Read Chol Numeros 31 Bible Online

Numeros 31 - Chol bible

Numeros 31

¹Lac Yum tsi' sube Moisés: Subeñob jini israelob cha'an mi' jisañob jini madiañob, come tsi' xiq'uiyob ti mulil yic'ot dioste' tac. Ti wi'il mi caj a chʌmel, che'en.

³Che' jini Moisés tsi' subeyob jini israelob: Yom mi la' chajpan la' bʌ cha'an guerra. Lamital jini winicob mi caj i techob guerra ti' contra Madián, come lac Yum Dios mi caj i yʌq'ueñob i toj i mul jini madiañob.

⁴Yajcanla jump'ejl mil ti jujunmojt bʌ israelob, che'en Moisés. Che'ʌch tsi' meleyob. Ti' pejtelelob tsa' pʌjyiyob lajchʌmp'ejl mil winicob yujilo' bʌ guerra.

⁶Che' jini Moisés tsi' choco majlel ti guerra jini winicob loq'uemo' bʌ ti jujump'ejl mil ti' tojlel i pi'ʌlob. Temel tsa' majliyob yic'ot Finees i yalobil jini motomaj Eleazar. Tsi' ch'ʌmʌyob majlel jini ch'ujul tac bʌ e'tijibʌl. Tsi' wusuyob majlel jini trompeta tac.

⁷Che' jini tsa' cajiyob ti guerra yic'ot madiañob che' bajche' lac Yum Dios tsi' sube Moisés. Tsi' laj tsʌnsayob pejtelel winicob.

⁸Che' ja'el tsi' tsʌnsayob jo'tiquil rey ti Madián temel yic'ot i winicob. Jiñobʌch Eví yic'ot Requem, yic'ot Zur, yic'ot Hur, yic'ot Reba. Tsi' tsʌnsayob ja'el Balaam i yalobil Beor.

⁹Jini israelob tsi' cʌchʌyob majlel pejtelel jini x'ixicob temel yic'ot i yalobilob, yic'ot i yʌlac'ob yic'ot pejtelel chuqui tac an i cha'añob. Tsi' laj pulbeyob i tejclum tac ti jujumpejt xchumtʌl.

¹²Tsi' pʌyʌyob majlel jini x'ixicob yic'ot i yalobilob temel yic'ot i chubʌ'anob tsa' bʌ chilbentiyob. Tsi' pʌyʌyob c'otel ba'an Moisés yic'ot ba'an jini motomaj Eleazar ti' tojlel pejtelel israelob ti' joctʌlel Moab, am bʌ ti' t'ejl jini Jordán ti' tojel Jericó.

¹³Moisés yic'ot jini motomaj Eleazar temel yic'ot jini ñuc taco' bʌ i ye'tel ti' tojlel israelob tsa' majli i tajob ya' ti' ti' jini tejclum.

¹⁴Pero Moisés tsa' mich'a ti' tojlel i yumob soldadojob wolix bʌ i cha' sujtelob ti guerra.

¹⁵Tsi' subeyob: ¿Chucoch ma'anic tsa' la' tsʌnsa ili x'ixicob?

¹⁶Ña'tanla i mul Balaam. Tsi' xiq'ui jini x'ixicob cha'an mi' pʌyob israelob ti mulil cha'an mi' ñusʌbeñob i t'an lac Yum. Balaam tsi' soco jini israelob cha'an mi' ch'ujutesañob Baalpeor. Jini cha'an lac Yum tsi' tsʌnsa cabʌl israelob.

¹⁷Wʌle yomix mi la' tsʌnsan jujuntiquil ch'iton. Che' ja'el yom mi la' tsʌnsan pejtelel x'ixicob tsa'ix bʌ i pi'leyob i bʌ yic'ot winic.

¹⁸Pero pejtelel jini xch'ocob maxto bʌ pi'lebilobic i cha'an winic uts'at mi la' pʌyob.

¹⁹Ña'tanla ja'el wersa mi la' wajñel wucp'ejl q'uin ti' pat tejclum, majqui jach tsi' tsʌnsa winicob, yic'ot majqui tsi' tʌlʌ xchʌmel. Yom mi la' sʌq'uesan la' bʌ che' ti yuxp'ejlel q'uin yic'ot che' ti wucp'ejlel q'uin, yic'ot ja'el jini mu' bʌ la' pʌyob tilel.

²⁰Che' ja'el yom mi la' laj sʌq'uesan la' pislel, yic'ot jini la' pʌchi tac, yic'ot jini melbil tac bʌ ti' tsutsel chivo, yic'ot yan tac bʌ e'tijibʌl melbil bʌ ti te'. Che' tsi' yʌlʌ Moisés.

²¹Jini motomaj Eleazar tsi' sube winicob che' bʌ woli' majlelob ti guerra: Che'ʌch tsi' subeyetla lac Yum ti mandar ti' tojlel Moisés:

²²“Pejtelel mu' bʌ i jalijel ti c'ajc, oro, yic'ot plata, yic'ot bronce, yic'ot hierro, yic'ot estaño yic'ot plomo,

²³yom mi la' ñusan ti c'ajc cha'an sʌc mi' cʌytʌl. Ti wi'il yom mi la' cha' sʌq'uesan ti ja', pero pejtelel mach bʌ anic mi' lʌt'e' c'ajc, yom mi la' sʌq'uesan ti ja'.

