Read Chol Numeros 15 Bible Online

Numeros 15 - Chol bible

Numeros 15

¹Lac Yum tsi' sube Moisés: Yom ma' subeñob israelob: Che' ochemobix la' walobilob ya' ti jini lum mu' bʌ caj cʌq'ueñob,

³mi yomob i yʌq'ueñon pulbil tac bʌ c majtan, yic'ot jini tsʌnsʌbil tac bʌ c majtan tilem bʌ ti' pusic'al, che' mi' ts'ʌctesañob i t'an, o che' ti' yorajlel tac la' q'uiñijel, la' i yʌq'ueñoñob xojocña bʌ i yujts'il tic tojlel.

⁴Jini mu' bʌ i ch'ʌmbeñon tilel c majtan, la' i ch'ʌmbeñon tilel yic'ot c majtan melbil bʌ ti harina. Yom uxp'ejl litro jini juch'bil bʌ harina xajc'ubil bʌ yic'ot ojlil i cha'p'ejl litro aceite.

⁵Yom mi la' wʌc' ojlil i cha'p'ejl litro vino, jiñʌch japbil bʌ majtañʌl, ba' ora ma' wʌq'ueñon juncojt tiñʌme'.

⁶Mi tat tiñʌme' jini alʌc'ʌl mu' bʌ a tsʌnsan, yom ma' c'ʌn wʌcp'ejl litro juch'bil bʌ harina xajc'ubil bʌ yic'ot cha'p'ejl litro aceite,

⁷yic'ot cha'p'ejl litro vino cha'an japbil bʌ majtañʌl. Jiñʌch xojocña bʌ c majtan.

⁸Mi i tat wacax jini mu' bʌ la' wʌq'ueñon, yom ma' c'ʌn bolomp'ejl litro juch'bil bʌ harina xajc'ubil bʌ yic'ot uxp'ejl litro aceite. Jiñʌch yom che' a wom a ts'ʌctesan a t'an, yic'ot che' ma' wʌq'ueñonla wocolix cʌlʌ.

¹⁰Yom ja'el uxp'ejl litro vino cha'an japbil bʌ majtañʌl. Jiñʌch xojocña bʌ pulbil bʌ c majtan.

¹¹Che'ʌch yom mi la' mel che' mi la' wʌq'ueñon jujuncojt c majtan mi tat wacax, mi tat tiñʌme', mi alʌ tat tiñʌme', mi alʌ tat chivo.

¹³Pejtelel jini israelob che'ʌch mi caj i melob bajche' iliyi, cha'an xojocña tic tojlel jini pulbil bʌ c majtan. Che'ʌch yom mi' melob ti pejtelel ora la' walobilob yic'ot jini ñajt bʌ ch'oyolob año' bʌ ti la' tojlel.

¹⁵Pejtelel chumulo' bʌ ti jini lum junlajal mi caj i jac'ob c mandar, jini israelob yic'ot jini ñajt bʌ ch'oyolob, yic'ot la' walobilob ti pejtelel ora. Junlajaletla tic tojlel.

¹⁶Jump'ejl jach mandar yom mi la' jac' israelet bʌ la yic'ot la' pi'ʌlob ti chumtʌl parte bʌ ch'oyolob, che'en lac Yum.

¹⁷Lac Yum tsi' cha' sube Moisés: Yom ma' cʌntesan jini israelob ba' ora ochemobix ti jini lum ba' mi caj cʌq'ueñob.

¹⁹Che' mi' yujtel i tuc'beñob i wut i pʌc'ʌb tac, yom mi' yʌq'ueñoñob c majtan. La' i ch'ʌmob ñaxan bʌ i wut trigo cha'an mi' melbeñoñob junq'uejl colem waj cha'an c majtan. Che'ʌch yom mi' yʌq'ueñoñob ti jujump'ejl jab. Che' yom mi' melob la' walobilob ja'el c'ʌlʌl ti pejtelel ora.

²²Che' añob i sajtemal che' ma'anic mi' jac'beñoñob pejtelel ili c mandar tsa' bʌ c subeyob,

²³ti jim bʌ ora che' mi' ña'tʌntel i mul, la' tilicob pejtelel israelob cha'an mi' yʌq'ueñoñob juncojt tat wacax cha'an pulbil bʌ c majtan. Temel yom mi' yʌq'ueñoñob yic'ot majtañʌl melbil bʌ ti harina, yic'ot vino ja'el jini japbil bʌ c majtan. Yom mi' yʌq'ueñoñob ja'el juncojt tat chivo cha'an i ñusʌntel mulil. Che' yom mi' melob la' p'olbalob ti pejtelel ora.

