Read Chol Numeros 16 Bible Online

Numeros 16 - Chol bible

Numeros 16

¹Jini Coré (i yalobil Ishar, i yalobil bʌ Coat, i yalobil bʌ Leví) tsi' laja i t'an yic'ot Datán yic'ot Abiram (i yalobilob Eliab), yic'ot On (i yalobil Pelet). Datán yic'ot Abiram yic'ot On loq'uemob ti' p'olbal Rubén.

²Tsa' caji i contrajiñob Moisés. Tsi' coltayob lujunc'al yic'ot lujuntiquil i yuxc'al (250) winicob, jini ñuc taco' bʌ i ye'tel ti' tojlel israelob, yajcʌbilo' bʌ cha'an mi' cʌntañob winicob.

³Che' jini tsa' majliyob i pejcan Moisés yic'ot Aarón: Jasʌlix chuqui woli la' mel, che'ob. Come laj ch'ujulonla ti Israel. Junlajalonla. Baqui jach añonla ya'an lac Yum la quic'ot. ¿Chucoch mi la' chʌn otsan la' bʌ ti yumʌl ti' tojlel i cha'año' bʌ lac Yum cha'an mic yumañet lojon? che'ob.

⁴Che' bʌ tsi' yubi Moisés, tsi' ñocchoco i bʌ ti lum. Tsi' sube Coré yic'ot pejtelel jini woli bʌ i tsajcañob: Ijc'ʌl to mi caj i tsictesan lac Yum majqui i cha'año' bʌ, yic'ot majqui jini ch'ujulo' bʌ, yic'ot majqui tsi' yajca cha'an motomaj.

⁵

⁶Jini cha'an yom mi la' mel bajche' iliyi, jatet, Coré, yic'ot pejtelel a pi'ʌlob: Ch'ʌmʌla tilel jini pom tac. Yom mi la' wotsʌben i c'ʌc'al. Aq'uen lac Yum jini pom che' ti sʌc'ajel. Jini winic mu' bʌ i yajcan lac Yum Dios, jiñʌch ch'ujul bʌ winic. Woli la' bajñel chañ'esan la' bʌ i p'olbalet bʌ la Leví.

⁷

⁸Tsajiletme la levíjet bʌ la. Dios tsi' yajcayetla ti' tojlel pejtelel israelob cha'an mi la' wajñel ti' tojlel Dios che' mi' la' melben i ye'tel ti Templo. Tsi' pʌsbeyetla i yutslel che' bʌ tsi' yʌq'ueyetla la' we'tel. ¿Mu' ba la' lon ts'a'len jini ñuc bʌ la' we'tel ya' ti' yotot lac Yum Dios ti' tojlel israelob?

⁹

¹⁰Tsa'ix i pʌyʌyetla ti la' we'tel ti' tojlel, temel yic'ot la' pi'ʌlob. ¿Mach ba jasʌlic mi la' q'uel? ¿Woli ba la' lon ña'tan cha'an anto yom mi la' ch'ʌmben i ye'tel motomaj?

¹¹Come wolix la' tempan la' bʌ jatetla yic'ot jini woli bʌ i tsajcañetla cha'an mi la' contrajin lac Yum Dios. ¿Majqui jini Aarón? Ma'anic woli la' contrajin Aarón i winic Dios, pero jiñʌch Dios woli bʌ la' contrajin. Che' tsi' yʌlʌ Moisés.

¹²Che' jini Moisés tsi' choco ti pʌyol Datán yic'ot Abiram, i yalobilob Eliab. Pero ma'anic tsi' jac'ʌyob i pʌyol. Tsi' yʌlʌyob: Mach comic lojon.

¹³Tsa' pʌyʌyon lojon loq'uel ba' tijicñayon lojon ti Egipto. Jiñʌch wen bʌ lum ba' tsac japʌ lojon lech. Tsac mʌc'ʌ lojon chab. Tsa' pʌyʌyon lojon tilel ti chʌmel ila ti colem bʌ i tiquiñal pañimil. ¿C yumet ba lojon cha'an mic jac'beñet lojon a t'an?

¹⁴Ma'anic chuqui tsa' wʌq'ueyon lojon, mi lumic mi ts'usubilic. Ma'anic tsa' pʌyʌyon lojon tilel ba' mic jap lojon lech ba' mic mʌc' lojon chab. ¿Mu' ba cajel a lotiñon lojon? Jini cha'an mach letsicon lojon, che'ob.

¹⁵Che' jini Moisés tsa' wen mich'a. Tsi' sube lac Yum Dios: Mach a q'uelbeñob ti uts'at i majtan tac mu' bʌ i yʌq'ueñetob. Mi juncojtic burro tsac ch'ʌmbeyob. Ma'anic chuqui tsac tumbeyob mi juntiquilic, che'en Moisés.

