Read Chol Joel 1 Bible Online

Joel 1 - Chol bible

Joel 1

¹Jiñʌch i t'an lac Yum tsa' bʌ subenti Joel i yalobil Petuel:

²Ubinla, jatetla anix bʌ la' jabilel. Ñich'tanla ti la' pejtelel, chumulet bʌ la ti' lumal Judea. Ma'anic ba' ora tsa' la' wubi ili t'an c'ʌlʌl che' alʌlet to la. Ma'anic ba' ora tsi' yubiyob la' ñojte'elob.

³Yom mi la' cha' suben la' walobilob. La' i subeñob i yalobilob ja'el.

⁴Che' mi' ñumel i c'ux la' pac' jini mote' sajc', mi' tilel alʌ sajc' cha'an mi' c'uxben i colobal. Mi caj i tilel jini colem jijch cha'an mi' c'ux jini tsa' bʌ i cʌyʌ jini alʌ sajc'. Ti wi'il mi caj i ñumel alʌ chup ja'el.

⁵Xyʌc'ʌjelet bʌ la, ch'ojyenla. Cha'lenla uq'uel, come tsa' asiyi jini ts'usubil. Tsa'ix jili pejtelel i ya'lel la' ts'usub.

⁶Come wen cabʌl jini jontol bʌ sajc' tic lum, mach mejlic ti tsijquel. Jay i yej bajche' i yej bajlum.

⁷Tsa'ix i laj jisa ts'usubil. Tsa'ix i laj ñujlube i pat jini bʌcch'umte'. Sʌsʌc tsa' cʌle i c'ʌb te'.

⁸Cha'lenla uq'uel che' bajche' jini c'ajtibil bʌ xch'oc che' mi' chʌmel jini ch'iton winic woli bʌ i c'ajtin.

⁹Jilemix i wut jam yic'ot i ya'lel ts'usub mu' bʌ i ch'ʌmob ochel ti mal Templo cha'an i majtan lac Yum. Jatetla motomajob, x'e'telet bʌ la i cha'an lac Yum, yom mi la' mel la' pusic'al.

¹⁰Ma'anix chuqui an ti pʌc'ʌbʌl. Wen ch'ijiyemob ti pejtelel pañimil, come jilemix jini trigo yic'ot ts'usub yic'ot jini aceite loq'uem bʌ ti olivote'.

¹¹Melelʌch, woli' toj sajtel la' pusic'al mu' bʌ la' cha'len e'tel ti lum. Cha'lenla uq'uel mu' bʌ la' cha'len e'tel ti ts'usubil tac, come tsa'ix jili jini trigo yic'ot cebada.

¹²Tiquinix i yʌq'uil jini ts'usubil. Tsa'ix chʌmi jini bʌcch'umte'. Tsa'ix tiqui jini granado te'. Tsa'ix tiqui jini manzano te'. Pejtel jini te' tac tsa'ix tiqui. Tsa'ix jili i tijicñʌyel winicob.

¹³Motomajob*, yom mi la' lʌp coxtal cha'an i ch'ijiyemlel la' pusic'al. I winiquet bʌ la Dios, ñusanla ac'ʌlel ti uq'uel ba'an pulʌntib, come ma'anix trigo yic'ot i ya'lel ts'usub cha'an mi la' wʌq'uen i majtan Dios.

¹⁴Tempanla winicob x'ixicob. Subeñob cha'an mi' cha'leñob ch'ajb. Pʌyʌla tilel ti pejtelob yic'ot añobix bʌ i jabilel ya' ti' Templo lac Yum Dios. Cha'lenla uq'uel ti' tojlel lac Yum.

¹⁵Aya, talix jini q'uin che' mi caj i cha'len meloñel Dios. Talix jini q'uin che' mi caj i cha'len jisaya jini Mach bʌ Anic i P'isol i P'ʌtʌlel.

¹⁶Jini i bʌl lac ñʌc' tsa'ix jili ti lac wut. Tsa'ix jili ja'el i tijicñʌyel yic'ot i ñʌch'tilel lac pusic'al ya' ti Templo.

¹⁷Jini pac' tsa'ix oc'mi ti lum. Jocholix i yotlel yic'ot i yajñib jini trigo, come tsa' to'o tiqui ya' ti cholel.

¹⁸Jini alʌc'ʌl tsa' c'uñ'a cha'an wi'ñal. Mi' caj ti uq'uel ñumel jini tat wacax come ma'anic potrero. Wen yajyajax jini tiñʌme' come ma'anix chuqui mi' taj i c'ux.

¹⁹C Yum, mic pejcañet ti c'am bʌ t'an, come jini jajmel tsa'ix i tiquesa pejtel potrero yic'ot pejtel te'.

²⁰Jini bʌte'el ja'el mi' pejcañet ti c'am bʌ t'an come ma'anix ja'. Tsa'ix tiqui tac jini pa'. Jini potrero woli' pulel ti q'uin.