Read Chol Numeros 17 Bible Online

Numeros 17 - Chol bible

Numeros 17

¹Lac Yum tsi' pejca Moisés: Subeñob israelob cha'an mi' ch'ʌmob tilel jujunts'ijt i barate' jini ñuc taco' bʌ i ye'tel. Yom lajchʌnts'ijt che' ti' pejtelel, come añob lajchʌntiquil loq'uemo' bʌ ti lajchʌnmojt israelob. Ti jujuntiquil la' i yotsañob i c'aba' ya' ti' te'.

³Yom ma' ts'ijbuben i c'aba' Aarón ya' ti barate' i cha'an bʌ Leví, come ti jujuntiquil yumʌl loq'uem bʌ ti lajchʌnmojt israelob an i barate'.

⁴Yom mi la' wotsan jini lajchʌnts'ijt ya' ti' mal Tabernáculo ti' tojel jini Arca ba' mi caj c tsictesan c bʌ ti la' wut.

⁵Mi caj c tsictesan ti barate' majqui yajcʌbil c cha'an. Mi' cajel ti nich jini barate' i cha'an bʌ c winic. Che' jini mi cajel i ñʌjch'elob ti t'an jini israelob woliyo' bʌ ti wulwul t'an ti la' tojlel, che'en lac Yum.

⁶Jini cha'an Moisés tsi' subeyob jini año' bʌ i ye'tel ti' tojlel israelob cha'an mi' ch'ʌmbeñob tilel barate', jujunts'ijt cha'an jujuntiquil ñuc taco' bʌ i ye'tel. Lajchʌnts'ijt che' ti pejtelelob, come an lajchʌnmojt i p'olbal jini Israel. Jini i barate' Leví jiñʌch chucbil bʌ i cha'an Aarón.

⁷Tsi' yʌq'ueyob Moisés jini bara tac. Tsi' yotsa ti' tojlel lac Yum ti' mal jini Tabernáculo.

⁸Che' ti yijc'ʌlal tsa' cha' c'oti Moisés ya' ti Tabernáculo. Tsi' q'uele i barate' Aarón, am bʌ ti' wenta i p'olbal Leví, tsa'ix yax'a. Anix i nich yic'ot i buts tac. Tsi' yʌc'ʌ c'ʌñix bʌ i wut i c'aba' almendra.

⁹Che' jini Moisés tsi' loc'sa pejtelel jini bara tac tsa' bʌ i yʌc'ʌyob jini ñuc taco' bʌ i ye'tel ti Israel. Moisés tsi' pʌsbeyob israelob. Tsi' q'ueleyob jini bara tac. Tsi' cha' ch'ʌmʌyob jini barate' ti jujuntiquil.

¹⁰Lac Yum tsi' sube Moisés: Yom ma' cha' ch'ʌm i barate' Aarón. Otsan ti' tojel jini Arca cha'an mi' cha'leñob bʌq'uen jini xñusa mandarob, cha'an mi' ñʌjch'elob ti wulwul t'an tic tojlel mi mach yomobic chʌmel, che'en lac Yum.

¹¹Che'ʌch tsi' mele Moisés che' bajche' lac Yum tsi' sube.

¹²Jini israelob tsi' subeyob Moisés: Mux caj c chʌmel tic pejtelel lojon. Sajtemon lojon tic pejtelel, come majqui jach mi' lʌc'tesan i bʌ ba'an i Tabernáculo lac Yum mi' caj ti chʌmel. ¿Mu' ba caj lac laj jilel? che'ob.