Read Chol Daniel 5 Bible Online

Daniel 5 - Chol bible

Daniel 5

¹Jini rey Belsasar tsi' pʌyʌ tilel lujunc'al i yuxbajc' (1,000) yumʌlob año' bʌ i ye'tel ti' yumʌntel cha'an mi' melob ñuc bʌ q'uin. Che' woliyob ti q'uiñijel jini rey yic'ot ñuc bʌ yumʌlob, tsa' caji i wen japob vino.

²Che' woli' yʌc'an jini rey, tsi' choco ti ch'ʌmol tilel jini vaso tac melbil bʌ ti oro yic'ot plata i cha'an Dios. Jini rey Nabucodonosor i tatuch Belsasar tsa'ix i loc'sa tilel ti' Templo Dios ya' ti Jerusalén. Jini rey Belsasar yic'ot i pi'ʌlob ti e'tel yic'ot i yijñam yic'ot i yixicob tsi' c'ʌñʌyob ti jap vino

⁴cha'an mi' ch'ujutesañob jini dios tac melbil bʌ ti oro, ti plata, ti tsucu taq'uin, ti te', yicot ti xajlel.

⁵Che' woliyob ti q'uiñijel, ti jini jach bʌ ora tsa' caji i q'uelob ya'an c'ʌbʌl ti' tojel jini lámpara woli bʌ ti ts'ijb ya' ti' ñʌc' i ts'ajquil otot am bʌ i bojñil. Jini rey ja'el tsi' q'uele jini c'ʌbʌl woli bʌ ti ts'ijb.

⁶Sʌclic'an i wut ti bʌq'uen. Tsa' caji ti tsiltsilñiyel i yoc. Ma'anix i p'ʌtʌlel.

⁷Jini rey tsa' caji ti oñel. Tsi' pʌyʌ tilel jini winicob año' bʌ cabʌl i ña'tʌbal, jini xtic'layajob yic'ot jini xq'uel ec'ob. Jini rey tsi' subeyob: ¿Majqui mi' cʌn jini ts'ijbubil bʌ? Mi tsi' tsictesʌbeyon i sujmlel, mi caj cʌq'uen i lʌp wen i t'ojol bʌ i pislel yic'ot ujʌl melbil bʌ ti oro. Che' ja'el mi caj cʌq'uen i ye'tel lʌc'ʌl tic t'ejl, che'en.

⁸Pejtel año' bʌ i ña'tʌbal tsa' ochiyob ba' woli' mel q'uin jini rey, pero ma'anic tsa' mejli i cʌñob jini ts'ijbubil bʌ cha'an mi' tsictesʌbeñob i sujmlel.

⁹Tsa' utsi caji ti bʌq'uen jini rey Belsasar. Tsa' yʌjñi i wut. Tsa' toj sajtiyob i pusic'al jini ñuco' bʌ i ye'tel woli bʌ i pi'leñob.

¹⁰I ña' jini rey tsi' yubi chuqui woli' yujtel. Tsa' ochi ya' ba' woliyob ti q'uiñijel. Tsi' yʌlʌ: La' ajniquet ti pejtelel ora, rey. Mach ma' mel a pusic'al, mach sʌc'aquet ti bʌq'uen.

¹¹An juntiquil winic ti a yumʌntel but'ul bʌ ti' yEspíritu jini Ch'ujul bʌ Dios. Che' cuxul to a tat, tsi' q'uele wen cabʌl i ña'tʌbal, wen p'ip' i jol. Lajal i ña'tʌbal che' bajche' jini diosob. Jini cha'an jini rey Nabucodonosor a tatuch tsi' wa'choco ti' yum jini año' bʌ cabʌl i ña'tʌbal, jini yujilo' bʌ i pʌs ñuc tac bʌ i melbal, jini xq'uel ec'ob, jini xch'ʌcojelob yic'ot mu' bʌ i subob chuqui mi caj i yujtel ti pañimil.

¹²Come Daniel tsa' bʌ q'uextʌbenti i c'aba' ti Beltsasar an i cha'an wen ñuc bʌ espíritu yic'ot cabʌl i ña'tʌbal yic'ot i p'ip'lel, cha'an mi' tsictesan i sujmlel ñajal. Mi' ch'ʌmben isujm jini ts'ijbubil tac bʌ wocol bʌ ti ña'tʌntel yic'ot jini wen mucul tac bʌ. Jini cha'an pʌyʌ tilel Daniel cha'an mi' tsictesʌbeñet i sujmlel jini t'an ts'ijbubil bʌ ya' ti' ts'ajc, che'en i ña' Belsasar.

¹³Jini cha'an jini rey tsi' pʌyʌ tilel. Tsi' c'ajtibe: ¿Jatet ba jini Daniel tsa' bʌ i pʌyʌ tilel c tatuch yic'ot xcʌjchelob ch'oyolo' bʌ ti Judá?

¹⁴An abi ti a tojlel i yespíritu jini diosob yic'ot cabʌl a ña'tʌbal. Wen p'ip' abi a jol.

