Read Chol Numeros 35 Bible Online

Numeros 35 - Chol bible

Numeros 35

¹Lac Yum tsi' pejca Moisés ya' ti' lumal Moab, am bʌ ti' t'ejl jini Jordán ti' tojel Jericó. Tsi' sube:

²Subeñob israelob cha'an mi' yʌq'ueñob i tejclum tac jini levíjob ba' mi' mejlelob ti chumtʌl, cha'an ya'i mi' melob i yotot. Che' ja'el yom mi la' p'isbeñob lum ya' ti' joytʌlel tejclum tac cha'an ya'i mi' yajñel i yʌlac'.

³Mi' cajelob ti chumtʌl ti jini tejclum tac. Mi caj i cʌntañob i yʌlac', i wacax yic'ot i tiñʌme' ya' ti jini lum ba' mi la' p'isbeñob ti' joytʌlel tejclum.

⁴Jini lum mu' bʌ caj la' wʌq'uen jini levíjob mi' tejchel ti' ts'ajquil tac tejclum. Yom jo'c'al i cha'bajc' (500) metro c'ʌlʌl ti jujunwejl.

⁵Che' jini ti junwejl i lum tejclum c'ʌlʌl ti yambʌ junwejl jiñʌch lujunc'al i yuxbajc' (1,000) metro.

⁶Mi caj la' wʌq'ueñob jini levíjob wʌcp'ejl tejclum ba' mi' mejlel ti puts'elob jini stsʌnsajob. Yom cha'p'ejl i yuxc'al (42) yambʌ tejclum tac.

⁷Che' ti' pejtelel yom mi' yʌq'uentelob levíjob waxʌcp'ejl i yuxc'al (48) tejclum tac yic'ot i lum ya' ti' joytʌlel jini tejclum tac.

⁸Pujquem yom jini tejclum tac ti' pamol pañimil. Ba' cabʌlob israelob on yom ja'el jini tejclum tac. Ya' ba' mach cabʌlobic jini israelob ts'ita jach yom jini tejclum tac. Che' tsi' yʌlʌ lac Yum.

⁹Lac Yum tsi' sube Moisés: Subeñob jini israelob: Che' bʌ c'axemetixla ya' ti' junwejlel Jordán ti' lumal Canaán,

¹¹yom mi la' yajcan tejclum tac ba' mi' mejlel ti puts'el jini mu' bʌ i tsʌnsan i pi'ʌl che' mach tsajalic i cha'an.

¹²Jini tejclum tac jiñʌch ba' mi' mejlel ti puts'el jini stsʌnsa cha'an mi' coltan i bʌ, cha'an ma'anic mi' q'uextʌbentel i mul jinto mi' mel i bʌ ti' tojlel jini israelob.

¹³Uxp'ejl tejclum yom ti jujunwejl Jordán. Uxp'ejl ba' mi' pasel q'uin, yambʌ uxp'ejl ti Canaán ba' mi' mejlel ti puts'el jini mu' bʌ i cha'leñob tsʌnsa.

¹⁵Ti ili wʌcp'ejl tejclum mi caj i tajob i coltʌntel israelob, yic'ot jini xjula'ob mu' bʌ i cha'leñob chumtʌl ti' tojlelob. Mi an majqui tsi' tsʌnsa juntiquil i pi'ʌl che' mach tsajalic i cha'an, mi' mejlel ti puts'el ya'i.

¹⁶Mi tsi' c'ʌñʌ tsucu taq'uin cha'an mi' tsʌnsan i pi'ʌl, che' jini stsʌnsajʌch. Jini stsʌnsa wersa yom mi' chʌmel.

¹⁷Mi xajlel tsi' c'ʌñʌ cha'an mi' tsʌnsan i pi'ʌl, che' jini stsʌnsajʌch jini winic, wersa mi' chʌmel ja'el.

¹⁸Mi te' tsi' c'ʌñʌ cha'an mi jats' i pi'ʌl, mi tsa' chʌmi, che' jini stsʌnsajʌch jini winic. Wersa mi' chʌmel.

¹⁹I yeran jini tsa' bʌ tsʌnsʌnti mi mejlel i tsʌnsan jini stsʌnsa mi tsi' taja baqui jach an.