¹⁶Che' jini Moisés tsi' cha' sube Coré: Ijc'ʌl yom majliquet ti' tojlel lac Yum yic'ot pejtelel woli bʌ i tsajcañetob. Mux i majlel Aarón ja'el.

¹⁷Ti jujuntiquiletla yom mi la' ch'ʌm majlel pom ti' yajñib. Che' jini yom mi la' lʌc'tesan la' bʌ ti' tojlel lac Yum ti jujuntiquiletla yic'ot la' pom. Lujunc'al yic'ot lujuntiquil i yuxc'aletla (250) am bʌ la' cha'an i yajñib pom mu' bʌ caj la' ch'ʌm majlel. Aarón ja'el mi caj i ch'ʌm majlel i pom, che'en.

¹⁸Che'ʌch tsi' meleyob. Tsi' ch'ʌmʌyob majlel pom ti' yajñib ti jujuntiquil. Tsi' yotsayob c'ajc yic'ot jini pom. Tsa' wa'leyob ya' ti' ti' jini Tabernáculo yic'ot Moisés yic'ot Aarón.

¹⁹Ya' añob pejtelel israelob. Tsi' pʌyʌyob tilel Coré. Tsa' wa'leyob ti' tojel i wut Moisés ti' ti' jini Tabernáculo. Che' jini tsa' tsictiyi i ñuclel lac Yum ti' tojlelob.

²⁰Lac Yum tsi' sube Moisés yic'ot Aarón: Yom mi la' tʌts' la' bʌ baqui añob ili winicob. Mi caj c jisañob ti junyajlel, che'en.

²¹

²²Pero tsi' pʌcchocoyob i bʌ. Tsi' yʌlʌyob: C Dios, C Dios, jatet mu' bʌ a wʌq'ueñob i ch'ujlel pejtelel winicob, ¿mach ba juntiquilic jach jini tsa' bʌ i cha'le mulil? ¿Chucoch woli a laj mich'leñob ti pejtelelob? che'ob.

²³Che' jini lac Yum Dios tsi' sube Moisés: Yom ma' subeñob jini israelob cha'an mi' tʌts'ob i bʌ ya' ba' añob Coré yic'ot Datán yic'ot Abiram ya' ba' chumulob, che'en.

²⁴

²⁵Che' jini Moisés tsa' majli ba' an Datán yic'ot Abiram. Jini xñoxob ti Israel tsa' caji i tsʌcleñob majlel.

²⁶Moisés tsi' sube pejtelel israelob: Ti ora jach yom mi la' tʌts' la' bʌ ti' tojlel ili winicob woli bʌ i ts'a'leñob Dios. Mach yomic mi la' wis tʌlbeñob chuqui an i cha'añob, ame chʌmiquetla yic'otob cha'an i mulob, che'en.

²⁷Tsi' tʌts'ʌyob i bʌ winicob x'ixicob ti' tojlel pisil tac bʌ i yotot Coré yic'ot Datán yic'ot Abiram. Tsa' loq'uiyob ti' yotot tac jini Datán yic'ot Abiram yic'ot i yijñamob yic'ot i yalobilob. Wa'alob ti' ti' tac i yototob.

²⁸Che' jini tsi' yʌlʌ Moisés: Ti ili ora mi caj la' ña'tan chocbilon tilel i cha'an lac Yum cha'an mic mel pejtelel jini que'tel. Mach tic bajñel pusic'alic tsac ña'ta c mel.

²⁹Mi lajal mi' chʌmelob bajche' pejtel winicob, o mi che'ʌch mi' chʌmelob bajche' yaño' bʌ mu' bʌ i c'uñ'añob cha'an c'amʌjel, che'ic jini mach Diosic jini tsa' bʌ i wa'chocoyon ti que'tel.

³⁰Pero mi tsi' pʌsʌ ñuc bʌ i p'ʌtʌlel lac Yum, mi tsi' cala i bʌ jini lum cha'an mi' mujlañob ti pejtelelob yic'ot pejtel i chubʌ'añob, mi cuxulob to mi' jubelob ochel ti' yajñib chʌmeño' bʌ, tsiquil che' jini ili winicob tsi' bajñel ts'a'leyob lac Yum. Che' tsi' yʌlʌ Moisés.

³¹Che' bʌ ujtemix ti t'an Moisés, tsa' tsijli jini lum ba' wa'alob.

³²Tsi' cala i bʌ jini lum. Tsi' laj mujla jini winicob yic'ot i pi'ʌlob, yic'ot i yototob, yic'ot pejtelel jini woli bʌ i tsajcañob Coré, yic'ot i chubʌ'añob.

³³Cuxulob to tsa' laj jubiyob ti' yajñib chʌmeño' bʌ yic'ot pejtelel i chubʌ'añob. Tsi' cha' mʌcʌ i bʌ jini lum. Ma'anix tsiquil jini winicob ba' tsa' majliyob.

