Read Chol Numeros 29 Bible Online

Numeros 29 - Chol bible

Numeros 29

¹Yom mi la' mel i q'uiñilel Trompeta tac che' ti jo'lujump'ejl (15) tsic cha'an septiembre ti jujump'ejl jab. Mach yomic mi la' cha'len e'tel. Yom ch'ujul mi la' tempan la' bʌ ti jini q'uin.

²Che' ti jini q'uin yom mi la' pulbeñon jini xojocña bʌ c majtan, juncojt alʌ tat wacax, yic'ot juncojt tat tiñʌme', yic'ot wuccojt alʌ tat tiñʌme' am bʌ jujump'ejl i jabilel. Mach yomic i p'ajomal bʌ.

³Che' mi la' wʌq'ueñon c majtan, yom an i ñujp mi la' wʌc', jiñʌch majtañʌl bʌ harina wen chʌmen bʌ juch'bil, xajc'ubil bʌ yic'ot aceite. Yom bolomp'ejl litro cha'an jujuncojt alʌ tat wacax, wʌcp'ejl litro cha'an tat tiñʌme', uxp'ejl litro cha'an jujuncojt alʌ tat tiñʌme', wuccojt tiñʌme' che' ti' pejtelel.

⁵Yom ja'el mi la' tsʌnsʌbeñon juncojt tat chivo cha'an mic ñusan la' mul.

⁶Parte yom ili pulbil bʌ c majtan tac mu' bʌ la' wʌc' che' ti' yorajlel i q'uiñilel. Parte ja'el jini mu' bʌ la' wʌq'ueñon che' ti' tejchibal jujump'ejl uw. Parte ja'el jini mu' bʌ la' wʌq'ueñon ti jujump'ejl q'uin am bʌ i ñujp che' bajche' tsac subeyetla ti mandar.

⁷Che' ñumeñix lujump'ejl q'uin, yom mi la' cha' tempan la' bʌ ti la' pejtelel. Yom mi la' peq'uesan la' bʌ tic tojlel. Mach yomic mi la' cha'len e'tel.

⁸Ti jim bʌ q'uin yom mi la' cha' pulbeñon yambʌ c majtan, juncojt alʌ tat wacax, yic'ot juncojt tat tiñʌme', yic'ot wuccojt alʌ tat tiñʌme' am bʌ jump'ejl i jabilel mach bʌ i p'ajomalic, xojocña bʌ mi cubin.

⁹Che' mi la' wʌq'ueñon c majtan yom mi la' wʌc' yic'ot i ñujp, jiñʌch majtañʌl bʌ harina chʌmen bʌ juch'bil, xajc'ubil bʌ yic'ot aceite. Yom bolomp'ejl litro yic'ot jini alʌ tat wacax. Yom wʌcp'ejl litro cha'an jini tat tiñʌme'. Yom uxp'ejl litro cha'an jujuncojt tiñʌme', wuccojt jini tiñʌme' che' ti pejtelel.

¹¹Yom mi la' tsʌnsan juncojt tat chivo cha'an i ñusʌntel la' mul. Parte yom jini majtañʌl mu' bʌ la' tsʌnsan cha'an mulil junyajl ti jab ti jini q'uin cha'an mi' ñusʌntel mulil. Parte yom pejtelel jini c majtan mu' bʌ la' pulbeñon ti jujump'ejl q'uin, am bʌ i ñujp yic'ot harina yic'ot japbil tac bʌ majtañʌl.

¹²Che' ñumeñix jo'p'ejl q'uin mi la' cha' tempan la' bʌ ti la' pejtelel. Mach yomic mi la' cha'len e'tel. I tejchibalix ñuc bʌ q'uiñijel tic tojlel. Mux la' mel q'uin c'ʌlʌl mi' joloñel semana.

¹³Che' ti' tejchibal q'uin yom mi la' wʌc' jini majtañʌl mu' bʌ i pulel, xojocña bʌ mi cubin. Yom uxlujuncojt alʌ tat wacax, yic'ot cha'cojt tat tiñʌme', yic'ot chʌnlujuncojt (14) alʌ tat tiñʌme' am bʌ jujump'ejl i jabilel, mach bʌ i p'ajomalic.

