Read Chol Malaquias 1 Bible Online

Malaquias 1 - Chol bible

Malaquias 1

¹Jiñʌch i t'an lac Yum tsa' bʌ subenti jini x'alt'an Malaquías cha'an mi' cha' subeñob israelob:

²Tsac wen c'uxbiyetla, che'en lac Yum, pero jatetla mi la' wʌl: “¿Isujm ba? ¿Bajche' tsa' c'uxbiyon lojon?” che'etla. Tsaj c'uxbiyetla che' bʌ tsaj c'uxbi la' tat Jacob, che' bʌ tsac ñusa Esaú i yʌscun Jacob. Tsac jisʌbe i lum yic'ot i yumʌntel Esaú tilem bʌ ti' ñojte'el. Tsa'ix c chilbe i lum cha'an mi' yochel ti' lum bʌte'el, che'en.

⁴Edomob i p'olbalobʌch Esaú. Mi' yʌlob jini edomob: Mi caj lac cha' mel jini jejmen tac bʌ, che'ob. I Yum Panchan yic'ot Pañimil mi yʌl: Ba' ora mi la' cha' mel, joñon mi caj c cha' jisan, che'en, come i lumal Edom jiñʌch i Lumal Jontolil. Mi' pejcʌntelob jini edomob ti Jini Mach bʌ Anix Mi' Ñusʌbentelob i Mul ti Dios.

⁵Israelob, jatetla mi caj la' q'uel. Mi caj la' wʌl: Isujm i p'ʌtʌlel lac Yum mi' c'ʌlʌl c'otel ti ñajtʌl, c'ʌlʌl ti yan tac bʌ lum, che'etla.

⁶Jini ch'iton mi' q'uel ti ñuc i tat. Jini x'e'tel mi' q'uel ti ñuc i yum. Ubinla motomajob*, la' taton. ¿Chucoch ma'anic mi la' c'uxbiñon? La' Yumon. ¿Chucoch ma'anic mi la' q'uelon ti ñuc? che'en i Yum Panchan yic'ot Pañimil. Mi la' lon al: “¿Bajche' tsac ts'a'lebeyet a c'aba'?” che'etla.

⁷Tsa'ix a ts'a'lebeyon j c'aba' che' bʌ tsa' wʌq'ueyon waj tic pulʌntib mach bʌ uts'atic, che'en. Mi la' lon al: “¿Bajche' tsac ts'a'leyet?” che'etla. Ti jujunyajl che' mi la' lon ña'tan la' wʌq'ueñon jini mach bʌ mero wenic.

⁸Tsa' la' lon ña'ta uts'at mi la' wʌq'uen la' Yum jini xpots' bʌ alʌc'ʌl, yic'ot mach bʌ wenic i yoc, yic'ot c'am bʌ. Mi la' lon al: “Mach mulilic ti' wut Dios”, che'etla. Mi tsa' wʌq'ue i majtan ñuc bʌ yumʌl che' bajche' iliyi, ¿mu' ba caj i mulan? che'en i Yum Panchan yic'ot Pañimil.

⁹Jini cha'an toj'esan la' bʌ yic'ot Dios cha'an mi' p'untañetla. ¿Mu' ba caj i q'ueletla ti uts'at che' mi la' wʌq'uen i majtan mach bʌ wenic? che'en i Yum Panchan yic'ot Pañimil.

¹⁰Uts'at anic juntiquil mu' bʌ i ñup'ben i ti' Templo cha'an ma'anix mi la' chʌn tsuc' jini c'ajc ti pulʌntib. Ma'anic mij q'ueletla ti uts'at, che'en i Yum Panchan yic'ot Pañimil. Ma'anic mic ch'ʌm tic wenta jini majtañʌl mu' bʌ la' wʌq'ueñon.

¹¹Pero jini mach bʌ israelobic mi caj i q'uelob ti ñuc j c'aba' c'ʌlʌl ti' pasibal q'uin c'ʌlʌl ti' bʌjlibal q'uin. Ti pejtelel pañimil mi caj i yʌq'ueñoñob xojocña bʌ pom yic'ot uts'at bʌ c majtan, come j c'aba' mi' q'uejlel ti ñuc ti pejtelel pañimil, che'en i Yum Panchan yic'ot Pañimil.

¹²Pero jatetla mi la' wʌc' j c'aba' ti wajlentel, che' mi la' wʌl ma'anic i c'ʌjñibal jini pulʌntib c cha'an, che' mi la' subeñob winicob x'ixicob uts'at mi' pʌybeñoñob tilel alʌc'ʌl mach bʌ wenic yic'ot c'am bʌ.

¹³Mi la' ts'a'leñon. Wocol jax mi la' wubin che' mi la' wʌq'ueñon c majtan. ¡Ña'tanla! che' mi la' ch'ʌmbeñon tilel xpots' bʌ alʌc'ʌl yic'ot mach bʌ wenic i yoc yic'ot c'am bʌ, ¿yom ba mic ch'ʌm tic wenta?

¹⁴Obol i bʌ jini winic mu' bʌ i yʌc' i t'an cha'an mi caj i yʌq'ueñon uts'at bʌ i tat tiñʌme', pero ti wi'il mi' yʌq'uen Dios c'am bʌ. Come Joñon Ñuc bʌ Reyon, che'en i Yum Panchan yic'ot Pañimil. Jini mach bʌ israelobic mi' q'uelob ti ñuc j c'aba'.