Read Chol Nahum 3 Bible Online

Nahum 3 - Chol bible

Nahum 3

¹Obol a bʌ Nínive, pʌjq'uemet ti' ch'ich'el winicob. A wujil tsʌnsa. A wujil lotiya. A wujil xujch'. Ñʌmʌlet ti jontolil.

²Ubin i t'an asiyal che' woli' tilel jini carreta tac yic'ot caballo tac, che' mi' tilelob ti ajñel cha'an mi' contrajiñet.

³Q'uele jini lemlemña bʌ espada yic'ot lanza tac chucul bʌ i cha'an jini c'ʌchʌlo' bʌ soldadojob. Mach mejlic ti tsijquel jini chʌmeño' bʌ. Lʌtsʌlob ti calle tac jini ch'ujlelʌlob ti pejtelel jini tejclum. Winicob mi' jats'ob i yoc ti ch'ujlelʌl baqui jach mi' ñumelob.

⁴Cha'an ti' caj i mul Nínive tsa'ix tili ili wocol, come i contrajob Dios. Tsi' mele che' bajche' ts'i'lel bʌ x'ixic. I t'ojol jax jini tejclum yujil bʌ lot, yujil bʌ wujt. Tsi' lotiyob yan tac bʌ tejclum cha'an mi' cʌyob chuqui toj. Tsi' cʌntesayob cha'an mi' ch'ujutesañob dioste' tac.

⁵I Yum Panchan yic'ot Pañimil woli' yʌl: Wolij contrajiñet. Pejtelel año' bʌ ti pañimil mi caj i q'uelet che' pits'ilet, Mi caj cʌq'uet ti quisin.

⁶Mi caj c pʌq'uet ti' ta' alʌc'ʌl. Ts'a' mi caj j q'uelet. Mi caj c tsictesañet ti' tojlel pejtelel winicob cha'an jontolet.

⁷Jini mu' bʌ i q'uelet mi caj i tʌts' i bʌ. Mi caj i toj sajtelob i pusic'al. Jisʌbilix Nínive, che'ob. Pero ma'anic majqui mi caj i yuc'tañet. Ma'anic majqui mi' ñʌch'tesʌbeñet a pusic'al.

⁸¿Ñumen xuc'ulet ba bajche' jini tejclum Tebas? Ya'an Tebas ti jini colem ja' Nilo. Joyol ti ja' i wenta ts'ajc.

⁹Wen amigojob i bʌ yic'ot Etiopía yic'ot Egipto ba' tsi' taja i coltʌntel Tebas ti guerra. Ma'anic i p'isol i p'ʌtʌlel. Put yic'ot Libia tsi' coltayob ja'el.

¹⁰Pero Tebas tsa' jisʌnti yic'ot jini ya' bʌ chumulob. Cʌchʌlob tsa' pʌjyiyob majlel ti to'ol e'tel. Jini alʌlob tsa' chojquiyob jubel ti xajlel tac ti jujump'ejl calle. Tsa' chʌmiyob. Jini soldadojob tsi' cha'leyob alas cha'an mi' q'uelob majqui mi' ch'ʌm ti' wenta jini año' bʌ i ye'tel. Tsi' yotsayob ti mozo. Cʌchʌlob ti cadena tac jini año' bʌ i ye'tel.

¹¹Jatetla ja'el ya' ti Nínive mi caj la' majlel che' bajche' xyʌc'ajel. C'unix pañimil mi caj la' wubin che' ma' mʌc a bʌ cha'an bʌq'uen ti' tojlel la' contrajob.

¹²Mi caj i jisʌntel pejtel jini ts'ajquibil bʌ otot tac. Mi caj i yajlelob che' bajche' c'ʌnix bʌ i wut higuera che' mi' yujcuntel cha'an jini mu' bʌ i c'ux.

¹³C'uñobix mi caj i laj sujtelob la' soldadojob che' bajche' x'ixicob. Mi caj i jajmel i tranca tac tejclum cha'an mi' yochelob la' contrajob. Mi caj i pulob ti c'ajc.

¹⁴Chajpan la' bʌ come mi caj i joy contrajiñetla. Luchula tilel ja'. P'ʌtesanla jini wen melbil tac bʌ otot ba' mi caj la' wochel cha'an mi la' coltan la' bʌ. Ochenla ba' mi' joc'ob oc'ol. Melela cabʌl ladrillo cha'an mi la' cha' mel i ts'ajquil jini tejclum.

¹⁵Pero mach loq'uiquetla. Che' woli to la' chajpan la' bʌ, jini c'ajc mi caj i jisañetla. Mi caj i tsʌnsañetla ti espada. Jini la' contrajob mi caj i jisañetla che' bajche' pimel mu' bʌ i c'ux sajc'. Anquese cabʌl mi la' p'ojlel, ma'anic mi caj la' colel.

¹⁶Tsa' wen p'ojliyob xchoñoñel ti la' tojlel che' bajche' ec'. Tsi' but'uyob jini tejclum ti chubʌ'añʌl. Pero much'ucña la' contrajob. Mi caj i ch'ʌmob majlel la' chubʌ'an.

¹⁷Jini año' bʌ i ye'tel mi caj i much'quiñob i bʌ che' bajche' sajc' che' ti' yorajlel tsʌñal. Pero mi caj i yajñesʌntelob majlel cha'an i contrajob. Mi' majlelob che' bajche' sajc' che' mi' q'uixñan pañimil ti q'uin.

¹⁸Ubin, rey ti Asiria, chʌmeñobix jini año' bʌ i ye'tel ti a lumal. Pam pujquemobix ti wits tac a soldadojob yic'ot i pi'ʌlob. Ma'anix majqui mi' chʌn tempañob.

¹⁹Mach lajmix a lojwel. Mux caj a chʌmel. Tijicñayob i pusic'al pejtel mu' bʌ i yubiñob. Mi caj i cha'leñob son. Mi caj i jats'ob i c'ʌb, come mi caj a chʌmel, jatet tsa' bʌ a tic'layob.