Read Chol Zacarias 1 Bible Online

Zacarias 1 - Chol bible

Zacarias 1

¹Che' ti' tejchibal noviembre ti' cha'p'ejlel jab che' woli ti yumʌl Darío, lac Yum tsa' caji i pejcan jini x'alt'an Zacarías (i yalobil Berequías i yalobil bʌ jini x'alt'an Iddo).

²Woli' yʌl lac Yum: Joñon, Yumʌlon ti Panchan, tsac wen mich'le la' ñojte'elob. Pero sutq'uin la' bʌ tic tojlel. Che' jini mi caj c cha' tilel ti la' tojlel.

⁴Mach yomic lajaletla bajche' la' ñojte'elob. Jini x'alt'añob tsi' pejcayob ti oñiyi cha'an mi' cʌyob i mul. Tsi' yʌlʌyob: “Ubinla i t'an i Yum Panchan yic'ot Pañimil. Cʌyʌ la' mul, come leco jax la' melbal”, che'ob. Pero ma'anic tsi' jac'ʌyob. Ma'anic tsi' p'isiyob ti' wenta.

⁵Anix ora tsa' chʌmiyob la' ñojte'elob yic'ot jini x'alt'añob, pero tsi' ñopoyob isujm i t'an lac Yum. Mi' yajñel ti pejtelel ora.

⁶Tsi' yubiyob wocol cha'an i mul. Che' jini tsi' cʌyʌyob i mul. Tsa' caji i ña'tañob che'ʌch tsi' lu' melbeyob i Yum Panchan yic'ot Pañimil che' bajche' tsi' wʌn subeyob. Tsi' yʌq'ueyob i toj i mul ti jujuntiquil, che'en.

⁷Ñumeñix uxp'ejl uw, che' ti' tejchibal febrero, ti' cha'p'ejlel jab che' woli ti e'tel Darío, lac Yum tsi' pejca jini x'alt'an Zacarías (i yalobil Berequías, i yalobil Iddo).

⁸Tsaj q'uele ti ac'ʌlel c'ʌchʌcña woli' tilel Winic ti chʌchʌc bʌ caballo. Tsa' wa'le ti' yojlil mirto te' ti' ti' ja'. Ya' ti' pat tsaj q'uele yambʌ caballo tac, chʌchʌc bʌ yic'ot sʌsʌc bʌ yic'ot yʌxmulan bʌ.

⁹Tsa' wa'le juntiquil ángel tic t'ejl. Tsaj c'ajtibe jini ángel: ¿Chuqui i ye'tel jini caballo tac, c yum? cho'on. Jini ángel tsi' subeyon: Mi caj c subeñet, che'en.

¹⁰Tsa' caji' pejcañon jini Winic wa'al bʌ ti yojlil mirto te', jiñʌch i yAngel lac Yum. Tsi' subeyon: Chocbilob tilel cha'an lac Yum, cha'an mi' xʌñob pejtel pañimil, che'en.

¹¹Tsa' c'otiyob yaño' bʌ c'ʌchʌlo' bʌ ba' wa'al i yAngel lac Yum ti' yojlil mirto te'. Tsi' subeyob: Tsa'ix c xʌñʌ lojon pejtel pañimil. Tsac tsaji lojon ñumel. Ñʌch'ʌlob ti pejtelel pañimil. Ma'anic chuqui woli' yujtel, che'ob.

¹²Jini Angel i cha'an lac Yum tsa' caji ti oración: C Yum Añet bʌ ti Panchan yic'ot ti Pañimil, anix lujump'ejl i chʌnc'al (70) jab wola' pʌsbeñob a mich'lel jini año' bʌ ti Jerusalén yic'ot ti Judá. ¿Jal to ba mi caj i lajmel a mich'lel cha'an ma' cha' p'untañob? che'en.

¹³Lac Yum uts'atax tsi' jac'be i t'an jini ángel wa'al bʌ tic t'ejl cha'an mi' tijicñesʌben i pusic'al.

¹⁴Jini ángel tsi' subeyon: C'am yom ma' subeñob jini winicob ili t'an tilem bʌ ti lac Yum. Jiñʌch i Yum Panchan yic'ot Pañimil. Woli' yʌl: “C'ux mi cubin jini loq'uemo' bʌ ti Judá yic'ot ti Jerusalén. Tsʌytsʌyña c pusic'al cha'an ñup'ulob ti' wenta yambʌ i yumob.

¹⁵Wen mich'on ti' tojlel yaño' bʌ tejclumob, come to'ol che' jach añob. Che' bʌ tsac ts'ita' mich'le c tejclumob cha'an i mul, yambʌ yumʌlob tsi' yutsi tic'layob”. Che'ʌch yom ma' sub.

¹⁶Lac Yum woli' yʌl: “Jini cha'an tsa'ix sujtiyon ti Jerusalén cha'an mic p'untañob. Mi caj i cha' wa'chocoñob c Templo yic'ot pejtel jini tejclum Jerusalén”, che'en i Yum Panchan yic'ot Pañimil.

¹⁷Yom ma' cha' al: “Mi caj i cha' aq'uentel i wenlel jini tejclum tac ti Israel. Mi caj c cha' ñuq'uesʌbeñob i pusic'al jini año' bʌ ti Jerusalén. Mi caj c cha' ajñel yic'otob. Che'ʌch woli' yʌl i Yum Panchan yic'ot Pañimil”, che'en jini ángel.

¹⁸Che' bʌ tsac letsa c wut, tsaj q'uele ya'an chʌnts'ijt xulub.

¹⁹Tsaj c'ajtibe jini ángel woli bʌ i pejcañon: ¿Chuqui iliyi? cho'on. Tsi' jac'beyon: Ili xulub i yejtalʌch chʌmp'ejl colem tejclum tsa' bʌ i tic'layob Judá yic'ot Israel yic'ot Jerusalén. Tsi' yʌc'ʌyob ti pam pujquel, che'en.

²⁰Tsi' pʌsbeyon chʌntiquil xjuc'te'.

²¹Che' jini tsaj c'ajtibe: ¿Chuqui mi caj i melob ili winicob? cho'on. Jini ángel tsi' subeyon: Tilemob cha'an mi' tsepob ili chʌmp'ejl xulub tsa' bʌ i pucuyob ti ñajtʌl jini chumulo' bʌ ti Judá. Mi caj i jisʌbeñob i p'ʌtʌlel jini tejclum tac tsa' bʌ i cʌlʌx tic'layob, che'en.