Read Chol Zacarias 14 Bible Online

Zacarias 14 - Chol bible

Zacarias 14

¹Yom yʌxʌl la' wo, come lʌc'ʌlix i q'uiñilel lac Yum. Ti jim bʌ ora lac Yum mi caj i tempan cabʌl tejclumob cha'an mi' cha'leñob guerra ti' contra Jerusalén. Wersa mi caj i ch'ʌjmel ili tejclum. Mi caj i laj chilbentelob i chubʌ'an. Mi caj i tic'lʌntelob jini x'ixicob. Ojlil jini winicob x'ixicob mi caj i cʌjchelob majlel. Ojlil mi caj i cʌytʌlob ti tejclum.

³Ti jim bʌ ora lac Yum mi caj i tilel cha'an mi' cha'len guerra ti' contra pejtel jini tejclum tac. Wen chajpʌbil, wen yujil guerra.

⁴Mi caj i c'ʌlʌl c'otel ti pam wits i c'aba' Olivo am bʌ ti' tojel Jerusalén ya' ti' pasibal q'uin. Mi caj i jajwel jini wits i c'aba' Olivo. Ojlil mi caj i majlel ti norte, ojlil ti sur. Mi' caj i cʌytʌl colem joctʌl ti' jajp c'ʌlʌl ti' pasibal q'uin, c'ʌlʌl ti' bʌjlibal q'uin.

⁵Mi caj la' puts'el ya' ti joctʌl ti' ñʌc' jini wits, come jini joctʌl mi caj i c'ʌlʌl c'otel ti' ti' Jerusalén. Mi caj la' puts'el che' bajche' tsa' puts'iyob la' tatob che' ti' yorajlel yujquel lum che' woli ti yumʌntel Uzías ya' ti Judá. Ti jim bʌ ora mi caj i tilel lac Yum Dios yic'ot pejtel i cha'año' bʌ.

⁶Ti jim bʌ q'uin ma'anix mi caj i pʌs i c'ʌc'al q'uin, mi uw mi ec', pero ma'anix ac'ʌlel.

⁷Come junsujm jach q'uiñil ti pejtelel ora ti' tojlel lac Yum. Ma'anix mi' chʌn pasel q'uin. Ma'anix mi' bʌjlel q'uin che' bajche' i tilel ti yambʌ ora. Ma'anix mi' yic'an pañimil. An jach i sʌclel che' ti ic'an.

⁸Ti jim bʌ q'uin mi caj i loq'uel cuxul bʌ ja' ya' ti Jerusalén. Junxʌjc' mi caj i majlel ti jini Chʌmen bʌ Ñajb. Yambʌ junxʌjc' mi caj i majlel ti jini ñajb i c'aba' Mediterráneo. Chʌn cuxul jini ja' che' ti' yorajlel jajmel yic'ot che' ti' yorajlel ja'lel.

⁹Lac Yum mi caj i yochel ti Rey ti' tojlel pejtel pañimil. Ti jim bʌ ora jini jach lac Yum mi caj i ch'ujutesʌntel come juntiquil jach. Ma'anic yambʌ.

¹⁰Puro joctʌl mi caj i majlel jini lum che' bajche' colem joctʌl am bʌ ti Geba ya' ti norte c'ʌlʌl ti Rimón ya' ti sur. Chan Jerusalén, ñucatax mi caj i q'uejlel. Ya' jaxʌl Jerusalén ti jump'ejl colem puerta i c'aba' Benjamín, yic'ot ti oñiyix bʌ puerta, yic'ot ti puerta am bʌ ti Xujc, yic'ot ti chan bʌ q'ueloñib i cha'an Hananeel, yic'ot ya' ba' mi' mejlel i vino jini rey.

¹¹Che' jini c'ax tijicña jax mi caj i chumtʌlob ti Jerusalén, come ma'anix mi caj i chʌn ubiñob wocol. Ti jim bʌ ora xuc'ul mi' cajelob ti chumtʌl ti Jerusalén.

¹²Pero lac Yum mi caj i yʌq'ueñob wocol pejtel winicob tsa' bʌ i contrajiyob Jerusalén. Mi caj i yujtel che' wa'alob to mi caj i to'o jilelob i bʌc'tal. Mi caj i sajtelob i wut. I yac'ob mi caj i to'o jilelob ya' ti' yej.

¹³Ti jim bʌ ora mi caj i yubiñob cabʌl bʌq'uen chocbil bʌ tilel cha'an lac Yum. Mi caj i contrajiñob i bʌ cha'an mi' jisañob i bʌ.

¹⁴Judá ja'el mi' cajel ti guerra ya' ti Jerusalén. Che' jini mi caj i tempañob cabʌl chubʌ'añʌl che' bajche' oro, yic'ot plata, yic'ot bajc'ʌl bujcʌl tac i cha'an i contrajob tilemo' bʌ ti pejtelel tejclum tac ti pañimil.

¹⁵Mi caj i c'am'añob ti jini jach bʌ c'amʌjel jini caballo, yic'ot mula, yic'ot camello, yic'ot burro, yic'ot pejtel yan tac bʌ alʌc'ʌl i cha'an i contrajob.

¹⁶Che' bʌ tsa'ix ñumi ili wocol, pejtel i colojbal winicob cuxulob to bʌ mi caj i letselob ti Jerusalén ti jujump'ejl jab cha'an mi' ch'ujutesañob jini Rey, i Yum Panchan yic'ot Pañimil. Mi caj i majlel i subeñob wocolix i yʌlʌ lac Yum.

¹⁷Pero obolob i bʌ pejtel winicob mach bʌ yomobic letsel ti Jerusalén cha'an mi' ch'ujutesañob jini Rey, i Yum Panchan yic'ot Pañimil. Ma'anic mi caj i yajlel ja'al ti' tojlelob.

¹⁸Mi ma'anic mi' tilelob jini año' bʌ ti Egipto, Dios mi caj i chocbeñob tilel yambʌ wocol. Che' jini Dios mi caj i yʌq'ueñob i toj i mul jini mach bʌ anic mi' tilelob ti Jerusalén.

¹⁹Che'ʌch mi caj i tojob i mul egiptojob yic'ot pejtel jini yambʌ tejclumob mach bʌ yomobic tilel cha'an mi' ch'ujutesañob lac Yum.

²⁰Ti jim bʌ ora ts'ijbubil ili t'an ya' ti' campanajlel i bic' caballo: “Ch'ujul ti' tojlel lac Yum”. Laj ch'ujul pejtel taza tac am bʌ ti' mal i Templo lac Yum, jini i t'ojol tac bʌ yic'ot mach bʌ i t'ojolic.

²¹Pejtel jini olla am bʌ ti Jerusalén yic'ot ti Judá laj ch'ujul ti' tojlel i Yum Panchan yic'ot Pañimil. Pejtelel mu' bʌ i tilelob i ch'ujutesañob Dios mi caj i c'ʌñob cha'an mi' ch'ʌxob majtañʌl cha'an Dios. Ti jim bʌ ora ma'anix majqui mi' cha'len mʌñoñel yic'ot choñoñel ti' Templo i Yum Panchan yic'ot Pañimil.