Read Chol Numeros 22 Bible Online

Numeros 22 - Chol bible

Numeros 22

¹Tsi' chʌn cha'leyob xʌmbal israelob. Tsa' poj jijliyob ti' lumal Moab ti' junwejlel Jordán, ya' ti' tojel Jericó.

²Balac i yalobil Zipor tsi' yubi pejtelel chuqui tsi' meleyob israelob ti' tojlel amorreojob. Tsa' wen caji ti bʌq'uen come wen cabʌlob jini israelob. Jini cha'an tsa' caji i wen mel i pusic'al jini rey Balac yic'ot pejtelel año' bʌ ti Moab.

⁴Tsi' pʌyʌyob tilel jini xñoxob ti Madián. Tsi' subeyob: Wʌle jini israelob mi caj i jisañonla yic'ot pejtelel lac chubʌ'an che' lajal bajche' jini tat wacax mi' xop c'ux jam, che'ob. Ti jim bʌ ora yumʌlʌch Balac (i yalobil Zipor) ti' tojlelob moabob.

⁵Jini cha'an tsi' choco majlel winicob ti Pector ba'an Balaam i yalobil Beor, am bʌ ti' t'ejl colem ja' i c'aba' Eufrates cha'an mi' pʌy tilel, cha'an mi' coltañob. Awilan yom mi la' suben: “Tsa'ix c'otiyob bajc'ʌl winicob loq'uemo' bʌ ti Egipto. Woli' wen mʌctañob lum. Yomobix i chilbeñon lojon c lum.

⁶Awocolic yom ma' majlel quic'ot lojon ti ora cha'an ma' p'ajob, come ma'anic c p'ʌtʌlel lojon ti' tojlelob. Cujil muc'ʌch i coltʌntel jini mu' bʌ a coltan ti' yutslel a t'an. Cujil ja'el muc'ʌch i jisʌntelob jini mu' bʌ a p'ajob”. Che'ʌch yom mi la' suben, che'en.

⁷Jini xñoxob año' bʌ i ye'tel ti Moab yic'ot ti Madián tsa' c'otiyob ba'an Balaam. Tsi' ch'ʌmbeyob c'otel i majtan cha'an mi' jac' i pʌyol, cha'an mi' majlel i coltañob.

⁸Balaam tsi' subeyob: Cʌlen to la wʌle ti ili ac'ʌlel. Ijc'ʌl to mic subeñetla chuqui mi' tsictesʌbeñon lac Yum, che'en. Jini cha'an tsa' poj cʌleyob ti jini ac'ʌlel ti' yotot Balaam.

⁹Che' ti ac'ʌlel tsa' tili lac Yum i pejcan Balaam. Tsi' c'ajtibe: ¿Majquiyob ili winicob wʌ' ti a wotot? che'en.

¹⁰Balaam tsi' jac'ʌ: Jiñʌch chocbilo' bʌ tilel i cha'an Balac i yalobil Zipor, i yum moabob. Woli' yʌlob:

¹¹“Awilan jini winicob loq'uemo' bʌ ti Egipto woli' wen mʌctañob lum. Awocolic la' tiq'uiyob. Tic'ʌl mi che' jini mi mejlel cajñesan lojon loq'uel”, che'ob. Che' tsi' yʌlʌ Balaam.

¹²Lac Yum tsi' sube: Mach yomic ma' majlel a wic'otob. Mach a p'aj c winicob come tsa'ix cʌq'ueyob i yutslel c t'an, che'en lac Yum Dios.

¹³Che' bʌ tsa'ix ch'ojyi Balaam che' ti wen sʌc'ajel, tsi' subeyob i yaj e'telob Balac: Cha' cucuxla ti sujtel ti la' lumal, come lac Yum mach yomic i chocon majlel, che'en.

¹⁴Jini ñuco' bʌ i ye'tel ti Moab tsa' cha' sujtiyob ba'an Balac. Tsi' subeyob: Ma'anic tsi' jac'ʌ tilel Balaam quic'ot lojon, che'ob.

¹⁵Che' jini Balac tsi' cha' choco majlel yambʌ winicob año' bʌ i ye'tel, ñumen ñucobix bʌ i ye'tel che' bajche' tsajniyo' bʌ ti ñaxan, ñumen p'ʌtʌlob ja'el.

¹⁶Che' bʌ tsa' c'otiyob ti' yotot Balaam tsi' subeyob: Ti wocol t'an mic subeñet lojon, yom ma' majlel quic'ot lojon, come Balac i yalobil Zipor woli' wersa pʌyet.

¹⁷Tsa'ix i yʌc'ʌ i t'an. Muq'uic a majlel, muq'uix i wen p'iset ti wenta. Chuqui jach ma' c'ajtiben mi caj i yʌq'ueñet. Jini cha'an jac'beñon lojon. Conla ti ora cha'an ma' p'ajbeñon lojon jini israelob, che'ob jini xpʌyojelob, come che'ʌch tsi' wʌn subeyob jini Balac.

¹⁸Pero Balaam tsi' jac'beyob: Anquese mi' yʌq'ueñon jump'ejl otot but'ul bʌ ti oro yic'ot ti plata, mach mejlicon ti majlel, come mach mejlic c ñusʌben i t'an c Yum Dios.

¹⁹Pero jijlen to la ila ti cotot cha'an mic cha' ubin mi yom i subeñon yambʌ t'an jini c Yum, che'en.

²⁰Ti jim bʌ ac'ʌlel lac Yum tsi' sube Balaam: Mi tsa' tiliyob ili winicob cha'an mi' pʌyetob majlel, mi wersa a wom majlel, cucu a wic'otob, pero jini jach mi caj a sub jini mu' bʌ c subeñet, che'en lac Yum Dios.

