Read Chol Joel 3 Bible Online

Joel 3 - Chol bible

Joel 3

¹Woli' chʌn sub lac Yum: Ti jini q'uin che' mic cha' aq'uen i wenlel año' bʌ ti Judá yic'ot ti Jerusalén,

²mi caj c pʌy majlel soldadojob año' bʌ ti pañimil ya' ti joctʌl am bʌ i c'aba' Lac Yum Mi' Cha'len Meloñel. Mi caj c tsictesʌbeñob i mul cha'an tsi' tic'layob c tejclumob. Tsi' pucuyob c cha'año' bʌ ti ñajt bʌ lum. Tsi' t'oxbeyob i bʌ jini c lum.

³Tsi' cha'leyob alas cha'an mi' yajcañob majqui mi caj i ch'ʌm winicob x'ixicob cha'an mi' yochelob ti' mozo. Tsi' yʌc'ʌyob ch'iton ti' q'uexol ts'i'lel x'ixic. Tsi' yʌc'ʌyob xch'oc ti' q'uexol i ya'lel ts'usub.

⁴Mach yomic mi la' xʌ' otsan la' bʌ añet bʌ la ti Tiro yic'ot ti Sidón yic'ot ti Filistea. Ma'anic i mul israelob ti la' tojlel cha'an mi la' q'uextʌbeñob. Mi woliyʌch la' ña'tan la' jats'ob, cha'lenla bʌq'uen come mi caj c cha' jats'etla ti ora. Mi caj c cha' q'uextʌbeñetla la' jontolil.

⁵Tsa'ix la' chilbeyon c plata yic'ot oro yic'ot pejtel letsem tac bʌ i tojol. Tsa'ix la' ch'ʌmʌ majlel ti' yotlel la' dios tac.

⁶Ya' ba'an griegojob tsa' la' choño' winicob x'ixicob loq'uemo' bʌ ti Judá yic'ot Jerusalén. Ñajt tsa' la' pʌyʌyob majlel.

⁷Mi caj c cha' pʌyob tilel ya' ba' tsa' la' choñoyob. Mi caj j q'uextʌbeñetla pejtelel la' mul.

⁸Mi caj c chon la' walobilob ba'an c winicob ti Judá mu' bʌ caj i cha' choñob ti ñajtʌl ba'an sabeojob. Che'ʌch tsi' yʌlʌ lac Yum.

⁹Subeñob ti pejtelel pañimil: “Chajpan la' bʌ cha'an guerra. Pʌyʌla wen ch'ejl bʌ soldadojob. Tempanla pejtelel la' soldadojob.

¹⁰Yom mi la' wulmesan top'o' lum cha'an mi la' pʌntesan ti espada. Jats'ʌla jini e'tijibʌl cha'an pora cha'an mi' pʌntʌyel ti lanza. La' p'ʌtacob jini c'uño' bʌ.

¹¹Tempan la' bʌ. La'la winicob x'ixicob ti pejtelel pañimil”. Wʌle c Yum, pʌyʌ tilel a soldadojob.

¹²Lac Yum tsi' jac'ʌ: Tempan la' bʌ, winicob ti pejtelel lum tac. La'la ti joctʌl i c'aba' Lac Yum Mi' Cha'len Meloñel. Come ya'i mi caj c mel pejtelel winicob ti pañimil, che'en lac Yum.

¹³I yorajlelix meloñel. C'ʌnix i wut ts'usubil. La'ix tejchic ti tujq'uel. Wilts'unixla i yʌjts'ib, come wen cabʌl i jontolil winicob.

¹⁴Bajc'ʌl winicob x'ixicob añobix ti joctʌl Melobʌjʌl. Come lʌc'ʌlix tal i Q'uiñilel lac Yum ya' ti Joctʌl Ba' Mi Caj i Melob i Bʌ.

¹⁵Mux i mʌjquel q'uin yic'ot uw. Jini ec' ma'anix mi caj i chʌn pʌs i c'ʌc'al.

¹⁶Lac Yum mi caj i cha'len c'am bʌ t'an ya' ti' Templo ti Jerusalén. Mi caj i tilel yujquel lum. Mi caj i ñijcʌyel panchan. Pero wen uts lac Yum ti' tojlel i cha'año' bʌ. I xuctilelʌch jini israelob.

¹⁷Mi caj la' cʌñon la' Yumon, la' Dioson, che'en. Wʌ' chumulon ti Sion jini ch'ujul bʌ wits c cha'an. Jerusalén c cha'añʌch ti pejtelel ora. Tal i yorajlel ma'anix mi caj i chʌn ñumelob soldadojob ch'oyolo' bʌ ti ñajtʌl.

¹⁸Mi caj i chʌjq'uel jini tsaj bʌ i ya'lel ts'usub ti wits. Mi' caj ti oñ'an lech che' bajche' pa' ti bujtʌl. Jini tiquin bʌ pa' tac ya' ti Judá mi caj i cha' cuxtʌyel. Jini cuxul bʌ ja' mi caj i wʌjlel loq'uel ya' ti' Templo lac Yum cha'an mi' yʌch'esan jini joctʌl Sitim.

¹⁹Mi caj i jisʌntel Egipto yic'ot Edom cha'an i jontolil ti' contra i p'olbal Judá, come tsi' tsʌnsayob winicob x'ixicob mach bʌ añobic i mul.

²⁰Mi caj i chʌn ajñelob winicob x'ixicob ti Judá ti pejtelel ora. Wʌ' ti Jerusalén mi caj i yajñelob i yalobilob ti lajm ti lajm.

²¹Mi caj j q'uextʌbeñob i jontolil pejtelel tsa' bʌ i tsʌnsayob c cha'año' bʌ. Ma'anic mi caj c ñusʌbeñob i mul tsa' bʌ i tic'layob. Come woliyon ti chumtʌl wʌ' ti Jerusalén quic'ot c cha'año' bʌ, che'en lac Yum.