²⁵Jini motomaj mi caj i tsʌnsan jini majtañʌl cha'an i tojol i mul pejtelel israelob. Che' jini mi caj i ñusʌbentelob i mul, come an i sajtemal anquese ma'anic tsi' ña'tayob. Jini cha'an ti' pejtelelob yom mi' ch'ʌmob tilel pulbil bʌ c majtan yic'ot majtañʌl cha'an mi' ñusʌbentelob i mul.

²⁶Che' jini mi caj c ñusʌbeñob i mul pejtelel israelob, yic'ot jini ñajt bʌ ch'oyolob woliyo' bʌ ti chumtʌl ti la' tojlel, come ti' pejtelelob mi' tajob i mul cha'an ti' caj i mul juntiquil.

²⁷Mi an i sajtemal juntiquil, yom mi' yʌc' juncojt i ña'al chivo am bʌ jump'ejl i jabilel cha'an i tojol i mul.

²⁸Jini motomaj mi caj i yʌq'ueñon c majtan cha'an i tojol mulil. Mi caj c ñusʌbeñob i mul jini winicob.

²⁹Jini israelob yic'ot i pi'ʌlob ti chumtʌl parte bʌ i lumal junlajal jach mi caj i jac'ob ili mandar.

³⁰Pero majqui jach mi' cha'len mulil cha'an jach yom jontolil, mi jini Israel bʌ, mi jini ñajt bʌ ch'oyol, wolix i ts'a'leñon. Wersa yom mi' chojquel loq'uel ti' lumal jini winic.

³¹Come ma'anic tsi' jac'ʌ c t'an. Tsa' jach i t'uchta c mandar. Jini cha'an wersa yom mi' chojquel loq'uel jini winic. Bajñel an ti' wenta cha'an mi' toj i mul. Che' tsi' yʌlʌ lac Yum.

³²Che' ya' añob pejtelel israelob ya' ti colem bʌ i tiquiñal pañimil, tsi' tajayob juntiquil winic woli bʌ ti xot' si' che' ti' yorajlel c'aj o.

³³Jini tsa' bʌ c'oti i tajob jini winic che' woli ti xot' si' tsi' pʌyʌyob tilel ba'an Moisés yic'ot ba'an Aarón, jiñʌch año' bʌ i ye'tel.

³⁴Tsi' yotsayob ti mʌjquibʌl, come maxto tsiquilic chuqui mi caj i tumbentel.

³⁵Lac Yum tsi' sube Moisés: Wersa mi' tsʌnsʌntel jini winic. La' i pʌyob loq'uel i pi'ʌlob ti' ti' jini tejclum cha'an mi' julob ti xajlel, che'en.

³⁶Che' jini tsi' pʌyʌyob loq'uel ti tejclum cha'an mi' julob. Tsa' chʌmi jini winic che' bajche' lac Yum tsi' sube Moisés.

³⁷Lac Yum tsi' pejca Moisés: Subeñob israelob: Yom mi la' joch' i ti' ti'il la' bujc jatetla yic'ot la' walobilob ti pejtelel ora. Che' ja'el yom mi la' wʌc' jujunt'ujm yʌjyʌx puy ya' ti' ti'il.

³⁹Che' mi la' q'uel yom mi la' c'ajtesan ti la' pusic'al pejtelel c mandar, cha'an ts'ʌcʌl mi la' chʌn mel, cha'an mach yomic mi la' mel jini mu' bʌ la' bajñel ña'tan ti la' pusic'al. Mach yomic mi la' tsʌclan jini mu' bʌ i bajñel q'uel la' wut cha'an mi' yʌq'ueñetla la' taj la' ts'i'lel.

⁴⁰Yom c'ajal la' cha'an ti pejtelel ora cha'an mi la' jac' pejtelel jini c mandar, cha'an ch'ujul mi la' wajñel tic tojlel.

⁴¹Joñoñʌch la' Yumon la' Dioson tsa' bʌ c loc'sayetla ti' lumal Egipto cha'an mi la' ch'ujutesañon. Come la' Yumon la' Dioson, che'en lac Yum Dios.