Read Chol Numeros 13 Bible Online

Numeros 13 - Chol bible

Numeros 13

¹Lac Yum tsi' sube Moisés: Choco majlel winicob cha'an mi' tsajiñob jini lum i c'aba' Canaán mu' bʌ caj cʌq'ueñob israelob. Choco majlel lajchʌntiquil yumʌlob loq'uemo' bʌ ti jini lajchʌnmojt i yalobilob Israel, che'en.

³Jini cha'an tsi' chocoyob loq'uel ya' ti colem bʌ i tiquiñal pañimil i c'aba' Parán che' bajche' tsi' sube lac Yum. Pejtelel ili winicob añob i ye'tel ti' tojlel i pi'ʌlob jiñʌch i c'aba'ob: Samúa i yalobil Zacur, loq'uem bʌ ti Rubén; Safat i yalobil Hori, loq'uem bʌ ti Simeón; Caleb i yalobil Jefone, loq'uem bʌ ti Judá; Igal i yalobil José, loq'uem bʌ ti Isacar; Oseas i yalobil Nun, loq'uem bʌ ti Efraín; Palti i yalobil Rafú, loq'uem bʌ ti Benjamín; Gadiel i yalobil Sodi, loq'uem bʌ ti Zabulón; Gadi i yalobil Susi, loq'uem bʌ ti Manasés, i yalobil José; Amiel i yalobil Gemali, loq'uem bʌ ti Dan; Setur i yalobil Micael, loq'uem bʌ ti Aser; Nahbi i yalobil Vapsi, loq'uem bʌ ti Neftalí; Guel i yalobil Maqui, loq'uem bʌ ti Gad.

¹⁶Jiñʌch i c'aba'ob winicob tsa' bʌ i chocoyob majlel Moisés cha'an mi' tsajiñob jini lum. Moisés tsi' q'uextʌbe i c'aba' Oseas i yalobil Nun. Tsi' yotsʌbe i c'aba' Josué.

¹⁷Che' bʌ tsi' chocoyob majlel cha'an mi' q'uelob bajche' yilal jini lum Canaán, Moisés tsi' subeyob: Cucula ti' bijlel Neguev ba' mi la' letsel ti wits.

¹⁸Yom mi la' wen q'uel jini lum bajche' yilal, yic'ot bajche' yilalob jini winicob ya' bʌ chumulob, mi ch'ejlob, mi mach ch'ejlobic, mi ts'ita'ob, mi cabʌlob.

¹⁹Q'uelela mi uts'at mi' yʌc' i wut jini lum. Q'uelela mi joyolob ti ts'ajc jini colem tejclum tac yic'ot xchumtʌl tac, mi cabʌlob mi mach cabʌlobic.

²⁰Q'uelela jini lum, mi weñʌch yilal, mi mach wenic, mi an tacʌch i te'elal, mi ma'anic. Mach la' cha'len bʌq'uen. Ch'ʌmʌla tilel i wut tac te' cha'an mi laj q'uel bajche' yilal. Che' tsi' yʌlʌ Moisés. I tejchibalix c'ajbal, wolix i c'ʌñ'an i wut ts'usub.

²¹Jini cha'an tsa' cajiyob ti letsel majlel. Tsa' caji i tsajiñob jini lum c'ʌlʌl ti' tiquiñal pañimil i c'aba' Zin c'ʌlʌl ti Rehob am bʌ ti' bijlel Hamat.

²²Che' bʌ tsa' ñumiyob ti Neguev tsa' c'ʌlʌ c'otiyob ti Hebrón, ba' tsi' q'ueleyob i p'olbalob Anac ti mojt ti mojt, Ahimán yic'ot Sesai yic'ot Talmai. Wa'chocobilix Hebrón ti oniyi che' wucp'ejl to jab yom cha'an mi' wa'chocontel Zoán am bʌ ti Egipto.

²³Tsa' c'otiyob jini lajchʌntiquilob ti joctʌl i c'aba' Escol, ya' ba' tsi' tuc'uyob jumpajl ts'usub, wen colem bʌ. Wersa yom cha'tiquil winicob cha'an mi' q'uechob majlel ti junts'ijt te'. Tsi' ch'ʌmʌyob sujtel ja'el i wut ch'umac' yic'ot i wut higo.

²⁴Jini cha'an tsi' yotsʌbeyob i c'aba' ili lum Joctʌl Escol cha'an jini ts'usub tsa' bʌ i tajayob.

²⁵Ñumeñix cha'c'al q'uin tsa' cha' sujtiyob jini winicob ba'an i pi'ʌlob.

²⁶Tsa' cha' c'otiyob ti Cades am bʌ ya' ti colem bʌ i tiquiñal pañimil i c'aba' Parán. Tsi' subeyob Moisés yic'ot Aarón yic'ot pejtelel israelob bajche' yilal i lumal Canaán. Tsi' pʌsbeyob ja'el i wut jini pʌc'ʌbʌl tsa' bʌ i tajayob.

²⁷Tsi' yʌlʌyob: Tsa' c'otiyon lojon ya' ba' tsa' chocoyon lojon majlel. Melel on mi' yʌc' leche, yic'ot chab. Wʌ' tsac ch'ʌmʌ lojon tilel ts'ita' i wut te' cha'an mi la' q'uel.

²⁸Pero wen ch'ejlob jini winicob ya' bʌ chumulob. Wen colem jini tejclum, joyolob ti ts'ajc. Tsaj q'uele lojon ja'el jini wen chaño' bʌ winicob i yalobilob Anac.

²⁹Ya' chumulob i yalobilob Amalec ti Neguev. Jini heteojob, yic'ot jebuseojob, yic'ot amorreojob, chumulob ti wits. Jini cananeojob chumulob ti' ti' colem ñajb, yic'ot ti' ti' Jordán ja', che'ob.

³⁰Che' jini Caleb tsa' caji i xic' i pi'ʌlob ti' tojlel Moisés: Conla ti ora cha'an mi lac ch'ʌm jini lum, come muc'ʌch i mʌjlel lac cha'an, che'en Caleb.

³¹Pero jini yaño' bʌ winicob tsajniyo' bʌ yic'ot cha'an mi' q'uel tsi' subeyob: Mach mejliconla ti letsel majlel ame i jisañonla laj contrajob come wen p'ʌtʌlob, che'ob.

³²Che' jini tsi' bʌc'tesayob i pi'ʌlob come tsi' yʌlʌyob: Wen yujilob guerra winicob ti jini lum ba' tsajniyon lojon. Wen colemob jini chumulo' bʌ ti Neguev ti' bijlel Canaán ba' tsa' ñumiyon lojon.

³³Tsaj q'uele lojon i yalobilob Anac, jini wen chaño' bʌ winicob, cʌmbilo' bʌ c'ʌlʌl ti wajali. Wen pec' tsaj q'uele lojon c bʌ che' bajche' ya alʌ sajc' ti' tojlelob, come wen chañob, che'ob.