Read Chol Numeros 4 Bible Online

Numeros 4 - Chol bible

Numeros 4

¹Lac Yum tsi' pejca Moisés yic'ot Aarón: Ya' ti' tojlel levíjob yom ma' tsic jaytiquil winicob año' bʌ ti xchumtʌl tac i p'olbalo' bʌ Coat.

³Yom ma' tsic pejtelel winicob añobix bʌ lujump'ejl i cha'c'al (30) i jabilel, c'ʌlʌl ti lujump'ejl i yuxc'al (50), jiñobʌch mu' bʌ i mejlel i cha'leñob i yetel ya' ti Tabernáculo.

⁴Jini ch'ujul bʌ i ye'tel i yalobilob Coat jiñʌch iliyi: Che' mi' cajelob ti xʌmbal jini israelob, mi caj i tilel Aarón yic'ot i yalobilob cha'an mi' ticob jini joc'ol bʌ pisil ya' ti Ch'ujul bʌ Ajñibʌl. Mi caj i c'ʌñob jini pisil cha'an mi' mosob jini Arca.

⁶Mi caj i c'ʌñob i pʌchʌlel chivo cha'an mi' mosob jini pisil. Wi'il mi caj i mosob jini pʌchi ti yʌyʌx bʌ pisil. Che' jini mi caj i yotsʌbeñob i te'el tac cha'an mi' q'uechob majlel.

⁷Mi caj i tajsiñob ti yʌjyʌx bʌ pisil jini mesa cha'an ch'ujul bʌ waj mu' bʌ c pʌsbentel. Ya' ti pisil mi caj i yʌc'ob jini plato tac yic'ot i yajñib pom, yic'ot vaso tac, yic'ot jini ch'ujul bʌ waj.

⁸Che' jini mi caj i mosob ti chʌchʌc bʌ pisil. Wi'il mi' cha' mosob jini pisil ti' pʌchʌlel chivo. Che' mi' yujtel mi caj i yotsʌbeñob i te'el cha'an mi' q'uechob majlel.

⁹Mi caj i c'ʌñob yʌjyʌx bʌ pisil cha'an mi' mosob jini lámpara*, yic'ot jini mu' bʌ i c'ʌn i yʌpbeñob i c'ʌc'al, yic'ot i yajñib aceite, yic'ot i yalʌ latujlel.

¹⁰Che' jini yom mi' c'ʌñob i pʌchʌlel chivo cha'an mi' mosob pejtelel ili tac mu' bʌ i c'ʌjñel. Che' pixbilix ti pʌchi mi caj i joc'chocoñob ti te' cha'an mi' ch'ʌmob majlel.

¹¹Mi caj i c'ʌñob yʌjyʌx bʌ pisil cha'an mi' mosob jini pulʌntib melbil bʌ ti oro. Wi'ilix mi' mosob ti' pʌchʌlel chivo. Che' jini mi caj i yotsʌbeñob i te'el cha'an mi' ch'ʌmob majlel.

¹²Pejtelel yan tac bʌ e'tijibʌl mu' bʌ i c'ʌñob ya' ti Tabernáculo mi caj i pixob ti yʌjyʌx bʌ pisil. Che' jini mi' cha' pixob ti' pʌchʌlel chivo. Mi caj i joc'chocoñob ti te' cha'an mi' ch'ʌmob majlel.

¹³Yom mi' loc'ob i tʌñʌl c'ajc mu' bʌ i tempʌyel ya' ti pulʌntib*. Mi' mosob jini pulʌntib ti chʌccojan bʌ pisil.

¹⁴Mi caj i yʌc'ob pejtelel i ye'tijib cha'an pulʌntib ti' pam pisil che' bajche' jini wechel bʌ lata tac, yic'ot jini rocol bʌ i ni' tsucu taq'uin, yic'ot jini lecho' nich c'ajc, yic'ot jini taza tac, yic'ot pejtelel mu' bʌ i c'ʌjñel ya' ti pulʌntib. Mi caj i mosob ti' pʌchʌlel chivo. Che' jini mi caj i yotsʌbeñob i te'el tac cha'an mi' ch'ʌmob majlel.

