chuqui wola' c'ajtibeñon lojon. Ma'anic majch mi mejlel i tsictesʌbeñet, cojach jini diosob mach bʌ chumulobic ti' tojlel winicob ti pañimil, che'ob.

¹²Tsa' wen mich'a jini rey che' bʌ tsi' yubibeyob i t'an. Tsi' cha'le mandar cha'an mi' tsʌnsʌntelob pejtelel año' bʌ cabʌl i ña'tʌbal chumulo' bʌ ti Babilonia.

¹³Che' bʌ tsa' tsictiyi jini mandar cha'an mi' laj tsʌnsʌntelob jini año' bʌ i ña'tʌbal, tsa' tiliyob winicob cha'an mi' tajob Daniel yic'ot i pi'ʌlob cha'an mi' tsʌnsañob ja'el.

¹⁴Arioc jini ñuc bʌ xcʌntaya i cha'an jini rey tsa' c'oti i tsʌnsan jini año' bʌ i ña'tʌbal. Daniel tsi' pejca Arioc ti uts bʌ t'an.

¹⁵Tsi' c'ajtibe: ¿Chucoch mi' yʌc' mandar jini rey cha'an mic tsʌnsʌntel lojon? che'en. Arioc tsi' laj sube bajche' woli' yujtel.

¹⁶Jini cha'an Daniel tsa' majli i pejcan jini rey ti wocol t'an cha'an mi' pijtan jinto mi' c'ajtesʌben i ñajal.

¹⁷Daniel tsa' sujti ti' yotot ba'an i pi'ʌlob. Tsi' tsictesʌbeyob ili wocol Ananías, Misael yic'ot Azarías.

¹⁸Tsi' c'ajtiyob i coltʌntel ti' tojlel Dios am bʌ ti panchan. Tsi' c'ajtibeyob i sujmlel i ñajal jini rey cha'an ma'anic mi' tsʌnsʌntelob yic'ot jini año' bʌ i ña'tʌbal ti Babilonia.

¹⁹Ti jini ac'ʌlel Dios tsi' jac'ʌ. Tsi' pʌsbe Daniel i ñajal jini rey. Jini cha'an Daniel tsi' subu i ñuclel Dios am bʌ ti panchan.

²⁰Tsi' yʌlʌ: La' ñuq'uesʌntic i c'aba' Dios ti pejtelel ora. Come cabʌl i ña'tʌbal yic'ot i p'ʌtʌlel.

²¹An ti' wenta Dios pejtel chuqui mi' yujtel ti' tojlel winicob. Mi' choc loq'uel rey, mi' wa'chocon rey. Mi' yʌq'uen i ña'tʌbal jini año' bʌ i ña'tʌbal. Mi' yʌq'uen i p'ip'lel i pusic'al jini p'ip'o' bʌ.

²²Mi' tsictesan i sujmlel mucul tac bʌ, come tilem ti Dios pejtel lac ña'tʌbal. Mi' laj cʌn jini mucul tac bʌ ti pañimil, come i sʌclel pañimil mi' yajñel yic'ot.

²³C Dios, i Dioset c ñojte'elob, mic subeñet wocolix a wʌlʌ. Mic ñuq'uesʌbeñet a c'aba', come tsa'ix a wʌq'ueyon c ña'tʌbal yic'ot c p'ʌtʌlel. Tsa'ix a tsictesʌbeyon i ñajal jini rey yic'ot i sujmlel i ñajal che' bajche' tsaj c'ajtibeyet, che'en Daniel.

²⁴Jini cha'an tsa' majli Daniel ba'an Arioc jini wa'chocobil bʌ i cha'an rey cha'an mi' tsʌnsan pejtel año' bʌ i ña'tʌbal ti Babilonia. Daniel tsi' sube: Mach a tsʌnsan jini año' bʌ i ña'tʌbal. Pʌyʌyon majlel ba'an jini rey. Joñon mi caj c laj tsictesʌben i sujmlel i ñajal, che'en.

