Read Chol Amos 3 Bible Online

Amos 3 - Chol bible

Amos 3

¹Winicob x'ixicob ti Israel, ubinla ili t'an tsa' bʌ i yʌlʌ lac Yum ti la' contra yic'ot ti' contra pejtel la' pi'ʌlob año' bʌ ti Israel: Tsac pʌyʌyetla loq'uel ti' lumal Egipto.

²Jatet jach j cʌñʌyetla ti' tojlel pejtel tejclum tac ti pañimil. Jini cha'an mi caj c ju'sʌbeñetla la' pusic'al cha'an pejtelel la' jontolil.

³¿Temel ba mi' majlelob cha'tiquil che' cha'p'ejlob i pusic'al?

⁴¿Mu' ba i cha'len t'an bajlum ti mate'el che' ma'anic i we'el? ¿Mu' ba i cha'len t'an alʌ bajlum ti ch'en che' ma'anic chuqui tsi' taja?

⁵Ya' ba' ma'anic yac, ¿mu' ba caj i chujquel te'lemut? ¿Mu' ba i yajlel jini yac che' ma'anic chuqui mi' ñijcan?

⁶Che' mi' wustʌl trompeta ti tejclum, ¿mach ba anic mi' cajelob ti bʌq'uen jini tejclumob? Che' mi' tilel wocol ti tejclum, ¿mach ba tilemic ti lac Yum? che'en.

⁷Isujm, ma'anic chuqui mi' cha'len lac Yum Dios mi ma'anic tsi' ñaxan subeyob x'altañob i cha'an, cha'an mi' cha' subob.

⁸Jini bajlum mi' cha'len oñel. ¿Mach ba yomic mi lac bʌc'ñan? Lac Yum Dios tsa'ix i cha'le t'an. ¿Mach ba yomic mic cha' sub?

⁹Tsi' subeyon: Yom ma' pejcan jini yumʌlob ti Asdod yic'ot ti Egipto año' bʌ ti ts'ajquibil bʌ i yotot. Subeñob: “Tempan la' bʌ ya' ti' pam wits ti Samaria. Q'uelela pejtelel i jontolil jini año' bʌ ti Samaria. Q'uelela bajche' mi' tic'lañob i pi'ʌlob.

¹⁰Mach yujilobix i melol chuqui toj. Chuqui tac mi' tajob ti xujch' yic'ot ti leto mi' lotob ti ts'ajquibil bʌ i yotot”. Che' yom ma' subeñob, che'en lac Yum.

¹¹Jini cha'an lac Yum Dios woli' yʌl: Tal la' contra cha'an mi' joy ñup'etla. Mux i jem jini wa'chocobil bʌ la' cha'an. Mux i xujch'ibeñet la' chubʌ'an, che'en.

¹²Lac Yum tsa' cha' caji' yʌl: Jini israelob chumulo' bʌ ti Samaria wocol mi caj i loq'uelob ya'i. Che' bajche' xcʌnta tiñʌme' mi' loc'sʌben ti' yej bajlum cha'ts'ijt i bʌquel tiñʌme' yic'ot i ñi'il jach i chiquin, che' ja'el mi caj i coltʌntelob israelob. Jini jach i xujt'il i chubʌ'an mi caj i cʌybentelob.

¹³Ubinla, subenla i yalobilob Jacob: “Lac Yum, i Dios Panchan yic'ot Pañimil woli' yʌl:

¹⁴Ti ili q'uin che' mic ju'sʌbeñob i pusic'al jini israelob cha'an tsi' ñusʌbeyon c t'an, mi caj c jem jini pulʌntib tac am bʌ ti Betel. I xulub pulʌntib mi caj i tsejpel jubel.

¹⁵Mi caj c jembeñob i yotot ricojob ba' chumulob ti' yorajlel tsʌñal, yic'ot i yotot tac ba' chumulob ti' yorajlel ticwal. Jini otot melbil bʌ ti marfil mi' cajel ti jilel yic'ot yan tac bʌ colem otot jinto mi laj jilel”. Che'ʌch woli' yʌl lac Yum.