Read Chol Amos 8 Bible Online

Amos 8 - Chol bible

Amos 8

¹Lac Yum Dios tsi' pʌsbeyon chiquib, but'ul ti c'ʌñix bʌ i wut te'.

²Tsi' subeyon: Amós, ¿chuqui wola' q'uel? che'en. Tsac sube: Jump'ejl chiquib but'ul ti c'ʌnix bʌ i wut te', cho'on. Lac Yum tsi' subeyon: Jiñʌch i yejtal c tejclum Israel. I yorajlelix mi' jisʌntelob anquese c cha'añob. Ma'anix mi caj c cha' ñusʌbeñob i mul.

³Jini c'ay am bʌ ti Templo mi caj i pʌntiyel ti uq'uel. Cabʌlob mi caj i tsʌnsʌntelob. Jini ch'ujlelʌlob mi caj i pam mʌctañob lum. Ñʌch'ʌlob mi caj i chocob loq'uel i pi'ʌlob. Che'ʌch woli' yʌl lac Yum Dios.

⁴Ubinla ili c t'an, jatetla mu' bʌ la' ten jini p'ump'uño' bʌ, mu' bʌ la' tic'lan jini pobrejob ti la' lumal.

⁵Mi la' c'ajtiben la' bʌ: “¿Baqui ora mi caj i ñumel i q'uiñilel uw cha'an mi lac chon trigo? ¿Jala to ba mi' ñumel i yorajlel c'aj o cha'an mi lac pʌs trigo ti choñoñibʌl?” che'etla. Mach ts'ʌcʌlic mi la' p'is jini arroba. Letsem i tojol mi la' chon. Mi la' wʌsin jini p'isoñib.

⁶Mi la' wotsan jini pobre ti mozojintel ti' q'uexol i bet o mi ti' q'uexol huarach. Mi la' chon i sujl trigo i wenta i bʌc'.

⁷Lac Yum tsi' yʌc'ʌ i t'an ti isujm cha'an chan woli' mel i bʌ Israel: Mach wis ñajʌyic c cha'an la' melbal.

⁸Jini cha'an mi caj i tilel yujquel lum. Mi caj i cha'leñob uq'uel pejtel wʌ' bʌ chumulob. Pejtel jini lum mi caj i letsel che' bajche' but'ja'. Mi caj i wec'ulan i bʌ. Mi' caj i choc ochel i bʌ ti Nilo ja' am bʌ ti Egipto, che'en.

⁹Ti ili q'uin, che'en lac Yum Dios, mi caj cʌc' ti bʌjlel jini q'uin che' ti xinq'uiñil. Mi caj cʌc' ti ic'an pañimil che' chan to q'uin.

¹⁰Mi caj c sutq'uin la' q'uiñijel ti ch'ijiyem. Mi caj la' cʌy la' c'ay cha'an uq'uel. Mi caj cʌq'ueñetla la' xoj coxtal ti la' pejtelel. Mi caj cʌc' ti bojquel la' jol. Mi caj la' cha'len uq'uel che' bajche' jini mu' bʌ i yuc'tan coj bʌ i yalobil. Che'ʌch mi caj la' wujtel ti' q'uiñijel la' wocol. Wen ch'aj mi caj la' wubin.

¹¹Awilan tal i yorajlel, che'en lac Yum Dios, che' mi caj c choc tilel wi'ñal ti jini lum. Mach cha'anic waj jini wi'ñal. Mach cha'anic ja' i tiquin ti'. Wi'ñalʌch cha'an ma'anic ba' ubibil i t'an Dios.

¹²Mi' cajelob ti xʌmbal ñumel ti jujump'ejl colem ñajb. Mi caj i majlelob ti norte yic'ot ti' pasibal q'uin cha'an mi' sajcʌbeñob i t'an lac Yum. Pero mach i tajayobic.

¹³Ti jim bʌ ora mi caj i yubiñob tiquin ti' xch'ocob yic'ot ch'iton winicob. Mi caj i c'uñ'an pañimil cha'an tiquin i ti'.

¹⁴Mi caj i yajlelob mu' bʌ i yʌc'ob i t'an ti' c'aba' dioste' am bʌ ti Samaria, mu' bʌ i ch'ujutesañob jini dioste' am bʌ ti Dan. Mi' lon ñopob i mel bajche' jini año' bʌ ti Beerseba. Ma'anix mi caj i cha' ch'ojyelob che' mi' yajlelob, che'en lac Yum.