Read Chol Zacarias 11 Bible Online

Zacarias 11 - Chol bible

Zacarias 11

¹Obol la' bʌ añet bʌ la ti Líbano. Yom mi la' jam i ti' tac la' lumal, come mi caj i tejchel meloñel. Mi' caj ti pulel jini ch'ujte' tac.

²Cha'lenla uq'uel, jatetla ciprés, yic'ot ch'ujte'. Tsa'ix yajli jini ñumen wen bʌ te'. Cha'lenla bʌq'uen, c'olol te' ya' ti Basán. Cha'lenla uq'uel, come tsa'ix sejq'ui pejtel jini ch'ujy tac bʌ te'.

³Ju'ucña woliyob ti uq'uel jini xcʌntayajob ti Israel, come jisʌbilix i ñuclel. Ju'ucña i yuq'uel i yal tac bajlum, come laj jisʌbilix jini te'el ya' ti' joctʌl Jordán.

⁴Lac Yum Dios tsi' subeyon: Wen cʌntan c cha'año' bʌ che' bajche' xcʌnta tiñʌme' mi' cʌntan i tiñʌme' woli bʌ ti jujp'el cha'an mi' tsʌnsʌntel.

⁵Jini jontol bʌ i yumob mi' mʌñob winicob, mi' tsʌnsañob, pero ma'anic mi' tojob i mul. Mi' yʌlob: “La' sujbic i ñuclel lac Yum, cabʌlix c chubʌ'an. Wen chumulonla cha'an tsa'ix lac choño jini tiñʌme'”. Che' mi' yʌlob jini xcʌntayajob. Jini mu' bʌ i cʌntañob c cha'año' bʌ ma'anic mi' p'untañob.

⁶Jini cha'an joñon ja'el ma'anic mi caj c p'untan jini winicob, come mi caj cʌc'ob ti' wenta jontol bʌ i pi'ʌlob yic'ot ti' wenta i reyob mu' bʌ caj i tsʌnsañob. Mi caj i sujtel i lumal ti xajlelol mach bʌ anic i c'ʌjñibal. Ma'anic mi caj c chʌn coltañob. Che'ʌch tsi' yʌlʌ lac Yum.

⁷Jini cha'an joñon tsaj cʌnta jini alʌc'ʌl ame tsʌnsʌntic. Tsaj cʌnta ja'el jini mach bʌ c'oq'uic. Tsac ch'ʌmʌ cha'ts'ijt barate'. Jini junts'ijt tsa cotsʌbe i c'aba' I Yutslel c Pusic'al. Jini yambʌ tsa cotsʌbe i c'aba' Junmojt Jach. Che'i tsaj cʌnta tiñʌme' che' bajche' tsa' subentiyon.

⁸Ti jump'ejl jach uw tsac choco loq'uel uxtiquil jontol bʌ xcʌntayajob tsa' bʌ i ts'a'leyoñob, come tsac wen mich'leyob.

⁹Jini cha'an tsac subeyob: Ma'anix mi caj c chʌn cʌntañetla. Jini mu' bʌ i chʌmel, la' chʌmic. Jini mu' bʌ i sajtel, la' sajtic. Jini mu' bʌ i cʌytʌlob, la' i jisañob i bʌ, cho'on.

¹⁰Che' jini tsac ch'ʌmʌ c te' am bʌ i c'aba' I Yutslel c Pusic'al. Tsaj c'ʌsʌ cha'an mic tsictesan wolic jisʌben i c'ʌjñibal c trato tsa' bʌ c ñaxan sube c tejclumob.

¹¹Ti jim bʌ ora tsa' jejmi jini trato ti' tojel i wut jini tsa' bʌ i mʌñʌyob tiñʌme' yic'ot jini tsa' bʌ i choñoyob. Che' jini tsi' ña'tayob i cʌntesʌntel ti Dios cha'an jini tsa' bʌ c mele.

¹²Tsac subeyob: Mi uts'at mi la' q'uelon, aq'ueñon c tojol, pero mi mach la' womic la' wʌq'ueñon, la' to ajnic. Che' tsac subeyob. Jini cha'an tsa' caji i yʌq'ueñoñob c tojol, lujunq'uejl i cha'c'al (30) sʌsʌc taq'uin.

¹³Lac Yum tsi' subeyon: Che'ʌch wola' ts'a'lentel ti' tojlel a pi'ʌlob. Ch'ʌmʌ jini taq'uin. Otsan ya' ba' lotbil ofrenda tac ti Templo, che'en lac Yum. Jini cha'an tsac ch'ʌmʌ jini lujunq'uejl i cha'c'al sʌsʌc taq'uin. Tsa cotsa ya' ti' yotot lac Yum.

¹⁴Ti ora tsaj c'ʌsʌ yambʌ c barate' am bʌ i c'aba' Junmojt Jach cha'an t'oxbilobix ti cha'mojt jini Judá yic'ot Israel.

¹⁵Lac Yum tsi' subeyon: Yom ma' cajel ti e'tel che' bajche' xcʌnta tiñʌme', pero wʌle mele a we'tel che' bajche' jini mach bʌ anic i c'ʌjñibal, che'en.

¹⁶Che'i mi caj a tsictesan bajche' joñon mi caj cʌq'ueñob ili israelob xcʌntaya mach bʌ anic i pusic'al. Ma'anic mi caj i sajcan jini sajtemo' bʌ. Ma'anic mi caj i coltan jini ch'o'ch'oco' bʌ. Ma'anic mi caj i ts'ʌcan jini c'ʌsquijem bʌ. Ma'anic mi caj i yʌq'uen i c'aj o jini lujb bʌ. Pero mi caj i c'ux jini wen jujp'em bʌ. Mi caj i p'it i yoc.

¹⁷¡Obol i bʌ jini xcʌntaya mach bʌ anic mi' cʌntan jini tiñʌme'! La' tsejpic i c'ʌb ti espada. La' jec'bentic jini ñoj bʌ i wut. La' tiquic junts'ijt i c'ʌb. La' yajpic jini ñoj bʌ i wut. Che' tsi' subeyon lac Yum.