Read Chol Nahum 2 Bible Online

Nahum 2 - Chol bible

Nahum 2

¹Wen cʌntanla i ts'ajquil Nínive. Tsa'ix tili i contrajiñetla jini yujilo' bʌ jisaya. Wen q'uelela jini bij. Chajpanla la' bʌ, wen p'ʌtesan la' bʌ.

²Come lac Yum mi caj i coltan Judá yic'ot Israel. Mi caj i cha' ac' ti colel, anquese jisʌbilix i chubʌ'an cha'an Asiria.

³Chʌchʌc i mʌctijib tac jini soldadojob. Chʌchʌc i pislel jini p'ʌtʌl bʌ winicob, la' contrajob. Che'ʌch yilal i carreta tac bajche' i c'ʌc'al q'uin, che' bajche' i nich c'ajc lemlemña woli' pulel. Tujc'ʌbil i carreta tac ti caballo. Wen ch'ejlob ti xʌmbal jini caballo.

⁴P'is woli ti ajñel jini carreta tac ti calle. Ora jach mi' ñumel. Mi' tilel mi' majlel. Lajalʌch yilal bajche' te' woli bʌ ti lejmel. Mi' ñumel tac che' bajche' chajc.

⁵Jini rey mi' pʌy tilel año' bʌ i ye'tel ti guerra. Tʌclaw mi' majlelob ti ajñel ba'an i ts'ajquil tejclum cha'an mi' coltañob i bʌ.

⁶Pero lolom jach. Tsa'ix jajmi i ti' tac jini colem ja' mu' bʌ i mʌctan ja' ame ochic ti tejclum. Wolix ti jejmel jini wen melbil bʌ otot i cha'an rey.

⁷Woli' pʌyob loq'uel i yixic'al rey, pits'ilix. Cʌchʌl woli' pʌjyel majlel. Ch'ijiyemob jini criadajob. Woli' yuc'tañob. Che'ʌch yubil i yuq'uel bajche' i t'an xmucuy. Woli' jats'ob i tajn cha'an i ch'ijiyemlel.

⁸Lajalʌch Nínive bajche' arroyojil, ora bʌ mi' sajp'ejl. Wa'i', wa'i', che'ob ti c'am bʌ t'an, pero mach i jac'ʌyic i soldadojob. Mi' chʌn puts'elob majlel.

⁹Woli' xujch'ibentel sʌsʌc taq'uin, come pamal an jini chubʌ'añʌl. Cabʌlix jini letsem tac bʌ i tojol ti chajp ti chajp. Ma'anic i p'isol. Woli' laj chilbentel.

¹⁰Jocholix jini tejclum. Laj jisʌbilix. Jejmenix jini otot tac. C'uñob i pusic'al jini ya' bʌ chumulob. Tsiltsilñayob i pix ti bʌq'uen. Cabʌl jax i ch'ijiyemlel, sʌcobix i wut cha'an bʌq'uen.

¹¹¿Bacan Nínive wʌle? Jini colem tejclum tsi' pʌsʌ i bʌ che' bajche' bajlum ti' tojlel yan tac bʌ tejclum. Wen ch'ejl. Wen yujil leto. Ma'anic majqui yujil bʌq'uen, mi xñoxob, mi jinic alobob. ¿Baqui woli' mucob i bʌ wʌle?

¹²Wajali p'ʌtʌlet Nínive che' bajche' bajlum. Tsa' jisa a contrajob cha'an ma' we'san a walobilob yic'ot a wijñamob. Cabʌl tsa' tempa tilel chubʌ'añʌl yic'ot mozojob. Tsa' bujt'i otot tac ti a xujch'.

¹³Pero i Yum Panchan yic'ot Pañimil wolix i contrajiñet. Wolix i jisʌbeñet a we'tijib cha'an guerra. Ya' wa'al jach a carreta tac. Ma'anix i yum. Chʌmeñobix jini ch'iton winicob c'uxbibilo' bʌ a cha'an. Ma'anix mi caj a cʌch tilel winicob cha'an ma' wotsañob ti to'ol e'tel. Ma'anix mi caj a cha'len yumʌl ti pañimil.