¹⁴Jini i ñujp bʌ ti ac'ol jiñʌch majtañʌl bʌ harina chʌmen bʌ juch'bil, xajc'ubil bʌ yic'ot aceite. Yom bolomp'ejl litro cha'an jujuncojt alʌ tat wacax. Yom wʌcp'ejl litro cha'an jujuncojt tat tiñʌme'. Yom uxp'ejl litro cha'an jujuncojt alʌ tat tiñʌme'.

¹⁶Yom mi la' tsʌnsan ja'el juncojt tat chivo cha'an mi' ñusʌbentel la' mul. Parte yom jini majtañʌl tac mu' bʌ la' wʌc' ti jujump'ejl q'uin temel yic'ot i ñujp tac.

¹⁷Che' ti' cha'p'ejlel q'uin, yom mi' yʌjq'uel lajchʌncojt alʌ tat wacax, yic'ot cha'cojt tat tiñʌme', yic'ot chʌnlujuncojt alʌ tat bʌ tiñʌme' am bʌ jujump'ejl i jabilel, mach bʌ i p'ajomalic.

¹⁸Ti jujuncojt alʌc'ʌl yom i ñujp ti ac'ol, jiñʌch majtañʌl bʌ harina, yic'ot jini japbil bʌ majtañʌl.

¹⁹Yom ja'el mi la' tsʌnsan juncojt tat chivo cha'an mi' ñusʌbeñetla la' mul. Ac'ʌla yic'ot jini majtañʌl bʌ harina yic'ot jini japbil bʌ majtañʌl. Parte yom mi la' wʌc' jini pulbil bʌ majtañʌl che' bajche' ti pejtelel ora.

²⁰Che' ti yuxp'ejlel q'uin, yom junlujuncojt alʌ tat wacax, yic'ot cha'cojt tat tiñʌme', yic'ot chʌnlujuncojt alʌ tat tiñʌme' am bʌ jujump'ejl i jabilel mach bʌ i p'ajomalic.

²¹Che' ja'el yom i ñujp ti ac'ol yic'ot alʌ tat wacax, yic'ot tat tiñʌme', yic'ot alʌ tat tiñʌme' che' bajche' jaycojt an.

²²Yom ja'el mi la' tsʌnsʌbeñon juncojt tat chivo cha'an i ñusʌntel la' mul. Yom i ñujp ti ac'ol, jini majtañʌl bʌ harina yic'ot japbil bʌ majtañʌl. Parte jini mu' bʌ la' wʌq'ueñon ti jujump'ejl q'uin.

²³Che' ti' chʌmp'ejlel q'uin, yom lujuncojt alʌ tat wacax, yic'ot cha'cojt tat tiñʌme', yic'ot chʌnlujuncojt alʌ tat tiñʌme' am bʌ jujump'ejl i jabilel, mach bʌ wis i p'ajomalic.

²⁴Che' ja'el yom i ñujp ti ac'ol ti jujuncojt, jiñʌch majtañʌl bʌ harina yic'ot japbil bʌ majtañʌl.

²⁵Yom mi la' tsʌnsʌbeñon ja'el juncojt tat chivo cha'an i ñusʌntel la' mul. Temel yic'ot i ñujp mi la' wʌc' ja'el. Jiñʌch majtañʌl bʌ harina yic'ot japbil bʌ majtañʌl. Parte jini mu' bʌ la' wʌq'ueñon ti jujump'ejl q'uin.

²⁶Che' ti' jo'p'ejlel q'uin yom boloncojt alʌ tat wacax, yic'ot cha'cojt tat tiñʌme', yic'ot chʌnlujuncojt alʌ tat tiñʌme' am bʌ jujump'ejl i jabilel mach bʌ wis i p'ajomalic.

²⁷Yom i ñujp ti ac'ol. Jiñʌch majtañʌl bʌ harina yic'ot japbil bʌ majtañʌl cha'an jujuncojt alʌc'ʌl che' bajche' tsa cʌq'ueyetla c mandar.