¹⁵Awilan tsac pʌyʌ tilel jini caldeojob año' bʌ cabʌl i ña'tʌbal cha'an mi' q'uelob ili ts'ijbubil bʌ, cha'an mi' tsictesʌbeñoñob i sujmlel, pero ma'anic tsa' mejliyob.

¹⁶Tsa cubi mi mejlel a tsictesan i sujmlel jini mucul tac bʌ. Mi mejlel a toj'esan chuqui wocol tac ti toj'esʌntel. Mi awujil a q'uelbeñon jini ts'ijbubil bʌ cha'an ma' tsictesʌbeñon i sujmlel, mi caj cʌq'ueñet a lʌp wen i t'ojol jax bʌ a bujc, yic'ot ujʌl melbil bʌ ti oro. Mi caj cʌq'ueñet a we'tel lʌc'ʌl tic t'ejl, che'en.

¹⁷Daniel tsi' jac'be: Mach comic c majtan. Loto mi a wom, o aq'uen yambʌ. Joñon mi caj j q'uelbeñet jini ts'ijbubil bʌ. Mi caj c tsictesʌbeñet i sujmlel.

¹⁸Jini Dios am bʌ ti Chan tsi' yʌq'ue i yumʌntel yic'ot i ñuclel yic'ot i p'ʌtʌlel a tatuch Nabucodonosor.

¹⁹Pejtel jini tejclum tac ti pañimil yujilo' bʌ t'an ti chajp ti chajp tsi' wen bʌc'ñayob cha'an cabʌl jax i ñuclel aq'uebil bʌ ti Dios. Tsiltsilñayob ti' tojlel. Come tsi' tsʌnsa majqui jach yom, pero mi yom i col, cuxul tsa' ajni. Tsi' yʌq'ue i ñuclel jini c'uxbibil bʌ i cha'an. Tsi' chilbe i ñuclel jini ts'a'lebil bʌ i cha'an.

²⁰Pero tsa' tsʌts'a i pusic'al che' bʌ tsa' caji' q'uel i bʌ ti ñuc. Che' bʌ tsi' chañ'esa i bʌ, tsa' chilbenti i yumʌntel yic'ot i ñuclel.

²¹Tsa' chojqui loq'uel ti' tojlel winicob. Tsa' sujti che' bajche' bʌte'el. Tsa' ajni ti jamil. Tsi' c'uxu jam che' bajche' wacax. Tsa' ach'a i bʌc'tal ti tijil jinto tsi' cʌñʌ jini Dios am bʌ ti Panchan am bʌ i p'ʌtʌlel ti' tojlel yumʌlob ti pañimil. Mi' wa'chocon ti yumʌl majqui jach yom.

²²Jatet Belsasar i yalobilet jini rey Nabucodonosor. Wen a wujil chuqui tsa' ujti ti' tojlel a tat, pero ma'anic tsa' peq'uesa a pusic'al.

²³Tsa' ts'a'le lac Yum am bʌ ti Panchan. Tsa' choco ti ch'ʌmol pejtel i vaso tac yic'ot i taza tac cha'an ma' c'ʌn ti jap vino yic'ot a pi'ʌlob ti e'tel, cha'an ma' ñuq'uesan a dios tac melbil bʌ ti oro, ti plata, ti bronce, ti tsucu taq'uin, ti te' yic'ot ti xajlel, anquese ma'anic i ña'tʌbal. Ma'anic chuqui mi' yubiñob, ma'anic chuqui mi' q'uelob. Maxto anic tsa' ch'ujutesa jini Dios woli bʌ i yʌq'ueñet a cuxtilel ba' cʌyʌl pejtel chuqui ma' mel.

²⁴Jini cha'an Dios tsi' choco tilel jini c'ʌbʌl cha'an mi' ts'ijbun ili t'an: MENE, MENE, TEKEL, UPARSIN.

²⁶Mux c subeñet i sujmlel ti chajp ti chajp. MENE: Dios tsa'ix i p'isi i yorajlel a yumʌntel. Tsa'ix i yujtesa.

²⁷TEKEL: Tsa' p'isleyet ti balanza. Mach uts'atic mi' q'uelet Dios.

²⁸UPARSIN: Woli' t'oxtʌl a yumʌntel. Aq'uebilix ti' wenta jini medojob yic'ot persiajob, che'en Daniel.

²⁹Jini rey Belsasar tsi' subu cha'an mi' yʌq'uentel i majtan Daniel. Tsa' aq'uenti i lʌp i t'ojol jax bʌ i bujc yic'ot ujʌl melbil bʌ ti oro. Tsa' aq'uenti ñuc bʌ i ye'tel lʌc'ʌl ti' t'ejl jini rey.

³⁰Ti jim bʌ ac'ʌlel tsa' tsʌnsʌnti Belsasar i rey caldeojob.

³¹Darío yumʌl bʌ ti Media tsi' ch'ʌmbe i yumʌntel. Anix cha'p'ejl i chʌnc'al (62) i jabilel Darío che' bʌ tsi' teche i yumʌntel.