Read Chol Zacarias 7 Bible Online

Zacarias 7 - Chol bible

Zacarias 7

¹Awilan che' ti chʌmp'ejlel jab i ye'tel jini rey Darío, lac Yum tsi' pejca Zacarías che' ti' jilibal noviembre.

²Jini año' bʌ ti Betel tsi' chocoyob tilel Sarezer yic'ot Regem Melec yic'ot i winicob cha'an mi' c'ajtibeñob i yutslel i t'an lac Yum ti Templo am bʌ ti Jerusalén.

³Tsi' c'ajtibeyob jini motomajob yic'ot jini x'alt'añob mi yom to mi' chʌn cha'leñob ch'ajb yic'ot uq'uel ti agosto ti jujump'ejl jab che' bajche' i tilel.

⁴Lac Yum tsi' subeyon:

⁵Subeñob pejtel winicob yic'ot jini motomajob: “Che' bʌ tsa' la' cha'le ch'ajb yic'ot uq'uel che' ti agosto yic'ot ti octubre ti jujump'ejl jab ili lujump'ejl i chʌnc'al (70) jab tsa' bʌ ñumi ya' ti Babilonia, ¿tsa' ba la' cʌyʌ la' mul cha'an mi la' tsajcañon? Ma'anic.

⁶Wʌle ja'el che' an chuqui mi la' jap mi la' c'ux, ma'anic mi la' ña'tañon. Mi la' c'ux mi la' jap bajche' jach la' wom ti la' bajñel pusic'al.

⁷Che'ʌch ja'el tsa cʌlʌ ti oñiyi ti' tojlel jini x'alt'añob che' tijicñayob to la' tatob ya' ti Jerusalén yic'ot ti' joytʌlel yic'ot ti joctʌl am bʌ ti sur, come tsi' bajñel yajcayob i bijlel ja'el”. Che' yom ma' subeñob. Che' tsi' yʌlʌ lac Yum.

⁸Tsa' tili i t'an lac Yum ba'an Zacarías.

⁹I Yum Panchan yic'ot Pañimil woli' yʌl: Toj yom mi la' mel. Cha'lenla chuqui uts'at ti' tojlel la' pi'ʌlob. Pʌsbeñob i yutslel la' pusic'al.

¹⁰Mach la' tic'lan meba' x'ixicob yic'ot meba' alobob yic'ot jini ñajt bʌ ch'oyolob yic'ot jini p'ump'uño' bʌ. Mach la' tech jontolil ti la' pusic'al ti' contra la' pi'ʌlob.

¹¹Pero la' ñojte'elob ma'anic tsi' jac'ʌyob. Tsi' mʌyʌyob i wut. Tsi' mʌcʌyob i chiquin cha'an mach yomobic i yubin.

¹²Tsi' wen tsʌts'esayob i pusic'al che' bajche' diamante xajlel cha'an mach yomobic i jac'beñon c mandar yic'ot c t'an, anquese tsac chocbeyob tilel ti' wenta x'alt'añob cʌntesʌbilo' bʌ tic Espíritu ti oñiyi. Che' jini tsi' wen techbeyoñob c mich'ajel.

¹³Tsac pʌyʌyob, pero ma'anic tsi' yubiyob. Jini cha'an ba' ora tsi' pejcayoñob, ma'anic tsac jac'beyob i t'an ja'el.

¹⁴Tsac pam pucuyob che' bajche' p'ʌtʌl bʌ ic' ti ñajt tac bʌ pañimil ti' tojlel jini mach bʌ i pi'ʌlobic. Ch'ijiyem tsa' cʌle i lum. Ma'anic majqui tsa' chʌn ñumi ya'i. Jochol tsa' cʌle jini uts'at bʌ lum tsa' bʌ i lon mulayob. Che' tsi yʌlʌ i Yum Panchan yic'ot Pañimil.