Read Chol Numeros 10 Bible Online

Numeros 10 - Chol bible

Numeros 10

¹Lac Yum tsi' sube Moisés: Mele cha'p'ejl trompeta ti plata jats'bil bʌ ti martillo cha'an ma' c'ʌn a pʌy winicob ba' ora mi la' tempan la' bʌ, cha'an ma' subeñob i chajpañob i bʌ che' i yorajlelix mi' cha' techob xʌmbal.

³Che' mi la' wus jini cha'p'ejl trompeta, mux i ña'tañob jini israelob cha'an woli a pʌyob, cha'an mi' tempañob i bʌ la' wic'ot ya' ti' ti' jini Tabernáculo.

⁴Pero che' jump'ejl jach mi' wustʌl jini trompeta, cojach yom mi' tilelob ba' añet jini ñuc taco' bʌ i ye'tel loq'uemo' bʌ ti' tojlel pejtel israelob.

⁵Che' ma' ñijcañob ch'ojyel yic'ot i t'an jini trompeta, muq'uix i techob xʌmbal jini año' bʌ ti' tojel Tabernáculo ba' mi' pasel q'uin.

⁶Che' ti' cha'yajlel mi' wustʌl jini trompeta, mi' loq'uelob majlel jini israelob año' bʌ ti' tojel Tabernáculo ya' ti sur. Ti jujunyajl che' yom mi' techob xʌmbal, yom mi la' wus jini trompeta.

⁷Mach lajalic mi' wustʌl jini trompeta. Yom junchajp i t'an che' mi' tempañob i bʌ jini israelob. Yom yambʌ junchajp i t'an cha'an ma' ñijcañob ch'ojyel ti xʌmbal.

⁸Cojach jini motomajob mi mejlel i wusob jini trompeta tac. Che' bajche' wolic subeñet, che'ʌch yom mi' melob la' walobilob ja'el ti pejtelel ora.

⁹Che' c'otemetixla ti la' lumal, che' mi la' loq'uel ti guerra ti' tojlel jini woliyo' bʌ ti tic'laya, mux caj cubibeñetla i t'an jini trompeta tac che' mi la' wus ti' yorajlel wocol. Mux caj coltañetla.

¹⁰Che' ti' yorajlel la' q'uiñijel tac ja'el, yic'ot che' ti yorajlel ñuc bʌ q'uin la' cha'an, yic'ot che' ti' tejchibal tac tsic, yom mi la' wus jini trompeta tac. Yom tijicña la' pusic'al che' mi la' pulbeñon c majtan tac, yic'ot che' mi la' wʌq'ueñon c majtan tac. Che' jini joñon mi caj c ña'tan jini Trato bʌ c T'an tsa' bʌ cʌq'ueyetla. Joñoñʌch la' Yumon, la' Dioson, che'en lac Yum Dios.

¹¹Tsa' letsi jini Tocal am bʌ ti' pam jini Tabernáculo che' ti' cha'p'ejlel bʌ uw cha'an i cha'p'ejlel jab, che' ti junc'al jini tsic.

¹²Che' jini tsa' cajiyob ti xʌmbal majlel jini israelob ya' ti colem bʌ i tiquiñal pañimil i c'aba' Sinaí. Cha'p'ejl uxp'ejl q'uin tsa' jijliyob ya' ti bij. Tsa' wa'le jini Tocal ya' ti colem bʌ i tiquiñal pañimil i c'aba' Parán.

¹³Jiñʌch cojax to bʌ tsa' cajiyob ti xʌmbal che' bʌ tsa' aq'uenti mandar tac Moisés ti lac Yum Dios.

¹⁴Ñaxan tsi' teche xʌmbal i p'olbalob Judá yic'ot i bandera. An ti' wenta Naasón i yalobil Aminadab cha'an mi' pʌyob majlel.

¹⁵Tsi' tsajcayob majlel i p'olbalob Isacar. An ti' wenta Natanael i yalobil Zuar cha'an mi' pʌyob majlel.

¹⁶Tsi' tsajcayob majlel i p'olbalob Zabulón. An ti' wenta Eliab i yalobil Helón cha'an mi' pʌyob majlel.

¹⁷Che' bʌ tsi' chejeyob jini Tabernáculo, tsi' q'uecheyob majlel i yalobilob Gersón yic'ot i yalobilob Merari.