²⁵Arioc tsi' bʌc' pʌyʌ majlel Daniel ba'an jini rey Nabucodonosor. Tsi' sube: Wʌ'an juntiquil winic mu' bʌ caj i tsictesʌbeñet i sujmlel a ñajal. I pi'ʌlʌch jini ch'oyolo' bʌ ti Judá tsa' bʌ pʌjyiyob tilel, che'en.

²⁶Jini rey tsi' c'ajtibe Daniel: ¿Mu' ba mejlel a c'ajtesʌbeñon c ñajal? ¿Mejl ba a subeñon i sujmlel? che'en.

²⁷Daniel tsi' yʌlʌ: Ma'anic winic ti' tojlel jini año' bʌ i ña'tʌbal mu' bʌ mejlel i subeñet chuqui tsa' ñajle, mi xwujt mi xq'uel ec', mi jinic yujil bʌ i pʌs ñuc bʌ i melbal, mi xch'ʌcojel.

²⁸Pero an juntiquil Dios chumul bʌ ti panchan mu' bʌ mejlel i tsictesʌbeñet chuqui tsa' ñajle yic'ot i sujmlel jini mucul tac bʌ mach bʌ cʌmbilic lac cha'an. Wolix i tsictesʌbeñet chuqui mi' cajel ti ujtel ti yanto bʌ ora. Mi caj c tsictesʌbeñet a ñajal.

²⁹Che' ñololet ti a wʌyib, c rey, tsa' caji a ña'tan chuqui mi caj i yujtel ti yanto bʌ ora. Dios mu' bʌ mejlel i tsictesan chuqui mi' caj ti ujtel tsi' wʌn pʌsbeyet.

³⁰Tsi' tsictesʌbeyon i sujmlel, pero yom ma' ña'tan, c rey, mach tilemic tic bajñel pusic'al, come lajal jach c ña'tʌbal che' bajche' c pi'ʌlob. Dios woli' tsictesʌbeñet i sujmlel a ñajal, cha'an ma' ña'tan chucoch wʌlʌcña a pusic'al.

³¹Jatet, c rey, tsa' q'uele melbil bʌ i yejtal winic wa'al bʌ ti' tojel a wut. Ma'anic i p'isol i ñuclel. Wen bʌbʌq'uen jax i wut.

³²Melbil ti puro oro i jol. Melbil ti puro plata i tajn yic'ot i c'ʌb. Melbil ti bronce i ñʌc' yic'ot i jol i ya'.

³³Melbil ti tsucu taq'uin i ya' c'ʌlʌl ti' tun oc. Jixcu i yoc, lamital oc'ol, lamital tsucu taq'uin.

³⁴Che' bʌ tsa' q'uele jini melbil bʌ i yejtal winic, tsa' yilol c'ojli ti wits colem Xajlel. Tsi' jats'be i yoc i yejtal jini winic. Tsa' laj jejmi. Jopol tsa' cʌle.

³⁵Ti ora jach tsa' laj jili jini tsucu taq'uin yic'ot jini oc'ol, yic'ot jini oro, yic'ot plata, yic'ot bronce. Jopol tsa' cʌle che' bajche' ts'ubejn ti' yorajlel jajmel, che' bajche' i pat trigo ti' yorajlel c'ajbal. Tsi' laj wets'e majlel jini ic'. Ma'anic tsi' cʌyʌ mi ts'ita'ic. Pero jini Xajlel yilol jach bʌ tsa' c'ojli tsa' sujti ti colem wits tsa' bʌ i wen mʌcta majlel pejtel pañimil.

³⁶Jiñʌch a ñajal. Yomix wʌle mic tsictesʌbeñet i sujmlel.

³⁷Jatet rey, ñumen ñuquet bajche' yambʌ reyob, come Dios am bʌ ti panchan tsi' yʌq'ueyet a yumʌntel yic'ot a p'ʌtʌlel yic'ot a ñuclel.

