Read Chol Miqueas 7 Bible Online

Miqueas 7 - Chol bible

Miqueas 7

¹Obol jax c bʌ, come lajalon bajche' jini te' che' ujtemix i tuc'bentel i wut. Lajalon bajche' jini mu' bʌ i chʌcʌ sʌclan ts'usub yic'ot higo che' tsa'ix ñumi i yorajlel. Ma'anix mi' cʌytʌl mi ts'ita'ic cha'an mij c'ux, anquese cabʌl c wo'lel. Che' ja'el tsa'ix lu' jiliyob ti pañimil jini winicob tojo' bʌ i pusic'al. Ma'anix mi juntiquilic ila ti pañimil. Ti pejtelelob mi' cha'leñob tsʌnsa. Mi' chijtañob i pi'ʌlob che' bajche' xchijtaya me'.

³Wen bʌxob ti jontolil. Wen ñʌmʌlob ti mulil. Jini xmeloñelob yic'ot año' bʌ i ye'tel mi' wersa c'ajtiñob taq'uin ñumen bajche' yom. Jini wen chumulo' bʌ on mi' yʌq'ueñob taq'uin cha'an mi' tajob i coltʌntel ti jontolil. Che' jini mi' tem socob meloñel.

⁴Jini uts'at bʌ ti' wut i pi'ʌlob lajal i jontolil. Lajalʌch bajche' junts'ijt ch'ix o mi juntejc ch'ixte' cabʌl bʌ i c'ʌb. Mach jalix tal i yorajlel che' mi caj a toj a mul che' bajche' tsa' subentiyet. Mux i toj sajtel a pusic'al.

⁵Mach yomic ñuc ti a pusic'al jini amigo a cha'an yic'ot a pi'ʌlob, yic'ot a wijñam am bʌ ti a wotot.

⁶Come jini alob mi caj i ts'a'len i tat, jini xch'oc mi caj i yʌ'len i ña'. Jini c'ajtibil bʌ xch'oc mi caj i p'aj i yʌ'lib. Ya' jach ti' tojlel i pi'ʌlob mi caj i taj i contrajintel i yum otot.

⁷Pero joñon mi caj c chʌn q'uel ti ñuc lac Yum. Mi caj c chʌn pijtan j coltʌntel ti Dios, come mi caj i yubin c t'an.

⁸Jatet mu' bʌ a contrajiñon, mach a lon tijicñesan a pusic'al. Come anquese tsac poj ubi wocol, mi caj c cha' taj c wenlel. Anquese añon ti ac'ʌlel yilal, lac Yum mi caj i cha' pʌsbeñon i sʌclel.

⁹Mi caj j cuch che' mi' ju'sʌbeñon c pusic'al lac Yum, come tsac cha'le mulil ti' contra lac Yum. Mi caj i coltañon loq'uel ti' wenta j contrajob. Mi caj i yʌq'ueñob i toj i mul cha'an tsi' tic'layoñob. Mi caj i loc'sañon ba' i'ic' pañimil cha'an mi cajñel ti' sʌclel pañimil. Mi caj i pʌsbeñon i yutslel.

¹⁰Che' mi' q'uelon j contra, mi caj i yubin quisin cha'an tsi' wajleyon. Tsi' subeyon: ¿Bac'an tsiquil a Yum Dios? che'en. Mi caj j q'uel che' p'ump'un mi' t'uchtʌntel che' bajche' oc'ol ti bij.

¹¹Tal i yorajlel mi caj i cha' wa'chocontel i ts'ajquil Jerusalén, pero mach ya'ic ba' jaxʌl ti ñaxan. Mi caj i yutsi ñuc'an jini tejclum.

¹²Ti jim bʌ q'uin mi caj i tilelob jini año' bʌ ti Asiria yic'ot ti Egipto yic'ot ti junwejl jini ñoj ja' Eufrates, yic'ot ti junwejl jini ñajb tac, yic'ot ti wits tac.

¹³Pero ñaxan mi caj i laj jisʌntel i lumal Israel cha'an ti' caj i jontolil.

¹⁴La' c Yum. Cʌntan jini winicob x'ixicob a cha'año' bʌ, come jiñobʌch a wʌlac'. Yom tijicña mi' yajñelob ti potrero tac ya' ti Basán yic'ot ti Galaad che' bajche' ti yambʌ ora.

¹⁵Lac Yum tsi' jac'ʌ: Mi caj c cha' pʌsbeñetla ñuc tac bʌ c melbal che' bajche' tsac pʌsbeyob la' tatob che' bʌ tsac loc'sayob ti majtan e'tel ya' ti Egipto.

¹⁶Ti pejtelel pañimil mi caj i q'uelob c p'ʌtʌlel. Mi' cajelob ti quisin, come tsi' lon q'ueleyob i bʌ ti ch'ejl. Mi caj i mʌcob i yej. Mʌcʌl i chiquin cha'an bʌq'uen, che'en.

¹⁷Mi caj i peq'uesʌntelob che' bajche' lucum jexecña bʌ mi' majlel ti lum. Mi caj i loq'uelob ya' ba' muculob che' bajche' motso'. Tsiltsilñayob ti bʌq'uen mi caj i tilelob ti' tojlel lac Yum. Mi caj i bʌc'ñañob ti pejtelel i pusic'al.

¹⁸¿Am ba yambʌ Dios lajal bajche' jatet? Jatet jach ma' ñusan mulil. Ma' wʌc' ti ñajʌyel ti a pusic'al i jontolil a winicob tsa' bʌ colobʌjiyob. Come mach mich'etic ti pejtelel ora, Dios. Tijicña a pusic'al che' ma' pʌsbeñon lojon a c'uxbiya.

¹⁹Mi caj a cha' p'untañon lojon. Mi caj a mucbeñon lojon c mul. Ñajt mi caj a lu' choc ochel c mul lojon ti' yebal colem ñajb.

²⁰Mi caj a wʌq'ueñon lojon i yutslel a t'an che' bajche' tsa' sube Jacob ti wajali. Mi caj a c'uxbiñon lojon che' bajche' tsa' sube Abraham yic'ot yambʌ c ñojte'el lojon.