Read Chol Miqueas 2 Bible Online

Miqueas 2 - Chol bible

Miqueas 2

¹Obolob i bʌ jini winicob mu' bʌ i pensariñob jontolil ti ac'ʌlel che' cañal i wut ti' wʌyib. Che' bʌ tsa'ix sʌc'a pañimil, mi' melob chuqui tsi' ña'tayob, che' añʌch i p'ʌtʌlel.

²Che' mi' mulañob lum, mi' cha'leñob lot yic'ot tic'laya cha'an mi' chilbeñob i lum i pi'ʌlob yic'ot pejtelel chuqui an i cha'añob.

³Jini cha'an lac Yum woli' yʌl: Awilan an chuqui wolic pensarin ti' contra ili xchumtʌlob ti' caj i mul. Mach mejlic la' lʌt' jini wocol mu' bʌ caj i tajetla. Ma'anic mi caj la' chʌn chañ'esan la' bʌ che' mi' yujtel ili wocol.

⁴Ti jim bʌ ora mi caj i wajleñetla la' contrajob. Mi caj i tse'tañetla che' ch'ijiyem mi la' cha'len uq'uel. Mi caj la' wʌl: “Junyajlel jisʌbilonixla. Isujm lac Yum tsa'ix i laj chilbeyonla lac lum. Tsi' cha' t'oxbeyob yaño' bʌ. Tsa'ix i chocoyonla majlel ti ñajtʌl”. Che'ʌch mi caj la' wuc'tan la' bʌ, che'en lac Yum.

⁵Jini cha'an ma'anix mi' cʌytʌl mi juntiquilic mu' bʌ mejlel i yotsʌbeñet i mojonlel la' lum. Jini winicob i cha'año' bʌ lac Yum mi caj i pʌjyelob majlel ti' wenta yambʌ yumʌlob.

⁶C pi'ʌlob mi' tic'oñob ti t'an: Mach yomic ma' cha'len t'an che' bajche' jini. Leco mi cubin lojon. Mach talic wocol ti lac tojlel. Ma'anic mi caj cubin lojon quisin, che'ob.

⁷I yalobiletla Jacob. ¿Yom ba mi la' tic'ben i yEspíritu lac Yum? ¿Yom ba mi' pejcañetla ti tsʌts bʌ t'an? Mach yomic. An cabʌl i c'ʌjñibal c t'an ti' tojlel jini mu' bʌ i jac'ob i toj'esʌntel.

⁸Pero c'ʌlʌl wʌle jini c cha'año' bʌ mi' contrajiñoñob. Mi la' chilbeñob i bujc la' pi'ʌlob ti chumtʌl mu' bʌ i wen pejcañetla yic'ot jini xñumelob mach bʌ yujilobic leto.

⁹Tsa'ix la' chilbeyob i yototob jini meba' x'ixicob. Tsa'ix la' tic'layob i yalobilob. Tsa'ix la' chilbeyob i wenlel tilem bʌ ti Dios.

¹⁰Tejchenla, loq'uenla, come ma'anix la' chumlib ilayi cha'an cabʌl tsa'ix la' cha'le jontolil. Mi caj la' chojquel loq'uel ti jini lum.

¹¹Mi tsa' caji' yʌl juntiquil winic: “Subt'añon, mi caj c tsictesʌbeñetla cha'an uts'at mi lac cha'len yʌc'ajel yic'ot vino yic'ot lembal”. Mi che'ʌch tsi' cha'le lot, tijicña tsa' la' jac'be i t'an ti jump'ejl la' pusic'al.

¹²Isujm mic subeñetla, tal i yorajlel mi caj c muchq'uin i colojbal israelob. Mi caj c muchq'uiñetla tilel che' bajche' tiñʌme'. Che' much'uletla ti jump'ejl corral ti' wenta jump'ejl a yum, tijicña mi caj la' wubin.

¹³Ñaxan mi caj i majlel ti' tojel la' wut jini mu' bʌ caj i pʌt majlel jini bij. Mi caj i pʌyetla loq'uel ti' wenta yambʌ yumʌlob. Mi caj i jambeñetla i ti' ts'ajc ba' ñup'uletla cha'an mi la' sujtel ti la' lumal. La' rey mi caj i majlel ti' tojel la' wut. Jiñʌch la' Yum. Mi caj i toj'esañetla majlel ti la' bijlel.