Read Chol Hageo 2 Bible Online

Hageo 2 - Chol bible

Hageo 2

¹Che' ti' tejchibal octubre, jini x'alt'an Hageo tsa' caji i sub i t'an lac Yum.

²Lac Yum tsi' sube: Pejcan Zorobabel, jini gobernador ya' ti Judá, yic'ot Josué jini ñuc bʌ motomaj, yic'ot winicob x'ixicob ya' bʌ chumulob.

³¿Jaytiquiletla tsa' la' q'uele i ñuclel jini ñaxan bʌ Templo? ¿Bajche' yilal jini tsiji' bʌ woli bʌ la' q'uel? Woli la' wʌl mach i t'ojolic iliyi che' bajche' jini ñaxan bʌ. ¿Mach ba isujmic?

⁴Wʌle, Zorobabel, tijicñesan a pusic'al, che'en lac Yum. Tijicñesan a pusic'al, Josué, ñuc bʌ motomajet. Ti la' pejtelel wʌ' bʌ añetla ti la' lumal, tijicñesan la' bʌ, che'en lac Yum. Cha'lenla e'tel, come añon quic'otetla

⁵che' bajche' tsa' cʌq'ueyetla c t'an che' bʌ tsac pʌyʌyetla loq'uel ti Egipto, che'en i Yum Panchan yic'ot Pañimil. Jini quEspíritu mi' yajñel ti la' tojlel. Mach la' cha'len bʌq'uen.

⁶Come woli' yʌl i Yum Panchan yic'ot Pañimil: Ti jumuc' to mi caj c ñijcan panchan yic'ot pañimil, yic'ot colem ñajb yic'ot lum.

⁷Mi caj c ñijcan pejtel colem tejclum tac. Mi caj i tilel jini C'ax i T'ojol jax bʌ mu' bʌ i pijtañob winicob x'ixicob ti pejtelel pañimil. Mi caj c bujt'esan ili cotot tic ñuclel, che'en i Yum Panchan yic'ot Pañimil.

⁸C cha'añʌch jini plata yic'ot jini oro ti pañimil, che'en lac Yum.

⁹Ñumen ñuc mi caj i tsictiyel i ñuclel ili otot bajche' jini ñaxan bʌ, che'en lac Yum. Mi caj cʌq'ueñetla i ñʌch'tʌlel la' pusic'al ti ili ajñibʌl, che'en lac Yum.

¹⁰Che' ti' tejchibal diciembre, che' cha'p'ejlix jab woli' cha'len i yumʌntel jini rey Darío, jini x'alt'an Hageo tsa' caji i cha' sub i t'an lac Yum:

¹¹C'ajtibeñob motomajob chuqui ts'ijbubil ti ley.

¹²Mi an motomaj xojbil bʌ i cha'an ch'ujul bʌ i bujc, mi tsi' tʌlʌ waj, mi vino, mi we'elʌl yic'ot i pislel, ¿mu' ba caj i yajñel ti ch'ujul chuqui tac tsi' tʌlʌ? che'en. Jini motomajob tsi' jac'ʌyob: Ma'anic, che'ob.

¹³Che' jini Hageo tsi' yʌlʌ: Mi bibi'ix juntiquil cha'an tsi' tʌlʌ chuqui tac chʌmen, mi tsi' tʌlʌ i bʌl ñʌc'ʌl, ¿mu' ba caj i bib'esʌntel? che'en. Jini motomajob tsi' jac'ʌyob: Mu' cu, che'ob.

¹⁴Hageo tsi' yʌlʌ: Lac Yum woli' yʌl: Che'ʌch mi' yujtel ti' tojlel ili winicob x'ixicob, yic'ot ti' tojlel ili colem tejclum am bʌ ti' tojel c wut, yic'ot pejtel i melbal tac i c'ʌb. Bibi' pejtelel c majtan mu' bʌ i yʌq'ueñoñob, che'en lac Yum.

¹⁵Wʌle, ña'tanla ti la' pusic'al chuqui mi' caj ti ujtel wʌle yic'ot ti tal to bʌ ora. Che' maxto lʌtsbilic xajlel ya' ti' Templo lac Yum,

¹⁶¿bajche' añetla? Che' bʌ tsa' c'oti winic ba' much'quibil trigo ya' ba' tsi' p'isi junc'al, awilan, an jax lujump'ej. Che' bʌ tsa' c'oti ba' tsi' loto i ya'lel ts'usub cha'an mi' luch loq'uel lujump'ejl i yuxc'al, awilan, an jax junc'al.

¹⁷Tsa cʌq'ueyetla wocol. A pʌc'ʌb tsi' taja c'ʌnc'ʌn uch yic'ot i cuxemal yic'ot tuñija', pero ma'anic tsa' la' sutq'ui la' bʌ ba' añon, che'en lac Yum.

¹⁸Wʌle añonixla ti chʌmp'ejl i cha'c'alix tsic. Ña'tanla bajche' añetla che' bʌ tsa' la' wa'choco i c'ʌclib i Templo la' Yum c'ʌlʌl wʌle.

¹⁹Maxto anic tsa' la' tuc'u ochel trigo ti' yotlel. Maxto anic tsi' yʌc'ʌ i wut ts'usub, mi higuera te', mi granado te', mi olivote', pero wʌle mi caj c pʌsbeñet la' wenlel c'ʌlʌl ti pejtelel q'uin, che'en.

²⁰Ti cha'yajlel tsa' tili i t'an lac Yum ti' tojlel Hageo che' ti jini jach bʌ q'uin. Tsi' yʌlʌ:

²¹Suben Zorobabel jini gobernador ti Judá: “Mi caj c ñijcan panchan yic'ot pañimil.

²²Mi caj c chilben i ye'tel jini yumʌlob año' bʌ ti colem tejclum tac. Mi caj c jisʌbeñob i p'ʌtʌlel. Mi caj c ñew choc jini carreta tac yic'ot jini buchulo' bʌ ti mal. Jini caballo tac yic'ot jini c'ʌchʌlo' bʌ mi caj i yajlelob. Mi caj i wʌlʌc jats'ob i bʌ ti espada anquese i pi'ʌlob jach i bʌ, che'en lac Yum.

²³Tsi yʌlʌ i Yum Panchan yic'ot Pañimil: Zorobabel (i yalobilet Salatiel) c winiquet. Ti ili q'uin mi caj j q'uelet che' bajche' mʌtc'ʌbʌl c cha'an. Mi caj a wajñel quic'ot ti pejtelel ora come tsac yajcayet”, che'en i Yum Panchan yic'ot Pañimil.