²⁸Yom ja'el mi la' pʌy tilel juncojt tat chivo cha'an mi la' tsʌnsan, cha'an mi' ñusʌbentel la' mul. Parte jini mu' bʌ la' wʌq'ueñon ti jujump'ejl q'uin.

²⁹Che' ti' wʌcp'ejlel q'uin, yom waxʌccojt alʌ tat wacax, yic'ot cha'cojt tat tiñʌme', yic'ot chʌnlujuncojt alʌ tat tiñʌme' am bʌ jujump'ejl i jabilel mach bʌ wis i p'ajomalic.

³⁰Yom ja'el i ñujp ti ac'ol che' bajche' jaycojt an. Jiñʌch majtañʌl bʌ harina yic'ot japbil bʌ majtañʌl che' bajche' tsa cʌq'ueyetla mandar.

³¹Yom ja'el mi la' pʌy tilel tat chivo cha'an mi' tsʌnsʌntel cha'an mi' ñusʌbentel la' mul. Parte jini yambʌ c majtan tac yic'ot i ñujp tac ti ac'ol mu' bʌ la' wʌq'ueñon ti jujump'ejl q'uin.

³²Che' ti' wucp'ejlel q'uin yom wuccojt alʌ tat wacax, yic'ot cha'cojt tat tiñʌme', yic'ot chʌnlujuncojt alʌ tat tiñʌme' am bʌ jujump'ejl i jabilel, mach bʌ wis i p'ajomalic.

³³Yom i ñujp tac ti ac'ol ti jujuncojt. Jiñʌch majtañʌl bʌ harina yic'ot japbil bʌ majtañʌl. Che' tsi' yʌc'ʌ mandar lac Yum Dios.

³⁴Pʌyʌla tilel ja'el juncojt i tat chivo cha'an mi' tsʌnsʌntel cha'an i ñusʌbentel la' mul. Parte i majtan la' Yum mu' bʌ la' wʌq'uen ti jujump'ejl q'uin yic'ot i ñujp ti ac'ol.

³⁵Che' ti waxʌcp'ejl q'uin jiñʌch ñuc bʌ q'uiñijel. Mach mi la' cha'len e'tel.

³⁶Pʌybeñonla tilel c majtan cha'an mi' tsʌnsʌntel, xojocña bʌ i yujts'il tic tojlel juncojt alʌ tat wacax, yic'ot juncojt tat tiñʌme', yic'ot wuccojt alʌ tat tiñʌme' am bʌ jujump'ejl i jabilel, mach bʌ wis i p'ajomalic.

³⁷Temel yic'ot i ñujp yom ma' wʌc' che' bajche' jaycojt mi la' wʌq'ueñon. Jiñʌch majtañʌl bʌ harina yic'ot japbil bʌ majtañʌl che' bajche' tsa cʌq'ueyetla mandar.

³⁸Pʌyʌla ja'el juncojt i tat chivo mu' bʌ i tsʌnsʌntel cha'an mi' ñusan la' mul. Parte c majtan yic'ot i ñujp ti ac'ol mu' bʌ la' wʌq'ueñon ti jujump'ejl q'uin.

³⁹Jiñʌch yom bʌ mi la' wersa aq'ueñon ti jujunyajl che' ti yorajlel mi la' mel q'uin. Parte jini majtañʌl mu' bʌ la' ña'tan la' wʌc', yic'ot jini tilem tac bʌ ti la' pusic'al mi jini pulbil bʌ c majtan, mi japbil bʌ, mi harina, mi chuqui tac jach mi la' ña'tan la' wʌq'ueñon. Parte jini ofrenda mu' bʌ la' wʌq'ueñon che' mi la' wa'chocon la' t'an yic'ot che' mi la' pʌs i tijicñʌyel la' pusic'al, che'en.

⁴⁰Che'i tsi' cʌntesayob israelob Moisés che' bajche' tsi' yʌc'ʌ mandar lac Yum.