²⁴Che' ti wucp'ejlel q'uin cha' sʌquetixla che' wuts'ulix la' pislel. Che' jini mux i mejlel la' cha' ochel ti tejclum”, che'en Eleazar.

²⁵Lac Yum tsi sube Moisés: Jatet yic'ot jini motomaj Eleazar yic'ot pejtelel año' bʌ i ye'tel, yom mi la' tsic pejtelel jini chubʌ'añʌl, yic'ot jini xch'ocob, temel yic'ot i yʌlac'ob tsa' bʌ la' taja ti guerra.

²⁷Mi caj la' t'oxbeñob israelob. Ojlil mi caj i ch'ʌmob jini tsajniyo' bʌ ti guerra. Ojlil mi' ch'ʌmob ja'el mach bʌ tsajniyobic.

²⁸Pero ñaxan yom mi la' loc'beñon c cha'an bʌ i wenta i tojoñelob jini tsajñiyo' bʌ ti guerra. Yom jump'ejl loq'uem bʌ ti jo'c'al i cha'bajc' (500), mi winicob, mi x'ixicob, mi wacax, mi burro, mi tiñʌme'.

²⁹Mi caj la' wʌq'uen jini motomaj Eleazar cha'an c majtan.

³⁰Q'uelela ja'el jini ojlil mu' bʌ i yʌq'uentelob israelob. Ch'ʌmʌla jump'ejl loq'uem bʌ ti lujump'ejl i yuxc'al tac, mi winicob, mi x'ixicob, mi wacax, mi tiñʌme'. Yom mi la' wʌq'ueñob jini levíjob mu' bʌ i cha'leñob e'tel ti Tabernáculo c cha'an bʌ. Che' tsi' yʌlʌ lac Yum Dios.

³¹Che'ʌch tsi' meleyob Moisés yic'ot jini motomaj Eleazar che' bajche' tsi' subeyob lac Yum.

³²Ti pejtelel jini chubʌ'añʌl tsa' bʌ i ch'ʌmʌyob jini winicob tsajniyo' bʌ ti guerra, jiñʌch 675,000 tiñʌme', yic'ot 72,000 wacax, yic'ot 61,000 burro, yic'ot 32,000 xch'ocob.

³⁶Jini ojlil tsa' bʌ aq'uentiyob soldadojob jiñʌch: 337,500 tiñʌme' (tsa' aq'uenti lac Yum 675), 36,000 wacax (tsa' aq'uenti lac Yum Dios 72), 30,500 burro (tsa' aq'uenti lac Yum Dios 61); 16,000 xch'ocob (tsa' aq'uentiyob levíjob 32).

⁴¹Pejtelel i cha'an bʌ lac Yum Dios tsa' aq'uenti jini motomaj Eleazar che' bajche' lac Yum tsi' sube Moisés.

⁴²Moisés tsi' t'oxo pejtelel jini tsa' bʌ i ch'ʌmʌyob c'otel jini soldadojob. Ojlil tsi' ch'ʌmʌyob jini soldadojob. Ojlil tsa' aq'uenti israelob. Tsa' aq'uentiyob israelob: 337,500 tiñʌme', 36,000 wacax, 30,500 burro, 16,000 xch'ocob.

⁴⁷Moisés tsi' loc'o jump'ejl ti jini lujump'ejl i yuxc'al i cha'an bʌ israelob cha'an mi' yʌq'ueñob jini levíjob che' bajche' tsa' wʌn subenti cha'an lac Yum Dios.

⁴⁸Che' jini tsa' tiliyob ba'an Moisés jini i yumob soldadojob loq'uemo' bʌ ti jujunmojt. Tsi' subeyob Moisés: Tsa'ix c chucbe lojon i c'aba' ti lista pejtelel jini winicob tsajniyo' bʌ ti guerra quic'ot lojon. Ma'anic tsa' sajti mi juntiquilic. Jini cha'an wolix c ch'ʌmben lojon tilel i majtan lac Yum tsa' bʌ c taja lojon ti jujuntiquil, pejtelel chuqui tac melbil ti oro, uya'ʌl yic'ot mʌtc'ʌbʌl, yic'ot ujʌl, yic'ot cadena mu' bʌ i yʌjq'uel ti c'ʌbʌl yic'ot ti ocʌl. Mi cʌc' lojon cha'an i ñusʌntel lojon c mul ti' tojlel lac Yum Dios, che'ob.

⁵¹Moisés yic'ot jini motomaj Eleazar tsi' ch'ʌmbeyob ti wenta jini wen melbil tac bʌ oro tsa' bʌ i yʌq'ueyob lac Yum jini winicob tsajniyo' bʌ ti guerra. I tojol ti' pejtelel jiñʌch 3,750,000 peso.

⁵³Ti pejtelel jini winicob tsajniyo' bʌ ti guerra tsi' tajayob chubʌ'añʌl.

⁵⁴Che' ujtemix i ch'ʌmob Moisés yic'ot jini motomaj Eleazar pejtelel jini oro tac tsa' bʌ i yʌc'ʌyob jini winicob, tsi' ch'ʌmʌyob ochel ti Tabernáculo cha'an mi' ña'tañob jini israelob bajche' tsi' coltayob lac Yum.