Read Chol Zacarias 13 Bible Online

Zacarias 13 - Chol bible

Zacarias 13

¹I Yum Panchan yic'ot Pañimil woli' chʌn sub: Ti jim ora mi caj i jambentelob Cuxul bʌ Ja' jini xchumtʌlob ti Israel yic'ot ti Jerusalén. Jini ja' mi caj i sʌq'uesañob ti pejtelel i mul yic'ot pejtelel i bibi'lel.

²Ti jim bʌ ora mi caj c lu' jisan jini dios tac yic'ot i ña'tʌntel yic'ot pejtel lot bʌ x'alt'añob yic'ot i bibi'lel i pusic'al winicob x'ixicob.

³Mi an majqui mi' sub i bʌ ti x'alt'an, mux i tsʌnsʌntel cha'an i tat i ña'. I tatob mi caj i subeñob: “Wersa ma' chʌmel, come tsa'ix a cha'le lot ti' c'aba' lac Yum”, che'ob.

⁴Ti jim bʌ q'uin ma'anix majqui mi caj i lon sub i bʌ ti x'alt'an cha'an mi' chañ'esan i bʌ ti' tojlel i pi'ʌlob. Ma'anix majqui mi caj i lʌp i pislel x'alt'añob cha'an mi' lotin winicob.

⁵Mi caj i yʌl: “Mach x'alt'añonic, x'e'telon ti cholel. C'ʌlʌl che' alobon to tsac ñopo e'tel ti lum cha'an i bʌl c ñʌc'”, che'en.

⁶Mi an majqui mi' c'ajtiben: “¿Chucoch tsepbil a c'ʌb yic'ot a tajn?” mi che'en, mi caj i jac': “Jiñʌch c lojwejl tsa' bʌ i yʌq'ueyoñob c pi'ʌlob ti cotot”. Che' mi caj i yʌl, che'en lac Yum.

⁷I Yum Panchan yic'ot Pañimil woli' chʌn al: La' tilic i contra cha'an mi' low jini Xcʌntaya c cha'an, jini c pi'ʌl ti e'tel, lajal bʌ quic'ot. La' tsʌnsʌntic jini Xcʌntaya. Mi caj i pam pujquelob jini tiñʌme'. Pero mi caj c sujtel cha'an mij coltan jini ch'o'ch'oco' bʌ.

⁸Ti jim bʌ ora mi caj i t'oxtʌlob ti uxmojt jini israelob ya' ti' lumal. Cha'mojt mi caj i jilelob, pero mi caj i coltʌntel junmojt. Junmojt jach mi caj i cʌytʌl ti' lumal.

⁹Che' jini mi caj cʌc'ob ti wocol i colojbal israelob cha'an mi' sʌq'uesʌntelob che' bajche' oro yic'ot plata. Che' jini mi caj i ch'ujutesañob j c'aba'. Joñon mi caj cubibeñob i t'an. Mi caj c pejcañob tic pi'ʌlob c'uxbibilo' bʌ c cha'an. Mi caj i pejcañoñob ti' Yum Dios. Che' tsi' yʌlʌ lac Yum.