¹⁵Aarón yic'ot i yalobilob mi caj i pixob jini Ch'ujul bʌ Ajñibʌl, yic'ot pejtelel mu' bʌ i c'ʌjñel ya' ti Ch'ujul bʌ Ajñibʌl. Che' laj pixbilix mi caj i tilelob i yalobilob Coat cha'an mi' ch'ʌmob majlel che' mi' techob i xʌmbal. Pero mach mejlic i tʌlob jini ch'ujul tac bʌ ame chʌmicob. Jiñʌch ch'ujul bʌ i ye'tel i p'olbal Coat.

¹⁶Pero an ti' wenta Eleazar i yalobil motomaj Aarón cha'an mi' q'uel jini aceite am bʌ ya' ti lámpara, yic'ot jini pom, yic'ot jini majtañʌl* tac melbil bʌ ti trigo, yic'ot jini aceite mu' bʌ i c'ʌjñel cha'an bojñibʌl. Mi caj i q'uel pejtelel i bʌl jini Tabernáculo yic'ot x'e'telob. Che' tsi' yʌlʌ lac Yum.

¹⁷Lac Yum tsi' subeyob Moisés yic'ot Aarón: Chʌcʌ q'uele la' bʌ cha'an ma'anic mi' chʌmelob i yalobilob Coat. Jiñʌch yom bʌ mi la' mel cha'an ma'anic mi' chʌmelob che' mi' lʌc'tesañob i bʌ ya' ti jini ch'ujul bʌ Tabernáculo. Aarón yic'ot i yalobilob mi caj i pʌsbeñob i ye'tel mu' bʌ caj i melob ti jujuntiquil.

²⁰Mach yomic mi' yochelob ti Ch'ujul bʌ Ajñibʌl i yalobilob Coat ame i q'uelob che' woli la' mos jini c'ax ch'ujul tac, ame chʌmicob.

²¹Lac Yum tsi' sube Moisés: Yom ma' tsic ja'el i p'olbal Gersón i p'olbal bʌ Leví ti jujump'ejl xchumtʌl. Pejtelel winicob añobix bʌ lujump'ejl i cha'c'al (30) i jabilel, c'ʌlʌl ti lujump'ejl i yuxc'al (50) jab mi caj a ch'ʌm ti tsic, jiñobʌch mu' bʌ mejlel i yochelob ti e'tel ya' ti Tabernáculo.

²⁴Jiñʌch i ye'tel i yalobilob Gersón: Yom mi' ch'ʌmob majlel jini pisil tac cha'an Tabernáculo, jini am bʌ ti patio yic'ot jini am bʌ ti Ch'ujul bʌ Ajñibʌl, yic'ot i yopol jini otot ti cha'lajmlel melbil bʌ yic'ot pʌchi, yic'ot jini pisil am bʌ ti' ti' otot.

²⁶Che' ja'el mi caj i ch'ʌmob majlel jini colem bʌ pisil i cha'an bʌ patio, yic'ot i cha'an bʌ i ti' jini patio am bʌ ti' joytʌlel Tabernáculo. Mi caj i ch'ʌmob majlel jini pulʌntib yic'ot pejtelel i ch'ajñal tac, yic'ot e'tijibʌl tac. An ti' wenta i yalobilob Gersón cha'an mi' ch'ʌmob majlel.

²⁷Aarón yic'ot i yalobilob mi caj i yʌq'ueñob i ye'tel i yalobilob Gersón.

²⁸Pero an ti' wenta Itamar i yalobil Aarón cha'an mi' q'uel bajche' mi' melob i ye'tel i p'olbalob Gersón.

