Read Chol Malaquias 2 Bible Online

Malaquias 2 - Chol bible

Malaquias 2

¹Ubinla motomajob. Wolic pejcañetla.

²Mi ma'anic mi la' ñich'tʌbeñon c t'an, mi ma'anic mi la' wʌc' ti la' pusic'al, mi caj c chocbeñetla tilel castigo. Mi' caj ti jilel pejtelel jini uts'at tac bʌ woli bʌ la' q'uel. Mi caj la' taj cabʌl wocol. Ma'anic mi caj cʌq'ueñetla tijicña bʌ che' bajche' com. Wersa mi caj la' toj la' mul, come ma'anic tsa' la' p'isi ti wenta jini mu' bʌ c subeñetla.

³P'isila ti wenta, mi caj c chilbeñet la' we'tel. Mi caj c pʌc' ti la' wut i ta' alʌc'ʌl mu' bʌ la' wʌq'ueñon. Mi caj c choquetla loq'uel tic tojlel.

⁴Che' jini mi caj la' ña'tan joñoñʌch tsa' bʌ c chocbeyetla tilel ili t'an cha'an mi la' sutq'uin la' bʌ, cha'an mi la' jac' jini mandar tsa' bʌ cʌq'ue la' tat Leví, che'en i Yum Panchan yic'ot Pañimil.

⁵Tsa cʌq'ue c t'an jini motomajob cha'an mi caj cʌq'ueñob i cuxtʌlel yic'ot i ñʌch'tʌlel i pusic'al. Tsa cʌq'ue cha'an mi' q'uelon ti ñuc. Tsi' q'ueleyon ti ñuc. Tsi' bʌc'ñayon.

⁶Tsi' cha' subeyob winicob x'ixicob pejtel tsa' bʌ i yubi tic tojlel. Ma'anic tsi' cha'le lot mi xujch'. Tsi' cha'le xʌmbal quic'ot ti' ñʌch'tʌlel i pusic'al. Toj tsa' ajni ti pañimil. Cabʌl tsi' pʌyʌyob loq'uel ti mulil.

⁷Uts'at che' mi' wen subob i ña'tʌbal Dios jini motomajob ti' tojlel winicob x'ixicob cha'an mi' ñopob i mandar Dios. Jini motomajob subt'añobʌch cha'an i Yum Panchan yic'ot Pañimil. Uts'at che' mi' c'otelob winicob ba'an jini motomajob cha'an mi' cʌntesʌntelob.

⁸Pero jatetla motomajob mach che'ic tsa' la' mele, come tsa'ix la' cʌyʌ i bijlel Dios. Cabʌl tsa' yajliyetla ti mulil, come tsa'ix la' soco jini t'an tsa' bʌ aq'uentiyob levíjob, che'en i Yum Panchan yic'ot Pañimil.

⁹Jini cha'an tsa cʌc'ʌyetla ti ts'a'lentel ti' tojlel pejtelel winicob x'ixicob, come ma'anic tsa' la' jac'beyon c t'an. Jechojc jax woli la' q'uel winicob x'ixicob. Mach tojic mi la' melob, che'en lac Yum.

¹⁰Awilan juntiquil jach lac tat, jiñʌch Abraham. Ti pejtelelonla i melbalonla jini jach bʌ Dios. Ma'anix woli la cajñel ti' xuc'tilel lac pusic'al yic'ot lac pi'ʌlob. Woli lac ñusan jini xuc'ul bʌ t'an tsa' bʌ aq'uentiyob lac ñojte'el.

¹¹An lotintel ti Judá yic'ot ti Israel yic'ot ti Jerusalén. Jini winicob ti Judá tsa'ix i ts'a'leyob jini Templo mu' bʌ i c'uxbin lac Yum, come tsi' cha'leyob ñujpuñijel yic'ot x'ixicob mu' bʌ i ch'ujutesañob dioste' tac.

¹²Lac Yum la' i loq'uesan ti' Templo yic'ot ti Israel jujuntiquil winic yic'ot motomaj mu' bʌ i cha'len mulil bajche' jini.

¹³An yambʌ la' mul mu' bʌ la' mel. Mi la' cha'len uq'uel ya' ba' mi' yʌq'uentel i majtan lac Yum, come ma'anix mi' q'uel ti uts'at i majtan mu' bʌ la' wʌq'uen. Ma'anix mi la' tajben i yutslel i pusic'al lac Yum.

¹⁴Mi la' wʌl: ¿Chucoch tsa'ix i cʌyʌyonla Dios? che'etla. Mi caj c tsictesʌbeñetla. Come lac Yum tsa'ix i q'uele la' mul che' bʌ tsa' la' cʌyʌ la' wijñam tsa' bʌ ajni la' wic'ot ti' xuc'tʌlel i pusic'al c'ʌlʌl che' xch'oc to. Jiñʌch la' pi'ʌl tsa' bʌ la' pʌyʌ. Tsa' la' wʌq'ue la' t'an cha'an mi caj la' cʌntan.

¹⁵Lac Yum tsi' yotsayetla ti juntiquil jach yic'ot la' wijñam. Cha'an ti' ña'tʌbal Dios tsa' ochiyetla ti juntiquil jach ti' wut Dios che' bʌ tsa' la' cha'le ñujpuñijel. ¿Chuqui yom Dios? Yom alʌlob ti la' tojlel mu' bʌ caj i ch'ujutesañob. Jini cha'an cʌntan la' bʌ. Xuc'ul yom mi la' wajñel la' wic'ot la' wijñam tsa' bʌ la' pʌyʌ che' ch'itoñet to la.

¹⁶Come lac Yum, i Dios Israel, woli' yʌl mach uts'atic mi' q'uel jini mu' bʌ i cʌy i yijñam. Mach uts'atic mi' q'uel jini mu' bʌ i p'ump'un cʌy i yijñam. Jini cha'an yom mi la' wen cʌntan la' bʌ. Mach mi la' cʌy la' wijñam.

¹⁷Tsa'ix lujb'a lac Yum cha'an ti' caj la' t'an. Pero mi la' wʌl: ¿Chuqui tsa' lac tumbe lac Yum? che'etla. Tsa' lujb'a lac Yum come tsa' la' lon alʌ uts'at jontolil. Tsa' la' lon alʌ ma'anic mi caj i yʌc' castigo Dios.