Read Chol Numeros 20 Bible Online

Numeros 20 - Chol bible

Numeros 20

¹Tsa' c'otiyob pejtelel jini israelob ya' ti' tiquiñal pañimil i c'aba' Zin, jiñʌch ti abril che' bʌ tsa' cajiyob ti chumtʌl ti Cades. Ya' tsa' chʌmi Miriam. Ya'ix tsi' mucuyob.

²Tsa' caji i tempañob i bʌ winicob cha'an mi' contrajiñob Moisés yic'ot Aarón come ma'anic ja'.

³Tsa' cajiyob ti a'leya: Uts'at tsa'ic chʌmiyon lojon yic'ot c pi'ʌl lojon tsa' bʌ chʌmiyob ti' tojlel lac Yum.

⁴¿Chucoch tsa' lon pʌyʌyon lojon tilel ila ti' tiquiñal pañimil cha'an ma' wʌc'on lojon ti chʌmel temel yic'ot cʌlac' lojon?

⁵¿Chucoch tsa' wersa subeyon lojon loq'uel ti Egipto, cha'an ma' pʌyon lojon tilel ba'an cabʌl wocol? che'ob. Cʌxti aniquix to i c'ʌjñibʌl ili lum cha'an mi lac cha'len pac'. Mi yujiliquix to colel higuera te', mi ts'usub, mi ch'umac', mi aniquix to ja' cha'an mi lac jap, che'ob.

⁶Che' jini Moisés yic'ot Aarón tsi' tʌts'ʌyob i bʌ ti' tojlel i pi'ʌlob ba' chumulob. Tsa' majliyob ti' ti' Tabernáculo cha'an mi' ñochtañob Dios. Tsi' pʌcchocoyob i bʌ. I ñuclel lac Yum tsa' bʌc' tsictiyi ti' tojlelob.

⁷Lac Yum tsi' sube Moisés: Ch'ʌmʌ junts'ijt bara. Cucu a wic'ot a wʌscun Aarón. Tempanla tilel pejtelel israelob. Pejcan jini xajlel ti' wutob pejtelel israelob cha'an mi' loq'uel tilel ja'. Che' jini mux caj a wʌq'ueñob ja' pejtelel israelob yic'ot i yʌlac', che'en.

⁹Moisés tsi' ch'ʌmʌ jini bara lotol bʌ ti' tojlel lac Yum che' bajche' tsa' subenti.

¹⁰Ti' cha'ticlel tsa' majliyob. Tsi' pʌyʌyob majlel jini israelob ya' baqui an jini xajlel. Moisés tsi' subeyob: Ubinla c t'an wʌle, winicob cabʌl jax bʌ la' jontolil. Wʌle mi caj c loc'sʌbeñetla ja' ila ti colem xajlel, che'en.

¹¹Che' jini Moisés tsi' q'ueche i c'ʌb. Cha'yajl tsi' jats'ʌ jini xajlel. Tsa' caji ti loq'uel tilel cabʌl ja' cha'an mi' japob israelob yic'ot i yʌlac'.

¹²Pero lac Yum tsi' sube Moisés yic'ot Aarón: Ma'anic tsa' la' ñopoyon che' bajche' yom. Ma'anic tsa' la' wʌc'ʌ ti cʌjñel c ñuclel ti' tojlel israelob cha'an mi' ña'tañob ch'ujulon. Jini cha'an mic subeñetla, ma'anic mi caj la' pʌy ochel ili winicob ti jini lum ba' tsa cʌq'ueyob, che'en lac Yum.

¹³Jiñʌch jini ja' tilem bʌ ti Meriba, ya' baqui tsi' cha'leyob tsʌts bʌ t'an israelob ti' tojlel lac Yum. Pero lac Yum tsi' yʌc'ʌ i bʌ ti cʌjñel come ch'ujulʌch.

¹⁴Ti yambʌ q'uin che' ya'to añob ti Cades, ba' jaxʌl i lumal Edom, Moisés tsi' choco majlel winicob ba'an jini rey am bʌ ti Edom. Tsa' c'oti i yʌlob: Lac pi'ʌlʌch lac bʌ, come i p'olbalon lojon Israel. Wen la' wujil jini wocol tsa' bʌ cubi lojon,

¹⁵come tsa' jubiyob majlel c tat lojon ti Egipto. Cabʌl ora tsa' jal'ayob ya'i. Jini egiptojob p'ump'un tsi' tic'layob che' bajche' tsi' tic'layoñob lojon ja'el.