¹⁸Jini i p'olbalob Rubén tsi' tsajcayob majlel yic'ot i bandera. An ti' wenta Elisur i yalobil Sedeur cha'an mi' pʌyob majlel.

¹⁹Tsa' loq'uiyob ja'el i p'olbalob Simeón. An ti' wenta Selumiel i yalobil Zurisadai cha'an mi' pʌyob majlel.

²⁰Tsa' loq'uiyob ja'el i p'olbalob Gad. An ti' wenta Eliasaf i yalobil Deuel cha'an mi' pʌyob majlel.

²¹Tsa' loq'uiyob majlel ja'el i p'olbalob Coat woli bʌ i q'uechob majlel jini Ch'ujul bʌ i bʌl Tabernáculo. Che' bʌ tsa' c'otiyob jini wi'ipato' bʌ, cha' wa'chocobilix jini Tabernáculo ya' ba' mi caj i jijlelob.

²²I p'olbalob Efraín tsi' tsajcayob majlel ti' pat yic'ot i bandera. An ti' wenta Elisama i yalobil Amiud cha'an mi' pʌyob majlel.

²³I p'olbalob Manasés tsi' tsajcayob majlel ti' wenta Gamaliel i yalobil Pedasur.

²⁴I p'olbalob Benjamín tsi' tsajcayob majlel ti' wenta Abidán i yalobil Gedeoni.

²⁵Ti' pat tsa' loq'uiyob majlel i p'olbalob Dan ti' wenta Ahiezer i yalobil Amisadai.

²⁶Tsa' loq'uiyob ja'el i p'olbalob bʌ Aser ti' wenta Pagiel i yalobil Ocrán.

²⁷Tsa' loq'uiyob ja'el i p'olbalob Neftalí ti' wenta Ahira i yalobil Enán.

²⁸Che'ʌch tsa' loq'uiyob majlel jini israelob ti mojt ti mojt.

²⁹Moisés tsi' pejca Hobab i ja'an, jiñʌch i yalobil Ragüel am bʌ ti Madián. Tsi' sube: Muq'uix c majlel lojon ya' ti lum ba' mi caj i yʌq'ueñon lojon lac Yum. Conla. Mi a wom majlel quic'ot lojon tijicña mi caj a wajñel, come lac Yum tsa'ix i subeyob israelob mi caj i pʌsbeñob i yutslel i pusic'al, che'en.

³⁰Pero Hobab tsi' yʌlʌ: Mach majlicon. Com sujtel ya' ba'an c pi'ʌlob tic lumal, che'en.

³¹Moisés tsi' cha' sube: Wersa yom ma' majlel quic'ot lojon. Mach a cʌyon lojon, come a cʌñʌyʌch jini colem bʌ i tiquiñal pañimil. Cabʌl mi mejlel a coltañon lojon.

³²Mi awomʌch majlel quic'ot lojon, lac tem cha'an jach pejtelel mu' bʌ i yʌq'ueñonla lac Yum. Che' bajche' mi' melbeñon lojon, che'ʌch mi caj c melbeñet lojon ja'el. Che' tsi' yʌlʌ Moisés.

³³Tsi' cʌyʌyob jini wits i c'aba' Sinaí, jiñʌch i wits lac Yum. Uxp'ejl q'uin tsi' tsʌcleyob majlel jini Arca* tsa' bʌ majli ti ñaxan cha'an mi' yajcʌbeñob lum ba' mi' c'ajob i yo.

³⁴Jini Tocal i cha'an bʌ lac Yum temel tsa' majli yic'otob che' bʌ tsi' cʌyʌyob jini lum ba' tsa' poj jijliyob.

³⁵Che' bʌ tsa' caji ti majlel jini Arca, Moisés tsi' pejca lac Yum: C Yum, tsictesan a p'ʌtʌlel ti' tojlel a contrajob, cha'an mi' puts'elob ti' tojel a wut pejtel mu' bʌ i ts'a'leñetob, che'en.

³⁶Che' bʌ tsa' wa'le jini Arca tsi' yʌlʌ lac Yum: Cha' chumlen ti' tojlel israelob ti pic ti pic che' bajche' jaypijc añonla, che'en.