Read Chol Numeros 36 Bible Online

Numeros 36 - Chol bible

Numeros 36

¹Tsa' c'otiyob jini ñuc taco' bʌ i ye'tel año' bʌ ti Galaad ba'an Moisés yic'ot ba'an año' bʌ i ye'tel ti Israel. (Loq'uem Galaad ti Maquir i yalobil Manasés i yalobil bʌ José.)

²Tsi' yʌlʌyob: Lac Yum tsi' subeyet bajche' yom mi lac t'oxben lac bʌ lum ti Israel. Che' ja'el lac Yum tsi' subeyet cha'an wersa mi' yʌq'uentelob i lum jini xch'oc bʌ i yalobilob Zelofehad.

³Jixcu mi tsa' ñujpuniyob yic'ot israelob año' bʌ ti yambʌ lum, che' jini mi caj i majlel i lum ti' wenta i ñoxi'al ch'oyol bʌ ti yambʌ lum. Che' jini mux i t'ox jilel c lum lojon.

⁴Che' ja'el ti jini jab che' mi' yʌq'uentel wocolix i yʌlʌ lac Yum Dios, i lumob i yalobilob Zelofehad mi caj i yʌq'uentelob i pi'ʌlob ti' lumal i ñoxi'alob. Che' jini mi caj i junyajlel chijlel tic tojlel lojon, che'ob.

⁵Jini cha'an Moisés tsi' subeyob israelob chuqui tsi' sube lac Yum. Uts'at che' bajche' woli' ña'tañob jini winicob tilemo' bʌ ti José.

⁶Jiñʌch tsa' bʌ i yʌlʌ lac Yum cha'an xch'oc bʌ i yalobilob Zelofehad: “La' i cha'leñob ñujpuñel majqui jach yom yic'otob, pero ya' jach ti' lumal yic'ot i pi'ʌlob tilemo' bʌ ti José.

⁷Che' jini ma'anic mi caj i c'axel i lum ti' wenta yaño' bʌ israelob parte bʌ tsa' aq'uentiyob i lum. Come jujuntiquil israel wersa yom mi' chumtʌl ya' ti' lum i tat.

⁸Pejtelel x'ixicob año' bʌ i lum ti Israel, wersa mi' cha'leñob ñujpuñel yic'ot i pi'ʌlob lajal bʌ i ñojte'el yic'ot, cha'an che' jini ma'anic mi' chijlel i lum.

⁹Ti mojt ti mojt an la' lum. Ya' jach mi' cʌytʌl ti la' wenta. Mach mejlic ti c'axel ti' wenta yambʌ junmojt parte bʌ i ñojte'el”. Che' tsi' yʌlʌ lac Yum.

¹⁰I yalobilob Zelofehad tsi' meleyob che' bajche' lac Yum Dios tsi' sube Moisés.

¹¹Jini cha'an jini Maala, Tirsa, Hogla, Milca, yic'ot Noa i yixic'alob Zelofehad, tsa' ñujpuniyob yic'ot winicob año' bʌ ti Manasés loq'uemo' bʌ ti José. Ya' jach tsa' cʌle i lum ti' wenta i pi'ʌlob tilemo' bʌ ti Manasés.

¹³Jiñʌch jini mandar yic'ot i t'an lac Yum Dios tsa' bʌ i sube Moisés yic'ot pejtelel israelob che' ya' to añob ti' lumob Moab am bʌ ti' t'ejl Jordán, ti' tojel Jericó.