Read Chol Amos 2 Bible Online

Amos 2 - Chol bible

Amos 2

¹Lac Yum woli' yʌl: Cabʌlix i jontolil Moab. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' pulbeyob i bʌquel i rey Edom c'ʌlʌl tsa' sujti ti tan.

²Jini cha'an mi caj c choc tilel c'ajc ti Moab. Mi caj c laj pulben jini wen melbil tac bʌ i yotot ya' ti Queriot. Jini año' bʌ ti Moab mi' cajelob ti chʌmel ti guerra. Bajc'ʌl winicob mi' cajelob ti oñel che' woli' wustʌl trompeta tac.

³Mi caj c junyajlel jisan jini rey ti Moab. Mi caj c tsʌnsan pejtelel i yumob ja'el, che'en lac Yum.

⁴Lac Yum woli' yʌl: Cabʌlix i jontolil Judá. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' ñusʌbeyon c t'an, ma'anic tsi' jac'beyon c mandar. Tsa' sajtiyob cha'an tsi' ñopoyob lot. Tsi' ñopoyob dioste' tac che' bajche' i tatob.

⁵Jini cha'an mi caj c choc tilel c'ajc ya' ti Judá. Mi caj c laj pulben jini wen melbil tac bʌ i yotot ti Jerusalén.

⁶Lac Yum woli' yʌl: Cabʌlix i jontolil Israel. Tsa' cʌlʌx ñumi i p'isol i jontolil. Mach chʌn cujchix c cha'an, come mi' choñob jini mach bʌ añobic i mul cha'an i wo'lel ti taq'uin. Mi' c'ʌñob i tojol jini p'ump'uño' bʌ cha'an mi' mʌñob i huarach.

⁷Mi' yʌq'ueñob wocol bʌ e'tel jini p'ump'uño' bʌ. Mi' t'uchtañob che' bajche' ts'ubejn. Ñumen ti p'is mi' tic'lañob ti e'tel jini utso' bʌ. Jini ch'iton yic'ot i tat mi' comol pi'leñob jini jach bʌ xch'oc, cha'an mi' yʌc'ob ti wajlentel jini ch'ujul bʌ j c'aba'.

⁸Ya' ti' t'ejl pejtel pulʌntib mi' ñoltʌlob ba' tajsibil i pislel tsa' bʌ i ch'ʌmʌyob ti prenda. Ti' yotot Dios mi' japob vino tsa' bʌ i ch'ʌmʌyob cha'an multa.

⁹Pero joñon tsac jisa jini amorreojob tsa' bʌ i contrajiyetla. Lajal i chanlel amorreojob bajche' ch'ujte', wen tsʌtsob bajche' c'olol. Pero tsac jisayob che' bajche' te'. Tsac jisʌbe i wut am bʌ ti' c'ʌb. Tsac bocbe i wi' chucul bʌ ti lum.

¹⁰Joñon tsac pʌyʌyetla loq'uel ti' lumal Egipto. Cha'c'al jab tsac pʌyʌyetla majlel ti jochol bʌ lum cha'an mi la' ch'ʌm i lumal amorreojob.

¹¹Tsac wa'choco lamital ch'iton bʌ la' walobilob cha'an mi' yochelob ti x'alt'añob yic'ot nazareojob*. Winicob x'ixicob ti Israel, jac'beñonla. ¿Mach ba isujmic? che'en lac Yum.

¹²Pero jatetla tsa' la' wʌq'ueyob i jap vino nazareojob. Tsa' la' tiq'ui jini x'alt'añob: “Mach mi la' cha'len subt'an”, che'etla.

¹³La' wilan, mi caj c teñetla che' bajche' mi' ten lum carreta che' but'ul ti seset cʌchbil bʌ jam.

¹⁴Lolom jach mi' ña'tan puts'el jini ch'ejl bʌ ti xʌmbal. Mi caj i jilel jini ch'ejl bʌ. Jini ñuc bʌ mach mejlic i coltan i bʌ.

¹⁵Jini mu' bʌ i ch'ʌm jalʌjb ma'anic mi caj i mʌjlel i cha'an. Jini ch'ejl bʌ ti xʌmbal ma'anic mi caj i coltan i bʌ. Anquese c'ʌchʌl ti caballo, ma'anic mi caj i coltan i bʌ.

¹⁶Ti jim bʌ ora jini ñumen ch'ejl bʌ i pusic'al ti' tojlel jini ñuco' bʌ xguerrajob mi caj i choc i ye'tijib cha'an guerra. Mi' caj ti puts'el. Che'ʌch woli' yʌl lac Yum.