Read Chol Jonas 2 Bible Online

Jonas 2 - Chol bible

Jonas 2

¹Che' ya'an ti' ñʌc' chʌy Jonás, tsi' pejca i Yum Dios ti oración.

²Tsi' yʌlʌ: Tsac pejca c Yum che' bʌ añon ti wocol. Tsi' jac'beyon c t'an. C'am tsac cha'le t'an che' bʌbʌq'uen mic chʌmel ti' yʌbʌnlel ja'. Tsa' wubibeyon c t'an.

³Tsa' chocoyon ochel ti tam bʌ ja', ti' yojlil jini ñajb. Xin t'umulon ti' yebal ja'. Pejtel jini ja' a cha'an bʌ tsa' ñumi tic wa'tilel. Wʌlʌcña tsa' ñumi tic tojlel.

⁴Tsa cʌlʌ: “Chocbilonix a cha'an ba' ma'anix mic chʌn q'uelet, pero mu' to caj j q'uel jini ch'ujul bʌ Templo ya' ba' chumulet”, cho'on.

⁵Tsa' mujlʌyiyon ti jini ja' c'ʌlʌl yomix i jisañon. Tamatax ja' ba' tsa' ochiyon. Jini jam tsi' ts'otbeyon c jol.

⁶Tsa' jubiyon c'ʌlʌl ti yebal wits am bʌ ti ja'. Tsi' junyajlel ñup'uyon ja'. Ma'anix tsa' mejliyon ti loq'uel. Colelix c chʌmel che' bʌ tsa' loc'sayon ba' muculon, c Yum Dios.

⁷Che' bʌ sʌcʌ ma'anix c pusic'al, tsac cha' ña'tayet c Yum. Tsa' wubibeyon coración ti ch'ujul bʌ Templo ya' ba' chumulet.

⁸Majqui jach mi' ñop dioste' tac mach bʌ anic i c'ʌjñibal wolix i cʌy jini Yujil bʌ P'untaya.

⁹Joñon mi caj c subeñet wocolix a wʌlʌ. Mi caj c tsʌnsʌbeñet a majtan. Chuqui tac tsac subeyet mi caj c melbeñet. Ch'oyol ti lac Yum laj coltʌntel. Che' tsi' yʌlʌ Jonás.

¹⁰Lac Yum tsi' yʌq'ue mandar chʌy. Jini chʌy tsi' xejta loq'uel Jonás ba' tiquin lum.