¹⁶Che' jini tsa' caji c wen pejcan lojon lac Yum. Tsi' yubibeyon lojon c t'an. Tsi' choco tilel i yángel cha'an mi' pʌyon lojon loq'uel ti Egipto. Wʌle wʌ'ix añon lojon ti Cades, lʌc'ʌl ba' jaxʌl la' lumal.

¹⁷Ti wocol t'an mij c'ajtibeñet lojon la' ñumicon lojon ilayi ti la lumal. Ma'anic mi caj j c'axel lojon ti pʌc'ʌbʌl yic'ot ti ts'usubil. Ma'anic mi caj c xujch'iben lojon i wut. Ma'anic mi caj c jap lojon la' wa'al am bʌ ti la' pozo. Cojach mi caj c ñumel lojon ya' ti ñoj bij. Ma'anic mi caj cochel lojon ya' ti xʌc' tac bij mi tic ts'ejic lojon mi tic ñojic lojon c'ʌlʌl mic cha' loq'uel lojon ya' ti la' lumal, che'ob.

¹⁸Edom tsi' jac'beyob: Mach mejliquetla ti ñumel tic lumal lojon. Mic wʌn subeñetla, mi tsa' ochiyetla tic lumal lojon, mi caj j contrajiñetla ti guerra, che'en.

¹⁹Jini israelob tsi' yʌlʌyob: Wersa com lojon ñumel ti la' lumal. Come jiñʌch mero i bijlel ba' com lojon majlel. Mi cʌc' lojon c t'an cha'an ma'anic chuqui mi caj c tic'lan lojon. Muc'ʌch c mʌn lojon i bʌl lojon c ñʌc' yic'ot c ja'al lojon. Tojach mi caj c ñumel lojon ti colem bij. Jini jach wolij c'ajtin lojon. A wocolic la' ñumicon lojon, che'ob.

²⁰Pero jini rey Edom tsi' wersa alʌ: Mach mejliquetla ti c'axel, che'en. Che' jini tsa' sujtiyob. Jini rey tsi' tempa cabʌl winicob cha'an guerra. Tsi' pʌyʌyob majlel ya' ba' jaxʌl i lumal cha'an mi' mʌctañob bij.

²¹Che' jini ma'anic tsi' yʌc'ʌyob ti c'axel israelob ya' ti' lumal. Jini cha'an wersa tsi' xoyoyob i bijlel.

²²Che' jini pejtelel israelob tsa' loq'uiyob ti Cades. Tsa' majliyob ti wits i c'aba' Hor.

²³Lac Yum tsi' pejca Moisés yic'ot Aarón ya' ti' ti' i lumal Edom: I yorajlelix mi caj i pʌjyel Aarón ba'an i tatob tsa' bʌ chʌmiyob cha'an tsa' la' ñusʌbeyon c t'an ya' ti Meriba ba' tsa' loq'ui ja'. Jini cha'an ma'anic mi' caj ti ochel ti jini lum mu' bʌ caj cʌq'ueñob israelob.

²⁵Pʌyʌx majlel Aarón yic'ot Eleazar i yalobil ya' ti wits i c'aba' Hor.

²⁶Ya' yom ma' jochben i bujc Aarón cha'an ma' lʌpben i yalobil, come Aarón mux i majlel ya' ba'an i tatob. Mi' caj ti chʌmel ti wits, che'en lac Yum Dios.

²⁷Che'ʌch tsi' mele Moisés che' bajche' tsi' sube lac Yum. Ti' yuxticlelob tsa' letsiyob majlel ti wits i c'aba' Hor ya' ti' wutob pejtelel israelob.

²⁸Moisés tsa' caji i jochben i bujc Aarón. Tsi' xojbe cʌytʌl Eleazar i yalobil Aarón. Che' jini Aarón tsa' chʌmi ya' ti' pam chan bʌ wits. I bajñelob jax tsa' jubiyob sujtel Moisés yic'ot Eleazar i yalobil Aarón.

²⁹Pejtelel israelob wen ch'ijiyem tsa' caji i yubiñob che' bʌ tsi' yubiyob chʌmenix Aarón. Tsi' yuc'tayob lujump'ejl i cha'c'al (30) q'uin.