³⁸Wola' yumʌntel baqui jach chumulob winicob yic'ot bʌte'el yic'ot xwejlel mut. Dios tsi' laj otsʌbeyet ti a p'ʌtʌlel. Jini cha'an mi' yumañetob. Jini cha'an i wentajet i jol jini melbil bʌ i yejtal winic. Melbil i jol ti oro.

³⁹Che' mi' yujtel a yumʌntel mi caj i tejchel yambʌ yumʌl am bʌ i ñuclel, pero mach lajalic bajche' a ñuclel. Che' mi' jilel i yumʌntel mi caj i tejchel i yuxticlel yumʌl lajal bʌ bajche' bronce, mu' bʌ caj i yumʌntel ti pejtelel pañimil.

⁴⁰Ti wi'il mi caj i tejchel i chʌnticlel yumʌl lajal i p'ʌtʌlel che' bajche' tsucu taq'uin. Che' bajche' jini tsucu taq'uin mi' top' pejtel chuqui mi' jats', che' ja'el jini yumʌl mi caj i jisan yambʌ yumʌlob.

⁴¹Tsa' q'uele ja'el i yoc yic'ot i yal i yoc lamital tsucu taq'uin, lamital oc'ol. Jiñʌch i yumʌntel yumʌlob ti mojt ti mojt. An ts'ita' i p'ʌtʌlel jini tsucu taq'uin, pero an i c'unlel jini oc'ol.

⁴²

⁴³Tsa' q'uele xʌbʌl jini tsucu taq'uin yic'ot oc'ol. Che' jach añob ili yumʌlob. Mi' temob i t'an ti ñujpuñijel cha'an mi' p'ʌtesañob i bʌ, pero lolom jach. Come mach mejlic ti xʌjbel tsucu taq'uin yic'ot oc'ol. Jini cha'an mi caj i jejmelob.

⁴⁴Che' woliyob ti yumʌntel, jini Dios am bʌ ti panchan mi caj i wa'chocon yambʌ Yumʌl, mach bʌ yujilic jilel. Mi caj i mʌjlel i cha'an. Mi caj i laj jisan pejtel jini yumʌlob. Mi caj i yajñel ti pejtelel ora.

⁴⁵Jiñʌch i sujmlel jini Xajlel yilol jach bʌ tsa' c'ojli ti wits, jini Xajlel tsa' bʌ i sutq'ui ti ts'ubejn pejtel jini tsucu taq'uin, jini bronce, jini oc'ol, jini plata, yic'ot jini oro. Jini p'ʌtʌl bʌ Dios tsa'ix i pʌsbeyet chuqui mi' caj ti ujtel. Isujm chuqui tsa' ñajle. Mi caj i yujtel che' bajche' tsac subeyet, che'en Daniel.

⁴⁶Jini rey tsi' pʌcchoco i bʌ ba'an Daniel. Tsi' ch'ujutesa. Tsi' yʌc'ʌ mandar cha'an mi' pulbentel i majtan Daniel yic'ot xojocña bʌ pom.

⁴⁷Jini rey tsi' sube: Jiñʌch mero Dios a Dios. Ñumen ñuc bajche' dioste' tac. Jiñʌch i Yum reyob, mu' bʌ i tsictesan i sujmlel jini mucul tac bʌ, come tsa'ix mejli a tsictesʌbeñon i sujmlel c ñajal, che'en jini rey.

⁴⁸Ti ora jini rey tsi' wa'choco Daniel ti ñuc bʌ i ye'tel. Tsi' yʌq'ue cabʌl i majtan letsem bʌ i tojol. Tsi' wa'choco ti gobernador ti jump'ejl tejclum ti Babilonia. Tsi' yʌq'ue ñuc bʌ i ye'tel ti' tojlel jini año' bʌ cabʌl i ña'tʌbal ti' tejclum jini rey.

⁴⁹Daniel tsi' c'ajtibe jini rey cha'an mi' wa'chocon Sadrac, Mesac, yic'ot Abednego ti ñuc tac bʌ i ye'tel ti Babilonia. Che' jini Daniel tsa' aq'uenti ñuc bʌ i ye'tel ti' yumʌntel jini rey.