³⁴C'am i yoñelob tsa' majliyob. Che' bʌ woliyob ti oñel, tsa' puts'iyob pejtelel jini israelob año' bʌ ti' joytʌlel. Tsi' yʌlʌyob: Conla ti puts'el ame mujlʌyiconla ti lum ja'el, che'ob.

³⁵Lac Yum tsi' choco jubel c'ajc ja'el ba' añob jini lujunc'al yic'ot lujuntiquil i yuxc'al (250) winicob woli bʌ i pulob pom. Tsi' laj jisayob.

³⁶Lac Yum tsi' sube Moisés: Suben Eleazar i yalobil jini motomaj Aarón cha'an mi' loc'san ti c'ajc i yajñib tac pom. La' i tʌts' majlel jini pom ya' baqui woli ti lejmel jini c'ajc. Come c cha'anix i yajñib tac pom, ch'ujul tic wut.

³⁷

³⁸Ch'ʌmʌ i yajñib tac pom tsa' bʌ i c'ʌñʌyob jini winicob tsa' bʌ i jisayob i bʌ cha'an i mul, cha'an ma' mel welel bʌ c'ʌnc'ʌn taq'uin, cha'an mi la' tep' jini pulʌntib, come ch'ujul i yajñib tac pom, come c cha'añʌch. Che' jini mux i ña'tañob israelob chuqui tsa' ujti, che'en lac Yum.

³⁹Jini cha'an jini motomaj Eleazar tsa' caji i tempan i yajñib tac pom melbil bʌ ti c'ʌnc'ʌn taq'uin tsa' bʌ i yʌc'ʌyob jini tsa' bʌ puliyob ti c'ajc. Che jini tsa' caji i cujob cha'an mi' tep'ob jini pulʌntib.

⁴⁰Jiñʌch i yejtal cha'an mi' ña'tañob pejtelel israelob, tic'bilob ame ochic joch winic cha'an mi' pulbeñon pom. Ame che'ic mi' jilelob ja'el che' bajche' tsa' jili Coré yic'ot jini tsa' bʌ i tsajcayob. Cojach an ti' wenta i yalobilob Aarón. Che'ʌch tsa' caji i melob che' bajche' lac Yum tsi' sube Moisés.

⁴¹Che' ti yijc'ʌlal, pejtelel jini israelob tsa' cajiyob ti wulwul t'an ti' contra Moisés yic'ot ti' contra Aarón. Tsi' yʌlʌyob: Jatetla tsa'ix la' wʌc'ʌ ti chʌmel i winicob lac Yum, che'ob.

⁴²Che' bʌ woli' tempañob i bʌ ti' contra Moisés yic'ot Aarón, tsi' can q'ueleyob jini Tabernáculo. Awilan tsa'ix jubi jini Tocal ti' pam jini Tabernáculo. Tsa' tsictiyi i ñuclel lac Yum ti' tojlelob.

⁴³Tsa' c'otiyob Moisés yic'ot Aarón ya' ti' pam Tabernáculo. Lac Yum tsi' sube Moisés:

⁴⁴

⁴⁵Yom mi la' tʌts' la' bʌ ti' tojlel ili winicob, come mi caj c jisañob ti junyajlel, che'en. Pero Moisés yic'ot Aarón tsi' pʌcchocoyob i bʌ.

⁴⁶Moisés tsi' sube Aarón: Ch'ʌmʌ i yajñib pom ti ora. Otsan jini nich c'ajc am bʌ ya' ti pulintib. Che' woli to ti pulel, cucu ti ajñel. Ch'ʌmʌ majlel ya' ba'an israelob cha'an mi' ñusʌbentelob i mul, come mich' lac Yum. Woli' pʌsbeñob i mich'ajel cha'an tsi' mich'leyob. Woliyobix ti chʌmel, che'en Moisés.

⁴⁷Che' jini Aarón tsi' ch'ʌmʌ i yajñib pom che' bajche' tsi' sube Moisés. Ti ajñel tsa' majli ba'an israelob. Tsi' q'uele woliyobix ti chʌmel. Tsi' yotsa pom ya' ti yajñib ba' mi' pulel cha'an mi' ñusʌbentelob i mul.

⁴⁸Xinlʌpʌl tsa' wa'le Aarón ya' ti' yojlil jini xchʌmelob yic'ot jini cuxulob to bʌ.

⁴⁹Ti jim bʌ q'uin tsa' chʌmiyob chʌnlujump'ejl mil, yic'ot jo'lujunc'al i cha'bajc' (14,700) winicob. Ñumen cabʌlob bajche' jini tsa' bʌ jisʌntiyob yic'ot Coré che' bʌ tsi' ts'a'leyob Dios.

⁵⁰Aarón tsa' cha' sujti majlel ba'an Moisés ti' ti' jini Tabernáculo che' bʌ lajmenix jini chʌmel.