Read Chol Numeros 24 Bible Online

Numeros 24 - Chol bible

Numeros 24

¹Wen ña'tʌbilix i cha'an Balaam mux caj i yʌq'ueñob i yutslel i t'an israelob jini lac Yum. Jini cha'an ma'anix tsa' majli i taj lac Yum che' bajche' ti ñaxan yic'ot che' ti' cha'yajlel cha'an mi' yubin chuqui mi' yʌl lac Yum Dios, pero toj jach tsa' majli i ñajti q'uel jini ya' bʌ añob ti' tiquiñal pañimil.

²Che' bʌ tsi' can q'uele pañimil, tsi' q'uele israelob ti mojt ti mojt ya' ba' chumulob ti joctʌl. I yEspíritu lac Yum tsa' c'oti ba'an Balaam. Tsi' yʌc'ʌ ti t'an:

³Joñon Balaam i yalobilon Beor woliyon ti t'an, come Dios tsi' jambeyon c wut.

⁴Jiñʌch mu' bʌ c tsictesan cha'an tsac ñich'tʌbe i t'an Dios. Jiñʌch tsa' bʌ i pʌsbeyon jini Mach bʌ Anic i P'isol i P'ʌtʌlel.

⁵Tijicña jax mi caj i yubiñob israelob. Uts'at añob ti pisil bʌ i yotot.

⁶Che' lajal añob bajche' wen pamacña bʌ jamil, yic'ot bajche' jini pʌc'ʌbʌl am bʌ ti' ti' ja', lajalʌch bajche' xojocña bʌ te' i c'aba' áloes pʌc'bil bʌ i cha'an lac Yum, yic'ot ch'ujte' am bʌ ti' ti' ja'.

⁷Ma'anic mi caj i tiquin i ya'lel. Mux i tilel i yum, ñumen p'ʌtʌl bʌ che' bajche' Agag. Mi caj i yutsi p'ojlel i yumʌntel ti pejtelel pañimil.

⁸Dios tsi' pʌyʌyob loq'uel ti Egipto. Añob i p'ʌtʌlel che' bajche' jontol bʌ bajlum mu' bʌ i c'ux jini bʌte'el. Mi caj i jisañob i contrajob. Mi caj i juch'beñob i bʌquel. Mi caj i julob ti jalʌjb.

⁹Mi' cha'leñob wʌyel che' bajche' bajlum. Bʌbʌq'uen che' mi' ñijcʌntel ch'ojyel i ña' bajlum. Tijicñayob pejtelel mu' bʌ i coltañob israelob, pero mux caj i tajob wocol jini mu' bʌ i p'ajob. Che' tsi' cha'le t'an Balaam.

¹⁰Cʌlʌx jax tsa' caji ti mich' Balac ti' contra Balaam. Tsa' caji i tuch'ilan i c'ʌb cha'an i mich'ajel. Tsa' caji ti a'leya: Tsac pʌyʌyet tilel cha'an ma' p'aj j contrajob, pero uxyajlix tsa' wʌq'ueyob i yutslel a t'an.

¹¹Cucux ti ora ti a lumal. Tsac lon ña'ta cʌq'ueñet cabʌl a ñuclel. Pero tsa'ix i tiq'uiyet a Yum. Ma'anix chuqui mi caj a taj, che'en.

¹²Balaam tsi' jac'be: ¿Mach ba anic tsac wʌn subeyob jini a winicob tsa' bʌ c'otiyob ti cotot? Anquese mi' yʌq'ueñon Balac jump'ejl otot but'ul bʌ ti oro ti plata, mach mejlic c ñusʌben i t'an c Yum. Ma'anic chuqui mi mejlel c mel tic bajñelil mi chuqui uts'at mi chuqui jontol. Cojach jini mu' bʌ i subeñon c Yum Dios, jiñʌch mu' bʌ c wersa sub, cho'on tsac subeyob.

¹⁴Jini cha'an muq'uix c cha' sujtel majlel ti cotot, pero ñaxan mic wʌn subeñet chuqui mi caj i yujtel ti wi'il bʌ ora che' mi' mʌlbentel jini a winicob ti' tojlel israelob, che'en.

¹⁵Tsi' subu t'an: Joñon Balaam i yalobilon Beor. Jiñʌch tsa' bʌ j q'uele che' bʌ tsi' jambeyon c wut Dios.

¹⁶Tsac ñich'tʌbe i t'an Dios, tsaj q'uele chuqui tsi' pʌsbeyon Jini Mach bʌ Anic i P'isol i P'ʌtʌlel.

¹⁷Wolij q'uel, pero maxto poj wʌleyic. Wolij q'uel, anquese jalto i yorajlel. Mi caj i loq'uel Ec'[2] ti' tojlel Jacob. Mi caj i cha'len i yumʌntel ti' tojlel israelob. Mi caj i jisan winicob ti Moab, yic'ot pejtelel i yalobilob Set.

¹⁸Jini año' bʌ ti Edom yic'ot ti Seir mi caj i wersa yumañob. Jini i lumob mi caj i sujtel ti' cha'an israelob. Mi caj i t'uchtañob i contra.

¹⁹Ti' tojlel Jacob mi caj i loq'uel juntiquil am bʌ i ye'tel mu' bʌ caj i jisan cabʌl tejclum. Che' tsi' yʌlʌ Balaam.

²⁰Balaam tsi' q'uele ja'el Amalec. Tsa' caji i sub: Jiñʌch tsa' bʌ lac ñaxan taja ti lac bijlel, pero mi caj i jisʌntel ti jini tal to bʌ q'uin, che'en. Tsi' q'uele ja'el ceneo. Tsa' caji i sub ja'el: Wen p'ʌtʌletla ya' ba' chumuletla. Wa'chocobil la' wotot ti xajlel.

²²Pero jini ceneojob mi caj i jisʌntelob. Motocña mi caj i c'otelob soldadojob tilemo' bʌ ti Asiria. Mi caj i cʌchetob majlel, che'en Balaam.

²³Balaam tsi' yʌlʌ yambʌ t'an: Wen bʌbʌq'uen jax, ¿majqui mi caj i cʌytʌl che' mi' mel Dios iliyi? Ma'anic majqui.

²⁴Cabʌl barco mi caj i loq'uel tilel ti Quitim. Mi caj i jisañob jini Asiria yic'ot jini Heber. Tsa' ujti ti t'an Balaam.

²⁵Tsa' caji ti sujtel ti' yotot Balaam. Tsa' sujti ja'el Balac.