²¹Che' wen sebto tsa' ch'ojyi Balaam ti yijc'ʌlal. Tsa' caji i ch'ʌl i burro. Tsa' caji ti majlel yic'ot jini ñuco' bʌ i ye'tel ti Moab.

²²Pero tsa' wen mich'a lac Yum cha'an tsa' majli Balaam yic'otob. I yángel lac Yum tsa' majli i mʌctan ti bij che' c'ʌchʌl woli' majlel yic'ot cha'tiquil i yaj e'telob.

²³Jini burro tsi' q'uele i yángel lac Yum, chucbil i cha'an espada bots'bilix i cha'an. Jini burro tsi' tʌts'ʌ i bʌ ti bij. Tsa' ochi ti mate'el. Balaam tsa' caji i jats' loq'uel ya' ti mate'el cha'an mi' cha' xʌn majlel jini bij.

²⁴Tsa' wa'le i yángel lac Yum ya' ti bij ba' tsa' ñumi ti' yojlil cha'pejt ts'usubil am bʌ ts'ajc ti' ti'.

²⁵Che' bʌ tsi' cha' q'uele i yángel lac Yum jini burro, tsa' majli ti lʌts' cʌytʌl ya' ba' tsa' lʌts' cʌle i yoc Balaam ya' ti ts'ajc. Jini cha'an Balaam tsi' cha' jats'ʌ i burro.

²⁶I yángel lac Yum tsa' cha' majli i mʌctañob ya' ba' ma'anic tsa' mejli i wis tʌts' i bʌ mi ti' ñojic mi ti' ts'ejic.

²⁷Che' bʌ tsi' cha' q'uele i yángel lac Yum jini burro, tsi' pʌcchoco i bʌ che' c'ʌchʌl to Balaam. Cʌlʌx jax tsa' mich'a Balaam. Wen p'ump'un jax tsa' caji i jats' i burro ti te'.

²⁸Che' jini lac Yum tsi' yʌc'ʌ ti t'an jini burro. Tsa' caji i suben Balaam: ¿Chuqui tsac tumbeyet cha'an uxyajlix tsa' to'o jats'ʌyon? che'en.

²⁹Balaam tsi' sube i burro: Wola' wajleñon. Anic c machit tij c'ʌb mic tsʌnsañet, che'en.

³⁰Jini burro tsi' sube Balaam: ¿Mach ba a cha'añonic c'ʌlʌl che' alʌlon to? Ti pejtelel ora tsac mele che' bajche' a wom. ¿Mach ba isujmic? che'en jini xña'a burro. Balaam tsi' jac'ʌ: Isujm cu, che'en.

³¹Lac Yum tsi' jambe i wut Balaam cha'an mi' q'uel i yángel lac Yum ya' bʌ wa'al ti bij. Bots'bil i cha'an i yespada, chucbil i cha'an ti' c'ʌb. Tsa' toj sajti i pusic'al Balaam. Tsi' pʌcchoco i bʌ ti lum.

³²I yángel lac Yum tsi' sube: ¿Chucoch uxyajl tsa' to'o jats'ʌ a burro? Tilemon cha'an mic mʌctañet cha'an a jontolil, ame jisʌntiquet cha'an jini chuqui woli bʌ a ña'tan a mel.

³³Jini burro tsi' q'ueleyon. Jini cha'an uxyajl tsi' tʌts'ʌ i bʌ tic tojlel. Machic tsi' tʌts'ʌ i bʌ tic tojlel tsac tsʌnsayet, pero tsac p'unta jini burro, che'en.

³⁴Che' jini Balaam tsi' subu i bʌ: Isujm tsa'ix c taja c mul. Ma'anic tsac ña'ta mi wʌ' wa'alet ti bij cha'an ma' mʌctañon. Wʌle mi mach a womic mic majlel ba'an Balac, mux c cha' sujtel majlel, che'en.

³⁵I yángel lac Yum tsi' sube Balaam: Cucu a wic'ot jini winicob, pero jini jach ma' sub ili c t'an mu' bʌ caj c subeñet, che'en. Che' jini tsi' chʌn cha'le xʌmbal majlel Balaam yic'ot i winicob Balac.

³⁶Che' bʌ tsi' yubi Balac lʌc'ʌlix yom c'otel Balaam, tsa' tili i taj ya' ti colem ja' i c'aba' Arnón ya' ba' jaxʌl i lumal Moab.

³⁷Balac tsi' sube: ¿Mach ba anic tsac pʌyʌyet ti wocol t'an? ¿Chucoch ma'anic tsa' tiliyet ti ora ba' añon? ¿Mach ba mejlic cʌq'ueñet cabʌl a ñuclel? che'en.

³⁸Balaam tsi' sube: Wʌ'ix añon ti a tojlel, pero mic wʌn subeñet, añon ti' wenta c Yum. Jini jach mu' bʌ i subeñon c Dios, mi mejlel c cha' sub, che'en.

³⁹Che' jini Balac tsi' pʌyʌ majlel Balaam ti Quiriat Huzot. Tsi' yʌc'ʌ ti tsʌnsʌntel cabʌl wacax yic'ot tiñʌme'. Tsi' yʌq'ueyob i c'ux Balaam yic'ot i yaj e'telob.

⁴¹Che' ti yijc'ʌlal jini yumʌl Balac tsi' pʌyʌ letsel Balaam c'ʌlʌl ti Bamot Baal, ba' tsa' mejli i wen q'uel israelob año' bʌ ti lʌc'ʌl.