Read Chol Numeros 19 Bible Online

Numeros 19 - Chol bible

Numeros 19

¹Lac Yum tsi' sube Moisés yic'ot Aarón: Jiñʌch c mandar mu' bʌ c sub. Subeñob israelob: Yom mi la' pʌy tilel juncojt chʌchʌc bʌ xch'oc wacax, mach bʌ wis anic i c'amʌjel yic'ot i lojwemal, maxto bʌ anic c'ʌmbil ti e'tel. Yom mi la' wʌq'uen jini motomaj Eleazar cha'an mi' pʌy majlel ti' ti' jini tejclum, cha'an ya'i mi' tsʌnsañob che' woli' q'uel.

⁴Jini motomaj yom mi' ts'aj i c'ʌb ya' ti' ch'ich'el wacax cha'an wucyajl mi' c'ʌn i tsijcan ti' tojel jini Tabernáculo.

⁵Yom mi' pulel jini wacax, yic'ot i pʌchʌlel, yic'ot i bʌc'tal, yic'ot i ch'ich'el, yic'ot i ta'. Yom mi' laj pule' che' woli to i q'uel jini Eleazar.

⁶Jini motomaj muq'uix i ch'ʌm jini ch'ujte' yic'ot hisopo, yic'ot jini chʌchʌc bʌ chij cha'an mi' yotsan ya' ti' mal jini c'ajc ba' woli ti pulel jini wacax.

⁷Che' jini mi caj i wuts' i pislel. Mi caj i cha'len ts'ʌmel. Che' mi' sujtel ti tejclum bibi' to mi' cʌytʌl tic wut c'ʌlʌl mi' bʌjlel q'uin.

⁸Jini tsa' bʌ i pulu wacax mi caj i wuts' i pislel. Mi caj i cha'len ts'ʌmel. Bibi' to mi' cʌytʌl tic wut c'ʌlʌl mi' bʌjlel q'uin.

⁹Che' jini mux i tilel juntiquil winic mach bʌ bibi'ic tic wut cha'an mi' tempʌben i tʌñʌl jini wacax, cha'an mi' majlel i much'chocon ya' ti' junwejlel tejclum baqui sʌc pañimil. Ya' yom mi' lojtel cha'an mi' c'ʌjñel che' mi' sʌq'uesañob i bʌ israelob. Jini wacax jiñʌch majtañʌl cha'an i ñusʌntel mulil.

¹⁰Wersa yom mi' wuts' i pislel ja'el jini mu' bʌ i tempʌben i tʌñʌl jini wacax. Bibi' to mi' cʌytʌl tic wut c'ʌlʌl mi' bʌjlel q'uin. Jiñʌch c mandar ti' tojlel israelob ti pejtelel ora yic'ot ti' tojlelob jini ñajt bʌ ch'oyolob tsa' bʌ tili ti chumtʌl ti la' lum.

¹¹Majqui jach mi' tʌlben i bʌc'tal chʌmen bʌ, bibi' mi' cʌytʌl tic wut wucp'ejl q'uin. La' i sʌq'uesan i bʌ ti ja' che' ti yuxp'ejlel q'uin yic'ot ti wucp'ejlel q'uin. Che' jini mi' cha' sʌc'an, pero mi ma'anic tsi' sʌq'uesa i bʌ che' ti yuxp'ejlel q'uin yic'ot ti wucp'ejlel q'uin, bibi' to mi' cʌytʌl.

¹³Jujuntiquil winic mu' bʌ i tʌlben i bʌc'tal ch'ujlelʌl wersa mi' sʌq'uesan i bʌ. Mi ma'anic tsi' sʌq'uesa i bʌ, tsa'ix i bibesa ja'el c Tabernáculo. Mi caj i chojquel loq'uel ti Israel. Come ma'anic tsi' c'ʌñʌ ja' mu' bʌ i sʌq'uesan. Bibi' mi' cʌytʌl. I bajñel an ti' wenta i mul.

¹⁴Che' an majqui mi' chʌmel ti pisil bʌ otot, bibi'ob tic wut jini ya' bʌ añob ti otot yic'ot jini mu' bʌ i yochelob ba'an xchʌmel. Wucp'ejl q'uin an i bibi'lel tic wut.

¹⁵Mi' bib'an ja'el jini basija tac mach bʌ mʌcbilic, o mi ts'ita' bexel an i majc che' mach wen mʌcbilic.

¹⁶Majqui jach mi' tʌl winic tsʌnsʌbil bʌ ti bij yic'ot jini yan tac bʌ xchʌmel, mi i bʌquel xchʌmel, mi mucoñibʌl, wucp'ejl q'uin bibi' mi' cʌytʌl tic wut.

¹⁷Jini bibi'o' bʌ la' i ch'ʌmob i tʌñʌl wacax tsa' bʌ puli cha'an i tojol mulil. La' i yotsan yic'ot cuxul bʌ ja' ti jump'ejl basija.

¹⁸La' tilic juntiquil sʌc bʌ winic yic'ot hisopo cha'an mi' ts'aj ya' ti ja' am bʌ ti basija. Che' jini mi caj i tsijcan jini otot, yic'ot pejtelel jini p'ejt an tac bʌ ti' mal jini otot, yic'ot pejtelel jini bibi'o' bʌ año' bʌ ti' mal jini otot, yic'ot xjula'o' bʌ, yic'ot jini tsa' bʌ i tʌlbe i bʌquel ch'ujlelʌl, mi tsʌnsʌbil ti bij o mi che' jach tsa' chʌmi, yic'ot jini tsa' bʌ i tʌlʌ mucoñibʌl.

¹⁹Jini mach bʌ anic i bibi'lel tic wut, la' i tsijcan ti ja' jini bibi' bʌ che' ti yuxp'ejlel q'uin yic'ot che' ti wucp'ejlel q'uin. Che' ujtemix wucp'ejl q'uin i sʌq'uesʌntel mi caj i wuts' i pislel. Mi' caj ti ts'ʌmel. Che' jini cha' sʌquix che' mi' bʌjlel q'uin.

²⁰Che' an juntiquil bibi' bʌ mach bʌ anic tsi' sʌq'uesa i bʌ, isujm mic subeñetla mi' caj ti chojquel loq'uel ti Israel, come muq'uix i bib'esan jini cotot, cha'an ti' caj ma'anic tsa' tsijcʌnti ti jini ja' xʌbʌl bʌ ti' tʌñʌl wacax mu' bʌ i yʌc' ti ñusʌntel mulil. Jini cha'an bibi' mi' yajñel.

²¹Jini cha'an yom mi' jajq'uel ili mandar ti pejtelel ora. Che' an majqui mi' tsijcan ti ja' yambʌ winic, wersa yom mi' wuts' i pislel ja'el. Che' an majqui mi' tʌl jini ja' mu' bʌ ti sʌq'uesaya, bibi' mi' cʌytʌl c'ʌlʌl mi' bʌjlel q'uin.

²²Che' bibi' juntiquil winic, chuqui tac jach mi' tʌl, bibi' mi' yajñel ja'el. Mi tsi' tʌlʌ yambʌ, bibi' mi' cʌytʌl ja'el c'ʌlʌl mi' bʌjlel q'uin. Che' tsi' yʌlʌ lac Yum.