Read Chol Numeros 8 Bible Online

Numeros 8 - Chol bible

Numeros 8

¹Lac Yum tsi' pejca Moisés: Yom ma' suben Aarón: “Che' bʌ ma' ts'ʌbe jini wucp'ejl c'ajc, ac'ʌ ba' mi' pʌs i c'ʌc'al ti' tojel a wut”, che'en lac Yum.

³Che'ʌch tsi' mele Aarón. Tsi' ts'ʌbʌ jini c'ajc tac tsolol bʌ ti jini lámpara*. Tsi' yʌc'ʌ ba' mi' pʌs i c'ʌc'al ti' tojel i wut che' bajche' tsi' sube Moisés jini lac Yum.

⁴Wen uts'atax jini lámpara, melbil ti puro oro. An i ts'ijbal, jats'bil ti martillo. Junsujm jach yic'ot i c'ʌclib, yic'ot i c'ʌb tac laj jats'bil ti martillo. Che' bajche' lac Yum tsi' wʌn sube Moisés, che'ʌch tsa' mejli.

⁵Lac Yum tsi' sube Moisés: Pʌyʌx loq'uel jini levíjob ti' tojlel israelob cha'an ma' sʌq'uesañob.

⁷Jiñʌch bajche' mi caj a sʌq'uesañob. Yom ma' ch'ʌm jini ch'ujul bʌ ja' cha'an ma' tsijcañob. Yom mi' laj jujchiñob i tsutsel i cuctal. La' i wuts'ob i pislel.

⁸Che' ujtemix jini, la' i pʌyob tilel juncojt alʌ tat wacax, yic'ot majtañʌl bʌ harina wen chʌmen juch'bil bʌ yic'ot aceite. Muq'uix a pʌy tilel yambʌ alʌ tat wacax cha'an ma' tsʌnsan cha'an mulil.

⁹Che' jini yom ma' pʌy tilel jini levíjob ba'an jini Tabernáculo ba' mi la' tempan la' bʌ quic'ot. Ya' yom ma' tempañob pejtelel israelob.

¹⁰Pʌyʌ tilel jini levíjob ba' añon. Jini israelob mi caj i sʌts'ob i c'ʌb ti' pam jini levíjob.

¹¹Che' jini Aarón mi caj i yʌc' jini levíjob tic wenta che' bajche' jump'ejl majtañʌl mu' bʌ i jʌmts'untel mu' bʌ i yʌc'ob israelob cha'an mi' melbeñoñob que'tel.

¹²Jini levíjob mi caj i yʌc'ob i c'ʌb ya' ti' jol cha'cojt alʌ tat wacax. Muq'uix a tsʌnsan juncojt cha'an mulil. Yambʌ mi caj a tsʌnsan cha'an pulbil bʌ c majtan, cha'an che' jini tojbil mi' cʌytʌl i mul jini levíjob.

¹³Muq'uix a wʌq'ueñob i ye'tel jini levíjob ti' tojlel Aarón yic'ot i yalobilob. Muq'uix a wʌc'ob tic wenta che' bajche' majtañʌl mu' bʌ i jʌmts'untel.

¹⁴Che'ʌch mi caj a pʌy loq'uel jini levíjob ti' tojlel israelob. Che' jini c cha'anix mi' cʌytʌlob jini levíjob.

¹⁵Wi'il mi caj i yochelob jini levíjob cha'an mi' cha'leñob e'tel ti Tabernáculo, che' sʌq'uesʌbilobix. C majtañobʌch jini levíjob.

¹⁶Come ti isujm c cha'añob jini levíjob ti' tojlel pejtelel israelob. I q'uexolob pejtelel yʌx alʌl bʌ ti Israel ti jujump'ejl otot. Tsac pʌyʌ jini levíjob cha'an mi' yajñelob tic tojlel i wenta jini ñaxan bʌ alʌlob israelo' bʌ.

¹⁷Come pejtelel yʌx alʌl bʌ i yalobilob c cha'añobʌch, yic'ot i yʌx'al alʌc'ʌl tac, c'ʌlʌl che' bʌ tsac tsʌnsa pejtelel jini yʌx alʌlob ti Egipto. Tsac pʌyʌyob cha'an mi' yajñelob tic tojlel.

¹⁸Jini cha'an c cha'añob pejtelel jini levíjob, i q'uexolob pejtelel ascuñʌlo' bʌ israelob.

¹⁹Tsa cʌc'ʌyob ti' wenta Aarón yic'ot i yalobilob cha'an mi' cha'leñob e'tel ti Tabernáculo ti' q'uexol israelob. Mi caj i yʌq'ueñoñob c majtan tac cha'an i mul israelob. Che' jini muq'uix i mʌctañob wocol ba' ora mi' lʌc'tesañob i bʌ ya' ti Ch'ujul bʌ Ajñibʌl jini israelob. Che' tsi' yʌlʌ lac Yum.

²⁰Che'ʌch tsi' meleyob Moisés yic'ot Aarón yic'ot pejtelel jini israelob. Tsi' ts'ʌctesayob pejtelel jini mandar tsa' bʌ aq'uenti Moisés ti lac Yum.

²¹Jini levíjob tsi' sʌq'uesayob i bʌ. Tsi' wuts'uyob i pislel. Aarón tsi' yʌc'ʌ jini levíjob ti' wenta lac Yum che' bajche' i majtan. Tsi' tsʌnsa tat wacax cha'an i mul cha'an mi' tajob i sʌq'uesʌntel.

²²Ti wi'il tsa' cajiyob ti tilel jini levíjob cha'an mi' melob i ye'tel ti Tabernáculo ti' tojlel Aarón yic'ot i yalobilob. Che'ʌch tsa' laj ts'ʌctiyi i mandar lac Yum tsa' bʌ subenti Moisés cha'an jini levíjob.

²³Che' jini lac Yum tsi' sube Moisés: Che' anix jo'p'ejl i cha'c'al i jabilel juntiquil leví, mi mejlel i tech i ye'tel ti Tabernáculo.

²⁵Jinto che' anix lujump'ejl i yuxc'al jab mi' cʌy i cha'len i ye'tel ya' ti Tabernáculo. Mi mejlel i coltan i pi'ʌlob año' bʌ i ye'tel ya' ti Tabernáculo. Pero mach yomix mi' chʌn cha'len i ye'tel che' bajche' ti yambʌ ora. Che' bajche' jini mi caj a wʌq'ueñob i ye'tel jini levíjob. Che' tsi' yʌlʌ lac Yum.