Read Chol Sofonias 1 Bible Online

Sofonias 1 - Chol bible

Sofonias 1

¹Lac Yum tsi' pejca Sofonías (i yalobil Cusi, i yalobil bʌ Gedalías, i yalobil Amarías, i yalobil Ezequías) ti jini jabil che' woli' yumʌntel jini rey Josías (i yalobil Amón) ya' ti Judá.

²Lac Yum tsi' sube: Mi caj c jisan pejtel a lumal yic'ot pejtel chuqui tac an, che'en.

³Mi caj c jisan winicob, yic'ot pejtel cotcotña bʌ, yic'ot xwejlel mut, yic'ot chʌy am bʌ ti ja', yic'ot xmulilob yic'ot i maña. Mi caj c junyajlel jisan winicob yic'ot pejtel chuqui tac mi' c'uxbiñob.

⁴Mi caj cʌq'ueñob wocol ya' ti Judá yic'ot ti Jerusalén. Mi caj c laj jisan jini mu' bʌ i ch'ujutesañob Baal yic'ot i motomajob. Ma'anix mi caj i chʌn ña'tʌntelob i c'aba'.

⁵Mi' lon ñocchocoñob i bʌ ti calle cha'an mi' ch'ujutesañob jini q'uin yic'ot uw yic'ot ec'. Mi' lon tajoñob ti t'an che' woli' ch'ujutesañob Milcom.

⁶Mi caj c tem jisan jini tsa' bʌ i cʌyʌ i tsajcañon yic'ot jini mach bʌ anic tsi' tsajcayon, mach bʌ anic tsi' pejcayon, che'en lac Yum.

⁷Ñʌjch'enla ti' tojlel lac Yum Dios, come lʌc'ʌlix jini q'uin che' mi caj i cha'len meloñel lac Yum. Mi caj i yʌc'ob ti tsʌnsʌntel i tejclumob. Yajcʌbilob mu' bʌ caj i cha'leñob tsʌnsa.

⁸Lac Yum tsi' yʌlʌ: Ti' yorajlel meloñel mi caj cʌq'ueñob i toj i mul jini ñuc bʌ yumʌlob, yic'ot año' bʌ i ye'tel ti Judá, yic'ot pejtel mu' bʌ i lon ch'ʌlob i bʌ che' bajche' sajtemo' bʌ.

⁹Ti jim bʌ q'uin mi caj cʌq'ueñob i toj i mul pejtel mu' bʌ i tsajcañob i costumbre jini mach bʌ anic mi' cʌñob Dios. Mi caj i tojob i mul mu' bʌ i cha'leñob xujch', yic'ot tsʌnsajob mu' bʌ i but'beñob i yotot i yumob yic'ot i xujch'.

¹⁰Ti jim bʌ q'uin cabʌl mi caj i cha'leñob uq'uel yic'ot oñel ya' ti' ti' tac Jerusalén, yic'ot ti entʌl, yic'ot ya' ti bujbujtʌl.

¹¹Cha'lenla oñel winicob ti choñoñibʌl, come mach chʌn talobix xchoñoñelob. Ma'anix i ye'tel jini mu' bʌ i p'isob taq'uin.

¹²Ti jim bʌ ora mi caj c tsajin ñumel Jerusalén yic'ot c'ajc cha'an mi cʌq'ueñob i toj i mul jini winicob sojlemo' bʌ ti mulil. Mi' yʌlob ti' pusic'al: “Ma'anic i c'ʌjñibal lac Yum. Mach yujilic coltaya, mach yujilic jisaya”, che'ob.

¹³Jini cha'an mi caj i laj chilbentelob i chubʌ'an che' mi' tilelob i contrajob. Jochol mi caj i cʌytʌl i yototob. Jini mu' bʌ i wa'chocoñob i yotot ma'anic mi caj i chumtʌlob ya'i. Jini mu' bʌ i pʌc'ob i ts'usub ma'anic mi caj i japob i ya'lel ts'usub.

¹⁴Lʌc'ʌlix jini bʌbʌq'uen bʌ q'uin. Mach jalix mi' tilel. Wen bʌc'ñʌbil i t'an lac Yum ti jini q'uin. C'am mi' cajelob ti oñel jini ch'ejlo' bʌ.

¹⁵Jini q'uin i q'uiñilelʌch i mich'ajel lac Yum, i q'uiñilel i ch'ijyemlel yic'ot wocol yic'ot mel pusic'al yic'ot c'oj'ol. I q'uiñilelʌch ic'ch'ipan bʌ pañimil, che' mʌcʌcña pañimil.

¹⁶I q'uiñilelʌch guerra che' mi' wustʌl jini trompeta, come bʌbʌq'uen mi' jilelob jini wen p'ʌtʌl bʌ tejclum.

¹⁷Mi caj cʌq'ueñob wocol winicob. Tʌctʌcña mi' cajelob ti xʌmbal che' bajche' xpots' cha'an tsi' cha'leyob mulil ti' contra i Yum. Jini cha'an mi caj cʌc' ti bejq'uel i ch'ich'el che' bajche' ja'. Mi caj i sujtel i bʌc'tal che' bajche' i ta' alʌc'ʌl, che'en.

¹⁸Mach mejlic i coltañet a taq'uin ti' q'uiñilel wocol che' mich' lac Yum, come pejtel pañimil mi caj i jisʌntel cha'an i mich'lel. Isujm mach jalic mi caj i laj jisan jini año' bʌ ti Judá.