Read Chol Oseas 2 Bible Online

Oseas 2 - Chol bible

Oseas 2

¹La', calobil Jezreel. Yom ma' cha' otsʌbeñob i c'aba' a wijts'iñob. Pejcan Loammi ti Ammi. Pejcan Loruhama ti Ruhama. (Ammi mi' yʌl: “C cha'añetʌch”. Ruhama mi' yʌl: “P'untʌbilet”, come Dios wolix i p'untañob.)

²Yom ma' pʌy a ña' ti wocol t'an, come tsa'ix ochi ti' yijñam yambʌ winic. Mach quijñamix. Tsi' cʌyʌyon. Suben ti wocol t'an cha'an mi' cʌy i ts'i'lel, cha'an mach mi' chʌn pi'leñob yaño' bʌ.

³Mi mach yomic i jac', mi caj c junyajlel jochben i pislel. Pits'il mi caj j cʌy che' bajche' tsi' yila pañimil. Mi caj c chilben i bʌl i ñʌc' yic'ot i ya'al che' bajche' ti tiquin lum ba' mi' chʌmelob ti wi'ñal yic'ot tiquin ti'.

⁴Ma'anic mi caj c p'untan i yalobilob, come yambʌ i tat. Mach c cha'añobic.

⁵Come i ña' tsi' cha'le i ts'i'lel. Come tsi' yʌlʌ: “Muq'uix c majlel yic'ot winicob cha'an mi' yʌq'ueñoñob chuqui mij c'ux yic'ot chuqui mic jap yic'ot chuqui mic lʌp”, che'en. Quisintic jax tsi' mele.

⁶Jini cha'an mi caj c joy mʌcben i bijlel ti ch'ix. Mi caj c joy ñup'ben i bijlel ti corral cha'an ma'anix mi' taj baqui mi' loq'uel.

⁷Che' mi' cha' tsajcan jini winicob, ma'anic mi caj i tajob. Mi caj i lon sʌclañob, pero ma'anix mi caj i tajob. Che' jini mi caj i yʌl: “Muq'uix c cha' sujtel ba'an c ñoxi'al, come tijicñayon quic'ot. Ch'ijiyemon wʌle”, che'en.

⁸Ma'anic mi' ña'tan mi joñoñʌch woli bʌ cʌq'uen pejtel chuqui tac an i cha'an. Tsa'ix cʌq'ue jini oro yic'ot plata tsa'ix bʌ i c'ʌñʌ cha'an i majtan jini Baal. Jiñʌch i dios.

⁹Jini cha'an ma'anix mi caj c chʌn aq'uen ixim yic'ot i ya'lel ts'usub yic'ot bujcʌl cha'an mi' lʌp.

¹⁰Wʌle pits'il mi caj j cʌy ti' tojlel winicob tsa' bʌ i pi'leyob ti' ts'i'lel. Che' jini ma'anix mu' bʌ caj i coltan che' mi cʌc' ti quisin.

¹¹Mi caj c chilben pejtel jini tijicña bʌ. Mach chʌn mejlix i cha'len q'uin che' ti' yorajlel c'aj o yic'ot i tejchibal uw.

¹²Mi caj c lu' jisʌben i ts'usubil yic'ot higuerajil, come i majtan abi tsa' bʌ i yʌq'ueyob i yaj c'uxbiyajob. Jini cha'an joñon mi caj c sutq'uin ti mate'el jini ts'usubil yic'ot higuerajil. Jini bʌte'el mi caj i laj c'ux i wut pʌc'ʌbʌl.

¹³Mi caj cʌq'uen i toj i mul cha'an tsi' pulbe pom jini Baal dios. Tsi' ch'ʌlʌ i bʌ ti ujʌl yic'ot mʌtc'ʌb wen letsem bʌ i tojol. Tsa' majli i sʌclan i winic. Ma'anix tsi' chʌn ña'tayon. Jini cha'an mi caj i toj i mul. Jiñʌch laj cʌntesʌntel ti lac Yum.

¹⁴Pero mu' to caj c cha' pejcan ti uts bʌ t'an. Mi caj c pʌy majlel ya' ti jochol bʌ lum cha'an mij c'unte' pejcan ti uts bʌ t'an.

¹⁵Che' jini mi caj c cha' aq'uen jini ts'usubil. Ya' ba' ch'ijiyem cha'an cabʌl wocol mi caj c ñuq'uesʌben i pusic'al. Che' jini wen tijicña jax mi caj i yubin. Ya'i mi' cajel ti c'ay che' bajche' ti yambʌ ora che' xch'oc to, che' bʌ tsaj colta loq'uel ti Egipto.

¹⁶Lac Yum tsi' sube Israel: Ti jini tal to bʌ ora mi caj a pejcañon ti a ñoxi'al. Ma'anix mi caj a chʌn pejcañon che' bajche' tsa' pejca Baal.

¹⁷Israel, mi caj cʌc' ti ñajʌyel a cha'an a dioste' tac. Ma'anix mi caj a chʌn pejcʌben i c'aba'.

¹⁸Ti jim bʌ ora mi caj cuts'esʌbeñet pejtel jini jontol tac bʌ bʌte'el yic'ot pejtel jini cotcotña bʌ ti lum, yic'ot xwejlel mut. Mi caj cʌc' ti lajmel pejtel guerra. Che' jini ma'anix i c'ʌjñibal jalʌjb mi espada. Ti jim bʌ ora wen tijicñayet mi caj a wajñel ti' ñʌch'tilel a pusic'al baqui jach ma' majlel, come ma'anix a contrajintel.

¹⁹Mi caj c cha' pʌyet cha'an ma' wajñel quic'ot ti pejtelel ora. Mi caj c pʌyet ti toj bʌ c pusic'al. Mi caj c melet ti toj ti' yutslel c pusic'al cha'an wolic p'untañet.

²⁰Mi caj c cha' pʌyet cha'an xuc'ul ma' wajñel quic'ot. Che' jini mi caj a wen cʌñon, che'en lac Yum.

²¹Lac Yum tsi' yʌlʌ: Ti jim bʌ ora mi caj cʌq'uen mandar tocal cha'an mi' yʌq'ueñet ja'al yic'ot i ye'eblel panchan. Che' jini mi caj i cha' ach'an jini cholel yic'ot ts'usubil yic'ot olivojil. Jini panchan yic'ot pañimil mi caj i c'ʌyiñon: “Dios mi' cha'len pac'. Dios mi' yʌq'ueñonla pejtel chuqui yom ti lac tojlel”. Che' mi caj i yʌlob.

²³Ti jim bʌ ora joñon mi caj c pʌc' israelob yilal. Mi caj c cha' p'untan jini mach bʌ p'untʌbilobic. Mi caj c subeñob jini mach bʌ calobilobic: “Calobiletixla”, cho'on. Mi caj i jac'ob: “C Yumet lojon, c Dioset lojon”. Che' mi caj i yʌlob, che'en lac Yum.