Read Chol Miqueas 1 Bible Online

Miqueas 1 - Chol bible

Miqueas 1

¹Jiñʌch i t'an lac Yum tsa' bʌ tili ba'an Miqueas ch'oyol bʌ ti Moreset che' bʌ tsi' cha'leyob yumʌl ti Judá jini reyob Jotam yic'ot Acaz yic'ot Ezequías. Tsa' subenti ili t'an cha'an mi' cha' sub ti Samaria yic'ot ti Jerusalén. Tsi' lu' q'uele chuqui tsa' pʌsbenti ti Dios.

²Ubinla jini t'an winicob x'ixicob ti pejtelel tejclum tac ti pañimil. Wʌ'an lac Yum ti ch'ujul bʌ Templo i cha'an. Woli ti t'an ti la' contra.

³Awilan, lac Yum woli' poj cʌy i yajñib ti panchan cha'an mi' tilel ti xʌmbal ñumel ti chan tac bʌ wits an tac bʌ ti pañimil.

⁴Mi' caj ti ulmʌl jini wits tac che' bajche' mi' yulmʌl ta'chʌb ti c'ajc. Mi' caj ti ejmel jubel wits c'ʌlʌl ti joctʌl che' bajche' ja' ti' ts'ejtʌlel wits.

⁵Mi caj i yujtel pejtelel iliyi cha'an ti' caj i mul Jacob yic'ot i mul Israel. ¿Chuqui i mul Jacob? Tsi' ch'ujutesa dioste' tac ya' ti Samaria. ¿Chuqui i mul Judá? Tsi' cha'le ch'ujutesa ya' ti' chañelal wits tac ti Jerusalén.

⁶Jini cha'an mi caj c jisan Samaria che' bajche' mi' jejmel ts'ajc cha'an yujquel lum. Mi caj i sujtel i lumal ti jamil ba' mi caj i pʌc'ob ts'usubil. Mi caj i laj bujchel i yoyel i yototob. Mi caj c choc jubel jini xajlel ya' ti joctʌl. Jochol mi caj i cʌytʌl jini lum.

⁷Mi caj i bic'ti tojp'el pejtelel i diosob melbil bʌ ti c'ʌbʌl. Mi caj i laj pulel jini wen ch'ʌlbil bʌ templo tac ba' tsi' cha'leyob ts'i'lel. Wa'chocobilob yic'ot i tojol i yixicob. Quisintic jax tsi' cha'leyob ch'ujutesaya, che'en lac Yum.

⁸Jini cha'an cabʌl mi caj c cha'len uq'uel yic'ot tsic pusic'al. Mi caj cubin quisin che' bajche' winic mach bʌ anic i wex cha'an ti' caj lac mul. C'am mij caj ti uq'uel che' bajche' mate'el ts'i' yic'ot xcuj.

⁹Come junyajlel sajtem c pi'ʌlob. Wa'alix lac Yum ti' ti' tac Jerusalén ba' woli' yujtel meloñel. Mi caj i yʌq'ueñob i toj i mul.

¹⁰Mi caj i yubiñob wocol jini año' bʌ ti Gat. La' i cha'leñob uq'uel jini año' bʌ ti Baca. Mi caj i ñolq'uiñob i bʌ ti ts'ubejn ya' ti Betleafra cha'an quisin.

¹¹Ixix majlelob ti majtan e'tel jini año' bʌ ti Safir, pits'ilobix. Cabʌl woliyob ti quisin. Jini año' bʌ ti Zaanán mi' mujcuñob i bʌ cha'an bʌq'uen. Ma'anix tsiquil baqui buchul tac i yototob jini chumulo' bʌ ti Betesel.

¹²Woli' cha'leñob tsic pusic'al jini chumulo' bʌ ti Marot che' woli' lon pijtañob i coltʌntel, come tsa'ix c'oti ñuc bʌ wocol c'ʌlʌl ti' ti' Jerusalén, chocbil tilel i cha'an lac Yum.

¹³Winicob chumulet bʌ la ti Laquis, yom mi la' puts'el ti caballo tac yujil bʌ ajñel, come jatetla ñaxan tsa' la' ñopbe i diosob jini israelob. Wi'ilix tsa' la' pʌsbeyob a pi'ʌlob ti Judá. Temel tsa' la' ch'ujutesa jini dioste' tac.

¹⁴Ma'anic i coltʌntel jini año' bʌ ti Moreset Gat. Mi caj i loq'uelob majlel. Jini año' bʌ ti Aczib tsi' lon aq'ueyob i t'an i reyob Israel cha'an mi' coltañob. Tsa' jach i lotiyob.

¹⁵Joñon mi caj c pʌy tilel ti Maresa jini mu' bʌ caj i chilbeñob i tejclum. Mi caj i c'ʌlʌl c'otelob ti Adulam, wen i t'ojol bʌ tejclum ti' wut israelob.

¹⁶Yom mi la' cha'len uq'uel jatetla mu' bʌ la' c'uxbin la' walobilob tsa' bʌ la' meq'ue, come mi caj la' chilbentel. Ma'anix mi caj la' chʌn q'uelob. Tsa'ix pʌjyiyob majlel ti to'ol e'tel ti ñajt tac bʌ pañimil. Jujchin la' jol cha'an i ch'ijiyemlel la' pusic'al.