Read Chol Amos 5 Bible Online

Amos 5 - Chol bible

Amos 5

¹Ubinla ili t'an woli bʌ c sub ti la' contra, winicob x'ixicob ti Israel. Jiñʌch ch'ijiyem bʌ t'an.

²Yajlemix jini xch'oc Israel. Ma'anix mi' chʌn ch'ojyel. Cʌybilix ti lum, ma'anic majch mi caj i tech ch'ojyel.

³Come lac Yum mi' yʌl: Ti jini tejclum ba' tsa' loq'uiyob ti guerra mil winicob, jo'c'al jax mi' sujtelob. Ti jini tejclum ba' tsa' loq'uiyob ti guerra jo'c'al, lujuntiquil jax israelob mi' sujtelob, che'en.

⁴Come lac Yum woli' suben israelob: La'la ba' añon cha'an cuxul mi la' wajñel.

⁵Mach mi la' sajcan la' coltʌntel ti Betel. Mach mi la' wochel ti Gilgal. Mach mi la' ñumel ti Beerseba, come jini año' bʌ ti Gilgal cʌchʌlob mi caj i pʌjyelob majlel ti yambʌ lum. Jini año' bʌ ti Betel mi caj i jilelob, che'en.

⁶Sajcan la' coltʌntel ti lac Yum. Che' jini cuxul mi caj la' wajñel. Machiqui mi caj i choc tilel c'ajc i jisʌben i yotot tac José. Ma'anic mi caj i yajpel jinto mi' laj pulel. Ma'anix i coltʌntel jini año' bʌ ti Betel.

⁷Ubinla jatetla mu' bʌ la' soc chuqui toj, mu' bʌ la' ts'a'len chuqui isujm:

⁸Jini Dios tsa' bʌ i mele ec' tac i c'aba' Xʌñʌb yic'ot Cajchiñʌc' mi' pʌntesan ac'ʌlel ti q'uiñil. Mi' yʌc' ti bʌjlel q'uin cha'an mi' yic'an pañimil. Mi' ch'uy letsel ti tocal jini ja' am bʌ ti colem ñajb cha'an mi' cha' choc jubel ja'al ti pam lum. Jini Dios i c'aba'ʌch lac Yum.

⁹Jiñʌch mu' bʌ i bʌc' jisan jini p'ʌtʌl bʌ winicob yic'ot wen ts'ajquibil bʌ i yotot.

¹⁰Winicob x'ixicob mi' ts'a'leñob jini xuc'ulo' bʌ i t'an mu' bʌ i subeñob i mul.

¹¹Mi la' t'uchtan jini p'ump'un bʌ. Mi la' chilben i trigo. Jini cha'an ma'anic mi caj la' wajñel ti la' wotot anquese tsa' la' wen mele ti xajlel. Ma'anic mi caj la' jap i ya'lel ts'usubil anquese la' pʌc'balʌch.

¹²Come cujil cabʌlix la' mul. Ti' tsʌtslel la' pusic'al tsa'ix la' ñusʌbeyon c t'an. Mi la' tic'lan jini tojo' bʌ. Mi la' ch'ʌm la' majtan ti mucul. Mi la' xit choc loq'uel jini p'ump'uño' bʌ ti melobʌjʌl.

¹³Jini cha'an ma'anic mi' letsan i t'an jini am bʌ i ña'tʌbal come jontoletla. Tsa' cʌlʌx p'ojli la' jontolil.

¹⁴Melela chuqui uts'at. Mach la' ñop chuqui jontol. Che' jini cuxul mi caj la' wajñel. Mi caj i yujtel che' bajche' woli la' wʌl. Lac Yum, i Dios Panchan yic'ot Pañimil, mi caj i yajñel la' wic'ot.

¹⁵Ts'a'lenla jontolil. C'uxbinla chuqui uts'at. Cha'lenla toj bʌ meloñel. Mi che'ʌch mi la' mel, uts'at mi caj i q'uel lac Yum, i Dios Panchan yic'ot Pañimil. Tic'ʌl mi caj i pʌsbeñob i yutslel i pusic'al i colojbal José mu' bʌ caj i coltʌntelob.

¹⁶Jini cha'an lac Yum, i Dios Panchan yic'ot Pañimil woli' yʌl: Mi' cajelob ti uq'uel ti pejtelel bij tac. Ti pejtelel calle mi caj i yʌlob: “Obol jax lac bʌ”, che'ob. Mi caj i pʌyob tilel xcʌnta pʌc'ʌbʌl cha'an mi' tem cha'leñob uq'uel yic'ot jini x'uq'uelob.

¹⁷Ti pejtelel ts'usubil mi caj la' cha'len uq'uel, come mi caj c ñumel ti la' tojlel, che'en lac Yum.

¹⁸Obol i bʌ majqui jach yom i q'uel i Q'uiñilel lac Yum. ¿Bajche' mi caj i coltañetla i Q'uiñilel lac Yum? Jiñʌch ic'ch'ipan bʌ pañimil, mach jinic i sʌclel pañimil.

¹⁹Che'ʌch yilal i Q'uiñilel lac Yum bajche' oso mu' bʌ i chuc winic che' woli' puts'tan bajlum. Lajalʌch bajche' lucum mu' bʌ i c'uxe' che' mi' yochel ti' yotot, che' mi' ñʌcchocon i c'ʌb ti bojte'.

²⁰An ic'ch'ipan bʌ pañimil ti' Q'uiñilel lac Yum. Ma'anic i sʌclel pañimil, wen ic'yoch'an bʌ.

²¹Ts'a' mij q'uel jini q'uiñijel mu' bʌ la' mel. Mi' c'ojyel cubin. Ma'anic mij q'uel ti uts'at che' mi la' tempan la' bʌ.

²²Anquese mi la' pulbeñon c majtan, anquese mi la' wʌq'ueñon c majtan melbil bʌ ti trigo, ma'anic mi caj c ch'ʌm la' wacax mu' bʌ la' wʌq'ueñon cha'an mi' ñʌjch'el c pusic'al.

²³Mach comic cubin la' c'ay. Tʌts'ʌ la' bʌ. Ma'anic mi caj c ñich'tan la' música.

²⁴La' jubic tilel toj bʌ meloñel che' bajche' yolocña bʌ ja'. La' ajnic toj bʌ a melbal che' bajche' cuxul bʌ ja' mach bʌ yujilic tiquin.

²⁵Wolic pejcañetla israelet bʌ la. Cha'c'al jab che' ya' añetla ti colem bʌ i tiquiñal pañimil ma'anic tsa' la' ch'ʌmbeyon tilel pulbil bʌ c majtan yic'ot c majtan melbil bʌ ti trigo.

²⁶Tsa' la' ch'uyu ñumel la' dioste' tac yic'ot i t'uchlib, “i dios ec'”, lon che'etla, yic'ot pejtel i yejtal tsa' bʌ la' mele.

²⁷Jini cha'an mi caj c pʌyetla majlel ti yambʌ lum ya' ti junwejl Damasco, che'en lac Yum, i c'aba'ʌch i Dios Panchan yic'ot Pañimil.