Read Chol Zacarias 10 Bible Online

Zacarias 10 - Chol bible

Zacarias 10

¹Yom mi la' c'ajtiben ja'al lac Yum che' ti' yorajlel jajmel, come lac Yum mi caj i yʌc'. Mi caj i choc tilel chajc yic'ot ja'al. Che' jini mi' caj ti wen yʌx'an jamil.

²Lolom jach jini dios tac. Jini xch'ʌcojelob mi' cha'leñob lot. Mi' lon alob chuqui mach isujmic. Ma'anic mi' ts'ʌctiyel jini mu' bʌ i lon ña'tañob. Jini cha'an woli' sajtelob c cha'año' bʌ che' bajche' tiñʌme'. Woliyob ti wocol, come ma'anic majqui mi' cʌntañob.

³Ti' caj i mul jini jontol bʌ xcʌntayajob wen mich'on. Mi caj cʌq'ueñob i toj i mul jini yumʌlob, come tsa'ix tili lac Yum Dios cha'an mi' coltan jini año' bʌ ti Judá, come i yʌlac'. Mi caj c p'ʌtesañob cha'an lajal mi' sujtelob che' bajche' wen ch'ejl bʌ caballo ti guerra, che'en.

⁴Mi caj i loq'uel ti Judá jini ñuc bʌ Xajlel am bʌ ti' xujc otot. Jiñʌch lac pijtaya jini Jalʌjb chajpʌbil bʌ cha'an guerra. Jiñʌch Yumʌl mu' bʌ caj i cha'len i yumʌntel ti pejtelel pañimil.

⁵Jini año' bʌ ti Judá mi caj i mʌjlel i cha'añob che' bajche' wen ch'ejl bʌ soldadojob mu' bʌ i t'uchtañob majlel i contrajob ti oc'ol ya' ti bij, come lac Yum mi' majlel ti guerra yic'otob. Jini cha'an mi caj i yubiñob quisin i contrajob.

⁶Joñon mi caj c ch'ejl'esan jini año' bʌ ti Judá yic'ot ti Israel. Mi caj c cha' wa'chocoñob ti' lumal, come c'ux mi cubiñob anquese tsac poj chocoyob. Mi caj i yajñelob quic'ot che' bajche' c cha'añob ti pejtelel ora, come joñon i Yumon i Dioson. Jini cha'an mi caj c jac'beñob i t'an.

⁷Mi caj i q'uejlelob ti ñuc che' bajche' soldado mu' bʌ i mʌjlel i cha'an. Mi caj i wen ñuc'an i pusic'al che' bajche' ti vino. I yalobilob mi caj i q'uelob. Mi caj i yubiñob i tijicñʌyel ja'el. Mi caj i tajob i tijicñʌyel i pusic'al ti lac Yum.

⁸Joñon mi caj c ch'uybañob tilel cha'an mic tempañob, come mʌmbilobix c cha'an. Cabʌl mi' cajelob ti p'ojlel che' bajche' ti ñaxan.

⁹Tsaj cʌn chocoyob majlel ti ñajt tac bʌ tejclum, pero ya'i mi caj c'ajtiyel i cha'añob. Mi caj i cha' sujtelob ba' añon yic'ot i yalobilob.

¹⁰Joñon mi caj c cha' pʌyob tilel loq'uel ti' lumal Egipto yic'ot ti Asiria. Mi caj c cha' pʌyob ti chumtʌl ti Israel wʌ' ti Galaad yic'ot ti Líbano. Che' cha' wʌ'ix añob mach ñuquic jini lum yubil cha'an cabʌlob.

¹¹Xuc'ul mi' cajelob ti c'axel ya' ti colem ñajb, come mi caj c tic' jini wʌlʌcña bʌ ja'. Mi' caj ti laj tiquin jini ñoja' i c'aba' Nilo. Mi caj c jisʌben i yumʌntel Asiria yic'ot Egipto. Ma'anix mi caj i chʌn cha'leñob yumʌl ti' tojlel israelob.

¹²Mi caj i tajob i p'ʌtʌlel ti' Yum Dios. Mi caj i cha'leñob xʌmbal tic bijlel. Mi caj c wen cʌntañob, che'en lac Yum.