²⁹Yom ma' tsic pejtelel i yalobilob Merari i yalobilo' bʌ Leví, pejtelel winicob añobix bʌ lujump'ejl i cha'c'al i jabilel c'ʌlʌl ti lujump'ejl i yuxc'al jab mu' bʌ mejlel i cha'leñob e'tel cha'an Tabernáculo.

³¹An ti' wenta i yalobilob Merari cha'an mi' ch'ʌmob majlel ili tac: I tablajlel jini Tabernáculo, yic'ot i te'el tac, yic'ot i c'ʌclib tac, yic'ot pejtelel i postejlel patio am bʌ ti' joytʌlel, yic'ot i buchlib tac jini poste tac, yic'ot i ch'ajñal, yic'ot pejtelel jini yan tac bʌ mu' bʌ i c'ʌjñel. Yom ma' wʌq'uen i cuch ti chajp ti chajp jujuntiquil winic cha'an mi' wen ña'tañob chuqui mi caj i cuchob.

³³Jiñʌch mu' bʌ caj i melob i yalobilob Merari cha'an jini Tabernáculo. An ti' wenta Itamar i yalobil Aarón jini motomaj cha'an mi' q'uel i ye'tel pejtelel winicob.

³⁴Jini cha'an Moisés yic'ot Aarón, yic'ot jini yumʌlob wa'chocobilo' bʌ ti jujunmojt, tsi' tsiquiyob i p'olbal Coat. Pejtelel winicob añobix bʌ lujump'ejl i cha'c'al jab c'ʌlʌl ti lujump'ejl i yuxc'al jab, pejtelel mu' bʌ mejlel i cha'leñob e'tel cha'an chuqui yom melol ya' ti Tabernáculo, tsa' tsijquiyob 2,750.

³⁷Jiñobʌch i yalobilob Coat mu' bʌ i cha'leñob e'tel ya' ti Tabernáculo. Moisés yic'ot Aarón tsi' tsiquiyob che' bajche' tsi' subeyob lac Yum Dios ti mandar.

³⁸Che' ja'el tsa' tsijquiyob i p'olbal Gersón. Pejtelel winicob añobix bʌ lujump'ejl i cha'c'al i jabilel c'ʌlʌl ti lujump'ejl i yuxc'al jab, pejtelel jini mu' bʌ i cha'leñob e'tel ya' ti Tabernáculo, tsa' tsijquiyob ti' pejtelel 2,630. Jiñobʌch i yalobilob Gersón mu' bʌ i cha'leñob i ye'tel cha'an Tabernáculo. Moisés yic'ot Aarón tsi' tsiquiyob che' bajche' tsi' yʌc'ʌ mandar lac Yum.

⁴²Che' ja'el tsa' tsijquiyob pejtelel i yalobilob Merari. Pejtelel winicob añobix bʌ lujump'ejl i cha'c'al jab c'ʌlʌl ti lujump'ejl i yuxc'al jab, pejtelel jini mu' bʌ i cha'leñob e'tel ya' ti Tabernáculo, tsa' tsijquiyob 3,200. Moisés yic'ot Aarón tsi' tsiquiyob i yalobilob Merari che' bajche' tsi' yʌc'ʌ mandar lac Yum Dios.

⁴⁶Che' jini Moisés yic'ot Aarón yic'ot i yumob israelob tsi' chajpayob i listajlel cha'an pejtelel jini levíjob che' bajche' jaytiquilob ti mojt ti mojt. Pejtelel winicob añobix bʌ lujump'ejl i cha'c'al i jabilel c'ʌlʌl ti lujump'ejl i yuxc'al i jabilel mu' bʌ i cha'leñob e'tel ya' ti Tabernáculo, yic'ot jini mu' bʌ i cha'leñob cuchijel tsa' tsijquiyob. Ti pejtelelob jiñobʌch 8,580.

⁴⁹Che' bajche' lac Yum Dios tsi' sube Moisés, che'ʌch tsi' cha'le. Tsi' tsiqui pejtelel i p'olbal Leví. Tsi' yʌq'ueyob i ye'tel ti' chajp ti' chajp.