²⁰Mi cha'an jach i mich'lel tsi' julu ti xajlel, mi tsi' chijta, mi tsi' jats'ʌ, mi tsa' chʌmi jini winic, wersa yom mi' chʌmel jini stsʌnsa.

²¹Mi wʌn i contrajobix i bʌ che' bʌ tsi' jats'ʌ, wersa mi' chʌmel jini stsʌnsa. La' tilic jini am bʌ ti' wenta cha'an mi' cha' q'uextʌben jini tsa' bʌ i cha'le tsʌnsa.

²²Mi juntiquil winic tsi' lon choco chuqui tac jach, mi te' mi xajlel, mi tsi' lowo i pi'ʌl che' mach i contrajobic i bʌ, mi tsa' chʌmi jini tsa' bʌ i taja ti julbʌl che' mach tsajalic i cha'an, la' i tsictesan i bʌ. Mi tsa' chʌmi winic che' yʌlol jach tsa' waxc'uyi jubel xajlel cha'an mi' ten,

²⁴che' jini la' i melob i bʌ jini yaño' bʌ temelo' bʌ yic'ot jini tsa' bʌ chʌmi. La' i wen c'ajtibeñob jini tsa' bʌ i cha'le, temel yic'ot i yeran jini tsa' bʌ chʌmi cha'an mi' melob ti' tojlel israelob che' bajche' woli cʌq'ueñetla mandar.

²⁵Mi tsiquil mach tsajalic i cha'an jini winic che' bʌ tsi' cha'le tsʌnsa, che' jini la' i tic'beñob i yerañob jini tsa' bʌ chʌmi cha'an ma'anix chuqui mi' chʌn tumbeñob. Mi caj i cha' chocob majlel jini winic ya' ti tejclum ba' tsajni ti puts'el. Che' jini ya' yom mi' chumtʌl. Mach mejlic ti poj loq'uel jini winic jinto mi' chʌmel jini ñuc bʌ motomaj, jini wa'chocolbil bʌ yic'ot ch'ujul bʌ aceite.

²⁶Mi tsa' loq'ui jini winic ya' baqui jaxʌl jini tejclum ba' woli' coltʌntel, mi tsa' c'oti i taj i yeran jini xchʌmel che' mach ya'ic an ti jini tejclum ba' puts'em, mi mejlel i tsʌnsan. Che' jini ma'anic i mul jini mu' bʌ i tsʌnsan.

²⁸Come tsa'ʌch subenti jini stsʌnsa cha'an ya'i mi' wersa chumtʌl ti jini tejclum, come mach mejlic ti loq'uel jinto mi' chʌmel jini ñuc bʌ motomaj. Che' chʌmenix jini ñuc bʌ motomaj, mux i colel jini stsʌnsa. Mux i mejlel ti cha' sujtel ti chumtʌl ya' ti' lumal.

²⁹Pejtelel ili t'an jiñʌch yom bʌ mi la' jac' yic'ot la' walobilob ti pejtelel ora ya' ba' mi la' majlel ti chumtʌl.

³⁰Majqui jach mi' cha'len tsʌnsa, wersa yom mi' tsʌnsʌntel ja'el, che' mi' tsictesañob cha'tiquil uxtiquil testigojob, pero mi ya' juntiquil jach jini testigo woli bʌ i sub, mach jasʌlic i t'an cha'an mi' yʌjq'uel ti chʌmel winic.

³¹Mach mi la' ch'ʌm taq'uin cha'an mi la' wʌc' ti colel stsʌnsa. Wersa mi' tsʌnsʌntel.

³²Che' ja'el mach yomic mi la' c'ajtiben multa jini winic tsa' bʌ majli ti puts'el ya' ti tejclum, che' yomix sujtel ti chumtʌl ya' ti' lumal, che' maxto chʌmenic jini ñuc bʌ motomaj.

³³Mach yomic mi la' puch' jini lum ya' ba' mi la' cha'len chumtʌl, come jini stsʌnsa mi' puch' jini lum. Mach mejlic i toj i mul jini stsʌnsa. Jini jach mi' toj i mul che' mi' tsʌnsʌntel jini mu' bʌ i cha'len tsʌnsa.

³⁴Mach yomic mi la' bibesan jini lum ya' ba' mi caj la' chumtʌl, come ya'ʌch añon ti la' tojlel. Joñoñʌch la' Yumon. Che' tsi' yʌlʌ lac Yum.