Read Chol Malaquias 3 Bible Online

Malaquias 3 - Chol bible

Malaquias 3

¹Woli' yʌl lac Yum: Ubinla, mi caj c choc tilel suboñel ti' tojel c wut cha'an mi' chajpʌbeñon c bijlel. Tal la' Yum woli bʌ la' pijtan. Ora mi caj i tilel ti' Templo. Mi caj la' q'uel. Mi caj i tijicñesañetla che' bajche' ts'ijbubil tic Trato. Isujm, talon, che'en i Yum Panchan yic'ot Pañimil.

²¿Majqui mi mejlel i q'uel che' mi' tilel? ¿Majqui mi' mejlel ti wa'tʌl ti' tojlel? Come lajalʌch bajche' c'ajc mu' bʌ i sʌq'uesan sʌsʌc taq'uin. Lajalʌch bajche' xapom mu' bʌ i loq'uesan i bibi'lel pisil.

³Lac Yum lajal mi caj i mel winicob che' bajche' jini mu' bʌ i sʌq'uesan plata ti c'ajc. Mi caj i sʌq'uesan jini levíjob che' bajche' oro yic'ot plata cha'an mi' yʌq'ueñob Dios i majtan che' bajche' yom ti sʌc bʌ i pusic'al.

⁴Che' jini lac Yum mi caj i cha' q'uel ti uts'at che' bajche' ti ñaxan i majtan tac mu' bʌ i yʌq'ueñob winicob x'ixicob ti Judá yic'ot ti Jerusalén.

⁵Woli' yʌl lac Yum: Talon c meletla. Mi caj c choc tilel castigo ti ora. Ora jach mi caj cʌq'ueñob i toj i mul jini xwujtob yic'ot mu' bʌ i cha'leñob ts'i'lel, yic'ot xlotob, yic'ot mu' bʌ i xujch'ibeñob i chobejtʌbal jini x'e'telob, yic'ot mu' bʌ i tic'lañob meba' x'ixicob yic'ot meba' alʌlob, yic'ot mu' bʌ i chilbeñob i chubʌ'an jini ñajt bʌ ch'oyolob, yic'ot pejtel mach bʌ añobic mi' bʌc'ñañoñob, che'en i Yum Panchan yic'ot Pañimil.

⁶Come joñon la' Yumon. Ma'anic mi' q'uextiyel c pusic'al. Jini cha'an ma'anic mic junyajlel jisañetla, come chʌn an i yutslel c pusic'al ti pejtelel ora.

⁷Anquese tsa'ix la' ts'a'le c mandar ti wajali, wʌle yom mi la' cha' sutq'uin la' bʌ ba' añon, che'en i Yum Panchan yic'ot Pañimil. La'la. Mi caj c ñusʌbeñet la' mul, che'en. Pero mi la' lon al: “Ma'anic ba' ora tsaj cʌyʌyet lojon”, che'etla.

⁸¿Yom ba mi la' xujch'iben i cha'an bʌ Dios? Pero tsa'ix la' xujch'ibeyon. Mi la' wʌl: “¿Bajche' isujm? ¿Baqui ora tsac xujch'ibeyet lojon?” che'etla. Ma'anic tsa' la' wʌq'ueyon jini diezmo. Ma'anic tsa' la' wʌq'ueyon c majtan.

⁹Jini cha'an tsa'ix c chocoyetla ti la' pejtelel, come tsa'ix la' xujch'ibeyon c cha'an bʌ.

¹⁰Ch'ʌmʌla tilel pejtelel jini diezmo tac ti' yajñib cha'an mi' jastiyel i bʌl ñʌc'ʌl jini levíjob tic Templo. Che' jini mi caj la' q'uel xuc'ulon. Mi caj c jambeñetla jini panchan cha'an mi cʌq'ueñetla pejtel chuqui la' wom. Ñopola ti isujm. Che' jini mi caj c pʌsbeñetla isujmʌch c t'an.

¹¹Che' jini cabʌl mi caj i yʌc' i wut la' pʌc'ʌb, come mi caj j cʌntan cha'an ma'anic mi' yochel i chʌñil yic'ot i c'amʌjel. Ma'anic mi caj i tiquin i wut la' ts'usubil che' ch'oc to, che'en i Yum Panchan yic'ot Pañimil.

¹²Ti pejtelel pañimil winicob mi caj i yʌlob tijicñayetla, come cabʌl mi caj la' taj la' wenlel ti la' lumal, che'en i Yum Panchan yic'ot Pañimil.

¹³Tsa'ix la' chañ'esa la' bʌ tic tojlel, che'en lac Yum. Mi la' wʌl: “¿Bajche' tsac chañ'esa lojon c bʌ? ¿Chuqui tsa cʌlʌ lojon?” che'etla.

¹⁴Ubinla. Tsa'ix la' wʌlʌ: “Lolom jach mi lac ch'ujutesan Dios. ¿Chuqui mi lac taj che' mi lac jac'ben i t'an, che' mi lac mel lac pusic'al cha'an lac mul? Wʌ' ti pañimil tijicñayob mu' bʌ i chañ'esañob i bʌ. Wen chumulob xjontolilob. Che' mi' yilʌbeñob i pusic'al Dios ma'anic mi' yʌq'ueñob castigo. Mi' loq'uelob ti libre”, lon che'etla, che'en lac Yum.

¹⁶Jini tsa' bʌ i bʌc'ñayob lac Yum tsi' ña'tayob lac Yum che' bʌ tsi' pejcayob i bʌ. An i cha'an lac Yum i juñilel lac ña'tʌntel ba' tsa' ts'ijbunti i c'aba' tac jini mu' bʌ i bʌc'ñañob lac Yum yic'ot mu' bʌ i mulañob i ña'tan lac Yum.

¹⁷C cha'añobʌch ba' ora mic tempañob tilel tic tojlel che' bajche' i t'ojol jax bʌ ujʌl, che'en i Yum Panchan yic'ot Pañimil. Mi caj c ñusʌbeñob i mul che' bajche' winicob mi' ñusʌbeñob i mul i yalobil mu' bʌ i jac'ben i t'an.

¹⁸Che' jini mi caj la' ña'tan mach lajalic mi' yujtel jini toj bʌ yic'ot jini mach bʌ tojic ti' yorajlel meloñel. Mi caj la' q'uel majqui wen chumul, jini mu' bʌ i melben i ye'tel Dios o mi jini mach bʌ anic mi' mel, che'en.